ސިވިލް ސާވިސް ޓްރޭނިން އިންސްޓިޓިއުޓާއި އައްޑޫ ހައި ސްކޫލް ގުޅިގެން “އޭން އިވްނިން ވިތު ޕްރޮފެސަރު އުގައިލް” ގެ ނަމުގައި ބާއްވާ ހާއްސަ ލެކްޗަރ މާދަމާ ރޭ ޝަރަފުއްދީން ސްކޫލްގައި ބާއްވަން ނިންމައިފިއެވެ.
އާއްމުކޮށް ހުޅުވާލައިގެން ބާއްވާ މި ލެކްޗަރ ފެށުމަށް ހަމަޖެހިފައިވަނީ މާދަމާ ރޭ 8:30 އިން 10:00އަށެވެ.
މިއީ ހިތަދޫއަށް އުފަން ޕްރޮފެސަރ އުގައިލް އާއްމުކޮށް ހުޅުވާލައިގެން އައްޑުގައި ސައިންސާއި ޓެކްނޮލޮޖީ، ދުޅަހެޔޮ ސިއްހަތާއި އުންމީދީ ވިސްނުންތަކާއި ތަޖުރިބާތަކުން ފުރިގެންވާ ވާހަކަތައް ހިއްސާ ކުރުމަށްބާއްވާ މިފަދަ ފުރަތަމަ އޯޕަން ލެކްޗަރ އެވެ.
މި ލަކްޗާރގައި ބައިވެރިވާ ފަރާތްތަކުގެ ތެރެއިން އައިޑީ ކާޑް ގެންނަވާ ފަރާތްތަކަށް މިރޭ މާލޭ ދަރުބާރުގޭގައި އުގައިލް ނެރެދެއްވާ އެބޭފުޅާގެ އަމިއްލަ ސިއްހީ މައުލޫމާތުން ފުރިގެންވާ “ސިއްހީ ހަދިޔާ” ހިލޭ ބަހާ ގޮތަށް ވަނީ ހަމަޖެހިފައެވެ.
މި ފޮތް ބޭނުންފުޅުވާ ފަރާތްތަކަށް އޮންލައިންކޮށް ފޯމް ހުށަހެޅުއްވުމުގެ ފުރުސަތުވެސް ޕްރޮފެސާރ އުގައިލް ވަނީ މީގެ ކުރިން ހަމަޖައްސަވާފައެވެ.