އިނގިރޭސި ޕްރިމިއާ ލީގުގެ ތާވަލުގެ އެއްވަނައަށް ވާދަ ކުރާ ޓީމުތަކަށް ބަލާއިރު ހަނިގޮތަކަށް އާސެނަލް މޮޅުވެއްޖެއެވެ. ތާވަލުގެ ފަހަތުން ތިންވަނައިގައި އޮތް ނިއުކާސަލް އާ ދެކޮޅަށް ކުޅުނު މިމެޗުގެ ހަމައެކަނި ގޯލު 72 ވަނަ މިނެޓުގައި ކާމިޔާބުކުރީ ޑިފެންޑަރު ކޮސިއެލްނީ އެވެ.
ދެވަނައިގައި އޮތް ލެސްޓާ ސިޓީ އަނެއްކާވެސް ލަނޑެއްނުޖެހި އެއްވަރުވެއްޖެއެވެ. ބޯންމައުތް އާ ދެކޮޅަށް ކުޅެ ލަނޑެއްނުޖެހި އެއްވަރުވި މިމެޗުގައި ލެސްޓާގެ ރިޔަދް މަހްރެޒް އަށް ވަނީ ޕެނަލްޓީއެއް ލިބި ބޭކާރުވެފައެވެ. އެންމެ ފަހަކަށް ކުޅުނު 3 މެޗުން 2 ޕޮއިންޓު ލިބުނު ލެސްޓާ ތާވަލުގެ ދެވަނައިގައި އޮތީ 40 ޕޮއިންޓާއެކީއެވެ.
ތިންވަނައިގައި އޮތް މެންޗެސްޓާ ސިޓީ ވަނީ ވަޓްފޮޑްގެ މައްޗަށް ކުރި ހޯދާފައެވެ. ސިޓީ ވަޓްފޮޑްް ބަލިކޮށްފައިވަނީ 1-2 ގެ ނަތީޖާއަކުންނެވެ މެޗުގައި ފެނިގެންދިޔަ 3 ގޯލުވެސް ފެނުނީ ސިޓީ ކުޅުންތެރިންގެ ފަރާތުންނެވެ. ފުރަތަމަ ގޯލަކީ އެލެކްސެންޑަރ ކޮލަރެވްގެ އަތުން ބައިކޮޅަށް ވަން ގޯލެކެވެ. މެޗުން މޮޅުވެ ލިބުނު 3 ޕޮއިންޓާއެކު ސިޓީ ތާވަލުގެ 3 ވަނައިގައި އޮތީ 39 ޕޮއިންޓާއެކުއެވެ.
ސްވެންސީގެ މައްޗަށް ކުރި ހޯދައި މެންޗެސްޓާ ޔުނައިޓެޑް ވަނީ ތާވަލުގެ 5 ވަނައަށް ޖެހިލާފައެވެ. ޔުނައިޓެޑަށް ލިބިފައިވަނީ 33 ޕޮއިންޓެވެ. ހަތަރުވަނައިގައި އޮތް ޓޮޓެންހަމް ހޮޓްސްޕާސް އަށް އެއް މެޗު މަދުން ކުޅެގެން ލިބިފައިވަނީ 35 ޕޮއިންޓެވެ. ސްޕާސް މިރޭ ނިކުންނާނީ އެވަޓަން އާ ދެކޮޅަށެވެ.
މިމެޗުގެ އިތުރުން ޗެލްސީ އަދި ކްރިސްޓަލް ޕެލެސް ވެސް މިރޭ ކުޅޭނެއެވެ. މިމެޗު އޮތީ ރާއްޖެ ގަޑިން އިރުއޮއްސި 6:30 ގައެވެ.