ސްޕެނިޝް ލަލީގާ ގައި ރިއަލް މެޑްރިޑް އާއި ވެލެންސިއާ ބައްދަލު ކުރި މެޗު 2-2 ގެ ނަތީޖާ އިން އެއްވަރުވެއްޖެއެވެ.
ކުރީގެ މެންޗެސްޓާ ޔުނައިޓެޑްގެ ޑިފެންޑަރ ގެރީ ނެވިލް ވެލެންސިއާގެ މެނޭޖަރު ކަމާ ހަވާލުވިފަހުން މޮޅެއް ލިބިފައި ނުވާއިރު ތާވަލުގެ ތިން ވަނައިގައި އޮތް ވަރުގަދަ ރިއަލް މެޑްރިޑް އާ ދެކޮޅަށް ނިކުތުމަކީ ނެވިލް އަށް ލިބުނު ވަރުގަދަ ޗެލެންޖެކެވެ.
ދެފަހަރުވެސް ފަހަތުން އަރައި އެއްވަރު ކުރި މިމެޗުން ޕޮއިންޓެއް ލިބުމަކީ މެނޭޖަރަށް ލިބިގެން ދާނެ ހިތްވަރެކެވެ.
މެޗުގެ ފުރަތަމަ ގޯލު 16 ވަނަ މިނެޓުގައި ކާމިޔާބުކުރީ ބެންޒީމާ އެވެ. 45 ވަނަ މިނެޓުގައި ލިބުނު ޕެނަލްޓީއަކުން މެޗުގެ ނަތީޖާ ހަމަަހަމަ ކޮށް ދިނީ ވެލެންސިއާގެ ޑެނިއަލް ޕަރެހޯ އެވެ.
މެޗުގެ 69 ވަނަ މިނެޓުގައި ރިއަލް ގެ މަޓެއޯ ކޮވެކިކް ކުރި ފައުލަކާ ގުޅިގެން ރެފްރީވަނީ އޭނާ އަށް ރަތް ކާޑު ދައްކާ ދަނޑުން ފޮނުވާލާފައެވެ. މިމައްސަލައިގައި ރިއަލްގެ ކޯޗު ރަފާ ބެނިޓެޒް ވަނީ ހިތްހަމަ ނުޖެހުން ފާޅުކޮށްފައެވެ.
މެޗުގެ ފަހު 20 މިނެޓު 10 ކުޅުންތެރިންނާއެކު ކުޅުނު ރިއަލް މެޑްރިޑް ލީޑު ނަގާފައިވަނީ 82 ވަނަ މިނެޓުގައެވެ. ބޭލްގެ މިގޯލަށް ފަހު މިނެޓެއް ނުވަނީސް ގެރީ ނެވިލްގެ ޓީމު ވަނީ ގޯލު ޖަހައި މެޗުގެ ނަތީޖާ އަނެއްކާވެސް އެއްވަރު ކޮށްފައެވެ.
މިމެޗުން 3 ޕޮއިންޓު ނުލިބުމުގެ ސަބަބުން ރިއަލް މެޑްރިޑް އާ އެއްވަނައިގައި އޮތް އެތްލެޓިކޯ މެޑްރިޑް އާ ދެމެދު 4 ޕޮއިންޓުގެ ފަރަގެއް ވަނީ އުފެދިފައެވެ.