ސްޕެނިޝް ލަލީގާގެ ބޮޑު ބާރު، ރިއަލް މެޑްރިޑް ގެ މެނޭޖަރު ކަމާއި ހަވާލުވިތާ އެންމެ 7 މަސް ފަހުން ރަފައެލް ބެނިޓޭޒް މަގާމުން ދުރުކޮށް، ކުރީގެ ފްރާންސް އަދި ރިއަލް މެޑްރިޑްގެ ތަރި ޒައިނެދީން ޒިދާން މަގާމަށް އިސްކޮށްފިއެވެ.
55 އަހަރުގެ ބެނިޓޭޒް މަގާމުން ދުރުކޮށްފައި ވަނީ އިއްޔެ މެޑްރިޑް އިން ބޭއްވި ބޯޑް މީޓިންގ އެއްގައެވެ.
ބެނިޓޭޒް މަގާމުން ދުރުކޮށްފައި ވަނީ އޭނާގެ މެނޭޖަރުކަމުގެ ދަށުން ކުޅުނު 25 މެޗުގެ ތެރެއިން 17 މެޗުން މޮޅުވެފައި ވަނިކޮށެވެ. 5 މެޗުން އެއްވަރުވެ 3 މެޗުން ބަލިވުމަކީ މަގާމުން ދުރުކުރަން އެންމެ އެކަށީގެންވާ ސަބަބުތޯ ގިނަ ބަޔަކު އަންނަނީ ސުވާލުކުރަމުންނެވެ.
ބެނިޓެޒް ގެ އިރުޝާދުގެ ދަށުން ރިއަލް ކުޅުނު އިރު ބަލިވެފައިވަނީ އެންމެ 3 މެޗުންނެވެ. އަދި އޭނާގެ އިސްކަމުގެ ކުރު މުއްދަތުގައި ފާހަގަ ކޮށްލެވޭ ނަތީޖާތަކަށް ބަލާއިރު މަލްމޯ އަތުން 0-8 ގެ ބޮޑު ނަތީޖާ އަކުން މޮޅުވުމާއި ރަޔޯ ވެލެކެނޯގެ 9 ކުޅުންތެރިންނާ ދެކޮޅަށް 2-10 ގެ މޮޅު ފާހަގަ ކޮށްލެވެއެވެ.
މީގެ އިތުރުން އަމިއްލަ ދަނޑުގައި ބާސާގެ އަތުން 0-4 ގެ ނަތީޖާ އިން ބަލިވި ބަލިވުންވެސް ރިއަލް ސަޕޯޓަރުންގެ ހަނދާނުން ފޮހެލަން ދަތި ހަނދާނަކަށް ވަނީ ވެފައެވެ.
ރިއަލް މެޑްރިޑްގެ ރައީސް ފްލޮރެންޓީނޯ ޕެރެޒް ވަނީ އޭނާގެ ބޯޑް ޑިރެކްޓަރުންގެ މި 'އުނދަގޫ' ނިންމުމަށް އަދި އެއްވެސް އެއްޗެއް ބުނެފައެއް ނޫނެވެ.
އެހެންނަމަވެސް ޕެރޭޒް ވަނީ ބެނިޓޭޒް އަކީ ފުޓުބޯޅައަށް ލޯބި ކުރާ ރަނގަޅު ކޯޗެއް ކަމަށް އެއްބަސް ވެފައެވެ.
ބެނިޓެޒް ގެ 'ނާކާމިޔާބީ' ފޫބައްދަން މަގާމު ހަވާލުކުރި ޒިދާން ބުނެފައިވަނީ މިފުރުސަތުގެ ބޭނުން ހެޔޮގޮތުގައި ހިފައި އޭނާއަށް ކުރެވެން އޮތް ހުރިހާ ކަމެއް ކުރާނެ ކަމަށެވެ.
ޒިދާން ގެ އިރުޝާދުގެ ދަށުން ރިއަލް ކުޅޭ ފުރަތަމަ މެޗު އޮންނާނީ ހޮނިހިރު ދުވަހު އަމިއްލަ ދަނޑުގައި ޑިޕޯޓިވޯ އާ ދެކޮޅަށެވެ.
43 އަހަރުގެ ވޯލްޑް ކަޕް ޗެމްޕިއަންކަން ހޯދައިފައިވާ ޒިދާން އަކީ ފްލޮރެންޓީނޯ ޕެރެޒް ރިއަލް ގެ ރައީސް ކަމުގެ 12 އަހަރުގެ މުއްދަތުގައި އެކުލަވާލި 11 ވަނަ ކޯޗެވެ.