ސްޕެޝަލް އިކޮނޮމިކް ޒޯން (އެސްއީޒެޑް) ބިލްގެ މައިގަނޑު މަގުސަދަކީ އިންވެސްޓަރުންގެ ޝައުގުވެރިކަން ރާއްޖެއަށް އިތުރުކޮށް، ބޮޑެތި އިންވެސްޓްމަންޓްތައް ގާއިމުކުރުމެވެ. އިގްތިސޯދު ފުޅާކުރުމެވެ. އާ ޓެކްނޮލޮޖީ ނަކަލުކުރުމެވެ. ވަޒީފާ އިތުރުކޮށް، ރައްޔިތުންގެ ދިރިއުޅުމުގެ ފެންވަރު ރަނގަޅުކުރުމެވެ.
މިއީ އެސްއީޒެޑް އާއި ބެހޭގޮތުން ސަރުކާރުން މިހާތަނަށް ވާހަކަ ދައްކާފައިވާ ގޮތެވެ. ސަރުކާރަށް ތާޢީދު ކުރައްވާ ބޭފުޅުން ވެސް އެސްއީޒެޑަށް ތަޢުރީފް ކުރައްވައި ވާހަކަ ދައްކަވަމުން ވިދާޅުވެފައިވަނީ 'ސައްސައިގެން' ދާ ފަދަ ތަރައްޤީ ރާއްޖޭގެ އެކި ކަންކޮޅުތަކަށް އަންނާނެ ކަމަށެވެ.
ދެކުނުގައި އެސްއީޒެޑްގެ މައި ދޮރާއްޓަކަށް ވެގެން ދާނީ އައްޑޫ ކަމަށް ސަރުކާރުގެ އިސްވެރިން ވިދާޅުވެފައި ވި ނަމަވެސް އެ ބިލް ފާސްވެގެން ދިޔަތާ 495 ދުވަސް ވެގެންދާއިރު، އައްޑޫ އަށް އަދިވެސް އެސްއީޒެޑްގެ ދަށުން އެއްވެސް ޕްރޮޖެކްޓެއް އައިސްފައެއް ނުވެއެވެ.
އެސްއީޒެޑްގެ ދަށުން އައްޑޫގައި ރައްޔިތުންނަށް ފައިދާހުރި ޕްރޮޖެކްޓެއް ފެށިފައި ނުވި ނަމަވެސް ދައުލަތަށް އާމްދަނީ ލިއްބައިދޭނެ މަސައްކަތެއް އައްޑޫގައި ފެށުމަށް މިހާރު ގެންދަނީ ތައްޔާރުވަމުންނެވެ. އެއީ ޕާކިން ސްޓިކާ ޖެހުމެވެ.
މިހާތަނަށް ރާއްޖޭގައި ޕާކިން ސްޓިކާ ޖަހަމުން އަންނަނީ ހަމައެކަނި ވެރިރަށް މާލޭގައެވެ. މާލޭގައި ޤަވާއިދާ ޚިލާފަށް ޕާކް ކުރާ ފަރާތްތަކުގެ ވެހިކަލްތަކުގައި ސްޓިކާ ޖަހައިގެން ކޮންމެ އަހަރަކު ވެސް އެތައް މިލިޔަން ރުފިޔާއެއް ދައުލަތަށް ލިބެއެވެ.
އައްޑޫގައި ސްޓިކާ ޖެހުމުގެ މަސައްކަތް ފެށުމަށް ފުލުހުން ތައްޔާރު ވަމުން އަންނައިރު، އެއީ އަނެއްކާ ވެސް އޭގެ ސަބަބުން ދައުލަތަށް އިތުރު އާމްދަނީތަކެއް ލިބިގެންދާނެ ކަމެކެވެ. ފުލުހުންގެ އަތުގައި 3000 ޕާކިން ސްޓިކާ ހުރި ކަމަށް ކައުންސިލާއި އެއްކޮށް ބޭއްވި ބައްދަލުވުމެއްގައި ފުލުހުން ވަނީ ބުނެފައެވެ.
އެންމެ ފުރަތަމަ ފަހަރު ސްޓިކާ އަކަށް ދައްކަން ޖެހޭ -/250 ރުފިޔާގެ ރޭޓުން ބަލާ ނަމަ ސްޓިކާ ޖަހައިގެން ދައުލަތަށް -/750،000 ރުފިޔާގެ އާމްދަނީއެއް ލިބޭނެއެވެ.
ސްޓިކާ ޖަހައިގެން މިހާރު ވެސް ކޮންމެ އަހަރަކު ދައުލަތަށް އެތައް މިލިއަން ރުފިޔާއެއްގެ އާމްދަނީއެއް ލިބެމުން އަންނައިރު، އައްޑޫގައި ސްޓިކާ ޖަހަން ފެށުމަކީ އަނެއްކާވެސް ދައުލަތަށް އިތުރު އާމްދަނީ ލިބިގެންދާނެ ކަމެކެވެ.
އެކަށީގެންވާ ޕާކް ކުރާނެ ޖާގަތަކެއް ނެތި، ސްޓިކާ ޖަހަން ފެށުމަކީ ރައްޔިތުންނަށް އިތުރު ބުރައަކަށް ވެގެން ދާނެ ކަމެކެވެ. އެހެން ނަމަވެސް އެއީ ދައުލަތަށް އިޤްތިސާދީ ގޮތުން ފައިދާ ކުރާނެ ކަމެކެވެ. އިތުރު އާމްދަނީ ލިބޭނެ ކަމެކެވެ.
އެހެން ކަމުން ސްޓިކާ ޖެހުމަކީ، ހަވާ އެރުވުމުގެ ހަރަކާތްތަކާއި އެކު އިފްތިތާޙް ނުކުރި ނަމަވެސް އައްޑޫގައި ފަށާ 'ސިއްސައިގެން' ދާ ފަދަ އެސްއީޒެޑްގެ މަޝްރޫޢު އަށް ވުމަކީ އެކަށީގެންވާ ކަމެކެވެ.