އާ އަހަރާއި ދިމާކޮށް އައްޑޫގެ އެކި ރަށްތަކަށް ނިސްބަތްވާ ގްރޫޕްތަކުން ފަޅު ރަށްތަކަށް ގޮސް މަސްތުވާތަކެތި ބޭނުންކޮށް ޕާޓީ ކުރަމުންދާ ކަމުގެ ޝަކުވާ އާންމުން ކުރި ނަމަވެސް އެކަމާއި މެދު ފުލުހުން ފިޔަވަޅު އަޅާފައި ނުވަނީ އެ ކެޕޭސިޓީ ފުލުހުންގެ ކިބައިގައި ނެތުމުން ކަން 'އައްޑޫލައިވް' އަށް އެނގިއްޖެއެވެ.
އާ އަހަރާއި ދިމާކޮށް އައްޑޫގެ އެކި އަވަށްތަކުގެ ގްރޫޕްތަކުން ވަނީ، ކަނޑިހެރަ، އެއްރުއްހެރަ އަދި ހިތަދޫ 'ފަސްގަނޑަ' އަށް ގޮސް އެތަނުގައި ޕާޓީ ކޮށްފައެވެ.
ގްރޫޕްތަކުން ފަޅުރަށްތަކުގައި މަސްތުވާތަކެތި ބޭނުން ކުރާ ކަމުގެ ތުހުމަތު ރަށުގެ ގިނަ ބަޔަކު ކުރަމުން ގެންދާ އިރު 'އައްޑޫލައިވް' އަށް އެނގިފައިވާ ގޮތުގައި ބައެއް އާންމު ރައްޔިތުން ވަނީ ފުލުހުންނަށް އެ މައްސަލަ ވެސް ހުށަހަޅާފައެވެ.
ނަމަވެސް ފުލުހުން އެކަމާއި މެދު ފިޔަވަޅު އަޅާފައި ނުވަނީ، ފަޅު ރަށްތަކަށް ގޮސް އެތަނުގައި ތިބި މީހުން ހައްޔަރު ކުރި ނަމަވެސް އެމީހުން ބައިތިއްބާނެ ތަނެއް ނެތުމުން ކަމަށް ވެއެވެ.
އައްޑޫގެ ގުޅިފައިވާ ރަށްތަކުން ފުލުހުންގެ ބެލުމުގެ ދަށަށް ގެންނަ މީހުން އާންމު ގޮތެއްގައި ބަންދުކޮށްފައި ބަހައްޓަނީ ހިތަދޫ ޕޮލިސް ސްޓޭޝަން ކުރިން ހިންގި އިމާރާތުގައެވެ. ނަމަވެސް މިވަގުތު އެ އިމާރާތް މަރާމާތު ކުރުމުގެ މަސައްކަތް ކުރަމުން ގެންދާތީ ކުށްވެރިން ބައިތިއްބަނީ، ހުޅުމީދޫ ޕޮލިސް ސްޓޭޝަނުގައެވެ.