އަންގާރަ ދުވަހުގެ ރޭ އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑް އާ މެންޗެސްޓާ ޔުނައިޓެޑް ބައްދަލު ކުރި މެޗު 3-3 ގެ ނަތީޖާއަކުން އެއްވަރުވެއްޖެއެވެ.
ނިއުކާސަލް ދަނޑުގައި ކުޅުނު މިމެޗުގެ 9 ވަނަ މިނެޓުގައި ލިބުނު ޕެނަލްޓީއަކުން މެންޗެސްޓާގެ ކެޕްޓަން ވޭން ރޫނީ ވަނީ ލީޑު ނަގާދީފައެވެ.
މެންޗެސްޓާ ޔުނައިޓެޑްގެ ކުޅުން ފަހަކަށް އައިސް ހުންނަ ގޮތުން މެޗުގެ ފުރަތަމަ ހާފުގައި، އަދި ފުރަތަމަ 10 މިނެޓު ތެރޭގައި ގޯލެއް ކާމިޔާބުވުމުން ގިނަ ބަޔަކު ވަނީ ހައިރާންވެފައެވެ.
ޕެނަލްޓީއަށް ފަހަށް، އެހެން މެޗު ތަކާއި ޚިލާފަށް މެންޗެސްޓާ ޔުނައިޓެޑް އިން ވަނީ އެޓޭކިންގ ގޭމެއް ކުޅެފައެވެ. ގޯލާ އަމާޒަށް ގިނަ ހަމަލާތަކެއް ނިއުކާސަލް ޑިފެންސަށް ބާރުބޮޑުވެފައި ވެއެވެ.
މެޗުގެ 38 ވަނަ މިނެޓުގައި ވޭން ރޫނީ ތަނަވަސްކޮށް ދިން ބޯޅައެއް ގޯލުގެ ތެރެއަށް ވައްދާލައިގެން މެން ޔުނައިޓެޑްގެ ޒުވާން ކުޅުންތެރިޔާ ޖެސީ ލިންގާޑް ވަނީ ޓީމަށް ލީޑު ފުޅާކޮށްދީފައެވެ.
ނަމަވެސް 42 ވަނަ މިނެޓުގައި ނިއުކާސަލްގެ ވިޖްނަލްޑަމް ވަނީ ޑޭވިޑް ޑެހެއާ މެންޗެސްޓާ ޔުނައިޓެޑަށް ކުޅުނު 200 ވަނަ މެޗުގައި އޭނާ ކޮޅަށް ގޯލެއް ކާމިޔާބުކޮށް މެޗުގެ ދިރުން އާކޮށް ޓީމަށް ހިތްވަރު ހޯދާދީފައެވެ.
ދެވަނަ ހާފުގައި މެން ޔުނައިޓެޑްގެ ޑިފެންޑަރ ކްރިސް ސްމޯލިންގ އަދި ނިއުކާސަލްގެ މިޓްރޮވިޗް އާ ދެމީހުން ޕެނަލްޓީ އޭރިއާ ތެރޭގައި ހިންގި ތަޅާފޮޅުމެއްގައި ރެފްރީ ވަނީ ނިއުކާސަލް އަށް ޕެނަލްޓީ އެއް ދީފައެވެ.
ޕެނަލްޓީ ކާމިޔާބުކޮށް މިޓްރޮވިޗް ވަނީ ނިއުކާސަލް އަށް މެޗުގެ ނަތީޖާ ހަމަހަމަ ކޮށްފައެވެ.
ނަތީޖާ ހަމަހަމަ ކުރުމަށްފަހު ނިއުކާސަލް އިން ވަނީ މެން ޔުނައިޓެޑްގެ ޑިފެންސަށް ބާރު ބޮޑުކޮށްފައެވެ. ފުލުފުލުގައި ކުރިއަށް ކުޅެ ޔުނައިޓެޑުގެ ޑިފެންސް ފޫ އަޅުވި ނަމަވެސް އިތުރު ގޯލެއް ކާމިޔާބެއް ނުކުރެވުނެވެ.
މީގެ ބަދަލުގައި މެންޗެސްޓާ ޔުނައިޓެޑް އިން ވަނީ ކައުންޓާ އެޓޭކުގައި ރަނގަޅަށް ކުޅެ މެޗުގެ ލީޑު އަނެއްކާވެސް ނަގާފައެވެ.
ނިއުކާސަލްގެ ދެ ކުޅުންތެރިން ގައިން ނައްޓުވާލައި މެމްފިސް ފޮނުވާލި ބޯޅަ ބްލޮކް ވުމުން ކެޕްޓަން ރޫނީ ފޮނުވާލި ބާރު ބޯޅަ ވަނީ ގޯލުގެ ކަނަށެވެ. މިގޯލަކީ ރޫނީ 2016 ވަނަ އަހަރުގައި ކުޅުނު 3 މެޗުން ކާމިޔާބު ކުރި 4 ވަނަ ގޯލެެވެ. މިދިޔަ އަހަރު އެންމެ އެދެވޭ ކުޅުމެއް ނުދެއްކުނު ނަމަވެސް ވޭން ރޫނީ އަށް އޭނާގެ ފޯމަށް އާދެވޭނެ ކަމުގެ އުއްމީދު ވަނީ ސަޕޯޓަރުންނަށް ލިބިފައެވެ.
79 ވަނަ މިނެޓުގައި ރޫނީގެ މިގޯލަށް ފަހު ނިއުކާސަލް އިން ވަނީ އަނެއްކާވެސް މެންޗެސްޓާ ޔުނައިޓެޑުގެ ޑިފެންސަށް ބާރު ބޮޑު ކޮށްފައެވެ. ނަތީޖާއެއްގެ ގޮތުން މެޗުގެ 90 ވަނަ މިނެޓުގައި ޕައުލް ޑަމެޓް ވަނީ ނިއުކާސަލްއަށް ދެވަނަ ފަހަރަށް މެޗުގެ ނަތީޖާ ހަމަހަމަ ކޮށްދީފައެވެ.
މެޗު ނިމުނީ 3-3 އިން އެއްވަރުވެ މެންޗެސްޓާ އަނެއްކާވެސް ތާވަލުގެ ދަށަށް ޖެހިގެންނެވެ.
މެޗުގައި ކާމިޔާބު ކުރެވުނު ގޯލުތަކުގެ އިތުރުން މެން ޔުނައިޓެޑްގެ ކުޅުންތެރިންނަށް ވަނީ ހުސް ފުރުސަތުތައް ލިބި ބޭކާރު ވެފައެވެ. އެގޮތުން ޖެސީ ލިންގާޑް، ރޫނީ އަދި ފެލައިނީ އަށް ލިބުނު ފުރުސަތުތައް ފާހަގަ ކޮށްލެވެއެވެ.
މެޗުން މޮޅު ނުވެވުމުން މެންޗެސްޓާ ޔުނައިޓެޑްގެ ސަޕޯޓަރުން މާޔޫސް ވި ނަމަވެސް އެހެން މެޗުތަކާ އަޅާ ބަލާއިރު ފޯރިގަދަ މެޗަކަށް ވީތީ ކުޅުންތެރިންނަށް ޝުކުރު އަދާކޮށްފައެވެ.