ސ. ހިތަދޫއަށް އުފަން އަދި ދިވެހި ހަމައެކަނި ސައިންސް ޕްރޮފެސަރ ޙަސަން ޢުޤައިލްގެ ކޮންސަލްޓެންސީ މޯލްޑިވްސް ޕޮލިސް ސާވިސްއަށް ހޯދުމާ ބެހޭގޮތުން މަޝްވަރާ ކޮށްފިއެވެ.
ކޮމިޝަނަރ އޮފް ޕޮލިސް އަޙްމަދު ޢަރީފް އާއި ޕްރޮފެސަރ ޙަސަން ޢުޤައިލް އާއެކު ބޭއްވި ބައްދަލުވުމުގައި ވަނީ ސައިންސާއި، ޓެކްނޮލޮޖީ އަދި ބައޯމެޓްރިކް ސައިންސް ގެ ބޭނުން ހިފައިގެން އުފައްދާ ޙައްލުތަކުގެ ޒަރީޢާއިން ފުލުހުންދޭ ޚިދުމަތްތައް ހަރުދަނާކޮށް އަވަސްކުރުމާއި، ޚަދަރުކުޑަ ނިޒާމްތައް ތަޢާރަފްކުރުމަށް ކުރެވެން ހުރި ކަންކަމާއި މެދު މަޝްވަރާކޮށްފައެވެ.
ޕްރޮފެސަރ ޢުޤައިލްގެ ކޮންސަލްޓެންސީ ހޯދައިގެން މަސައްކަތްތައް ކުރިޔަށް ގެންދާނެ އަދި ތަރައްޤީކުރާނެ ދާއިރާތަކަކާއި، ފުލުހުންގެ މުއައްސަސާއިން ކަނޑައަޅާ މުވައްޒަފުންނަށް ޙަސަން ޢުޤައިލުގެ އިރުޝާދުގެ ދަށުން ތަމްރީނު ދިނުމާއި ކަނޑައެޅޭ ކުދި ޕްރޮޖެކްޓްތަކެއް ކުރިއަށް ގެންދިއުމާ ބެހޭގޮތުންވެސް މި ބައްދަލުވުމުގައި މަޝްވަރާ ކުރެވުނެވެ.
މިއާއެކު ފޮރެންސިކް ދާއިރާ އާއި އައި.ސީ.ޓީ.ޑީ ދާއިރާ އަދި އިންޓެލިޖެންސްގެ ދާއިރާ ހަރުދަނާ ކުރުމުގެ ގޮތުން ކުރެވޭނެ ކަންކަން ބަލައި މުވައްޒަފުންނަށް ތަމްރީންނު ދެވިގެން މަސައްކަތްކުރުމަށް ގޮތްތަކެއް ކަނޑައެޅުމާ ބެހޭގޮތުންވެސް މަޝްވަރާ ކުރެވިފައި ވެއެވެ.
ޕްރޮފެޝަނަލް ޙަސަން ޢުޤައިލް ގެ ފަންނީ އެހީތެރިކަން ހޯދުމަށްޓަކައި ދެފަރާތުގެ މެދުގައި އެއްބަސްވުމެއް ޤާއިމް ކުރުމަށްވެސް މި ބައްދަލުވުމުގައި މަޝްވަރާ ކުރެވުނެވެ.