ސާފް ސުޒުކީ ކަޕް 2015 ގެ ފައިނަލް މެޗުގައި އަފްގާނިސްތާން ބަލިކޮށް، މިމުބާރާތުގެ ޗެމްޕިއަންކަން 7 ވަނަ ފަހަރަށް އިންޑިއާ ހޯދައިފިިއެވެ.
މެޗުން އިންޑިއާ މޮޅުވެފައިވަނީ 1-2 ގެ ނަތީޖާއަކުންނެވެ. ޓްރިވެންޑްރަމް އިންޓަނޭޝަނަލް ސްޓޭޑިއަމް ގައި ކުޅުނު މިމެޗުގެ ފުރަތަމަ ގޯލު ޖެހީ އަފްގާނިސްތާން އިންނެވެ. ފުރަތަމަ ހާފުގައި ލަނޑެއް ނުޖެހި އެއްވަރުވެ މެޗުގެ ފުރަތަމަ ގޯލު ފެނިގެން ދިޔައީ 70 ވަނަ މިނެޓުގައެވެ. ޒުބައިރު އަމީރީގެ މި ގޯލަށް ފަހު 2 މިނެޓު ނުވަނީސް އިންޑިއާގެ ލަޕެކޫލާ ވަނީ މެޗުގެ ނަތީޖާ ހަމަހަމަ ކޮށްފައެވެ.
މެޗުގެ 90 މިނެޓު ހަމަވީއިރުވެސް އިތުރު ލަނޑެއް ޖެހުމަށް ދެ ޓީމަށްވެސް ނާކާމިޔާބީ ވުމުން ދެން ދިޔައީ އިތުރު ވަގުތަށެވެ.
އިތުރު ވަގުތުގެ ފުރަތަމަ ހާފުގައި އިންޑިއާ ކެޕްޓަން ވަނީ ލީޑު ނަގާދީފައެވެ. އިތުރު ވަގުތުގެ ދެވަނަ ހާފުގައި އަފްގާން ކުޅުންތެރިންވަނީ މެޗުގެ ނަތީޖާ އެއްވަރުކޮށް ޕެނަލްޓީއަށް ދިއުމަށް ވަރަށް މަސައްކަތް ކޮށްފައެވެ. ނަމަވެސް އަފްގާން ކުޅުންތެރިންނަށް ވަނީ ބޯޅަ ގޯލުގެ ލައިނުގެ ފަހަތަށް ފޮނުވާލެވޭނެ ގޮތެއް ނުވެފައެވެ. އަފްގާން ފޯވާޑް ހައިބަރު އަމާނީ ވަނީ ވަރަށް ކައިރިކޮށް ގޯލުގެ ހުރަސް ދަނޑިއާ ހަމައަށް ގެންގޮސްފައެވެ.
މިމުބާރާތުގެ އެންމެ ގިނަ ގޯލު ޖެހި ކުޅުންތެރިޔާގެ މަގާމު ހައިބަރު އަމާނީ ވަނީ ހޯދާފައެވެ. މުބާރާތުގެ އެންމެ މޮޅު ކުޅުންތެރިޔާ ގެ މަގާމު ލިބިފައިވަނީ އިންޑިއާ ކެޕްޓަން ސުނިލް ޗެތުރީއަށެވެ.
އިންޑިއާ އަކީ ސާފް ޗެމްޕިއަންޝިޕް ތަށްޓާ އެންމެ ރައްޓެހި ގައުމެވެ. 11 ފަހަރު ބާއްވާފައިވާ މިމުބާރާތުގެ 7 މުބާރާތް އިންޑިއާއިން މިހާރު ވަނީ ކާމިޔާބުކޮށްފައެވެ. މިއީ ސާފް ޗެމްޕިއަންޝިޕް އިންޑިއާގައި ކުޅުނު 3 ވަނަ ފަހަރެވެ. 3 ފަހަރުވެސް އިންޑިއާ ވަނީ ތަށި ނަގާފައެވެ.