ޕްރެސިޑެންޓް ކަޕްގައި ވާދަކުރުމަށް ހިތަދޫ އައި ނިއުރޭޑިއަންޓް ސްޕޯޓްސް ކްލަބް ހިތަދޫގައި ތިބި ގެއަށް ދައްކަން ޖެހޭ ފައިސާ ނުދީ ފުރައިގެން ދިޔަ މައްސަލާގައި އެ ޓީމްގެ ޖެނެރަލް ސެކްރެޓަރީ އންވަރު އަލީ ހިތަދޫ ކޯޓަށް ހާޒިރުކޮށްފިއެވެ.
ނިއުރޭޑިއަންޓް ޓީމް ކުއްޔަށް ނެގި ހިތަދޫ ސްކައި އަހްމަދު ސައީދު (ސޮޑާ) ހުށަހެޅި މައްސަލާގައި މިއަދު ހެނދުނު 10:30ގައި ހިތަދޫ މެޖިސްޓްރޭޓް ކޯޓުގައި ކުރިއަށް ގެންދިޔަ ޝަރީއަތުގައި ކޯޓުން ވަނީ ވާހަކަ ދައްކައިގެން މައްސަލަ ހައްލު ކުރުމަށް 10 ދުވަހުގެ މުއްދަތެއް ދީފައެވެ.
މިއަދުގެ ޝަރީއަތުގައި އަންވަރު ބުނީ އޭނާ މުއާމަލާތް ކުރީ ނިއުރޭޑިއަންޓްގެ ފަރާތުން ކަމަށާއި، އެހެންވެ ދައުވާ ނިއު އާއި ދެކޮޅަށް ދައުވާ ކުރުމަށެވެ.
އަންވަރު މިގޮތަށް ބުނުމުން ގާޒީ އިބްރާހިމް ނަފީސް ވަނީ އަންވަރު އަކީ ނިއުގެ ކޮން ފެންވަރެއްގެ މީހެއްތޯ ސުވާލުކޮށްފައެވެ. އެ ސުވާލަށް ޖަވާބު ދެއްވަމުން އަންވަރު ބުނީ އޭނާއަކީ އެ ކްލަބްގެ ޖެނެރަލް ސެކްރެޓަރީ ކަމަށެވެ. ގަޒީ ނިންމެވީ އަންވަރު އާއި ދެކޮޅަށް ހުށަހެޅި ދައުވާ ކޯޓުގައި ކުރިއަށް ގެންދެވޭނެ ކަމަށެވެ. އަދި ވާހަކަ ދައްކައިގެން މައްސަލަ ހައްލުކުރުމަށް 10 ދުވަހުގެ ފުރުސަތު ދެއްވިއެވެ.
ނައުރޭޑިއަންޓް އައްޑޫއަށް އައުމަށް ފަހު ތިބޭނެ ތަނެއް ހަަމަޖެއްސުމަށް އަހްމަދު ސައީދު އާއި ވާހަކަ ދައްކައި ހުރިހާ މުވާމަލާތެއް ކުރީ އަންވަރު އަލީއެވެ. އަދި ފައިސާގެ ކަންކަން ހަމަޖެއްސުމަށް އަންވަރު އާއި ތަފާތު ފަހަރު މަތިން ވާހަކަ ދެއްކިކަމަށް އަހްމަދު ސައީދު ބުންޏެވެ.
މި މައްސަލާއިގެ ދެވަނަ އަޑުއެހުމެއް މި މަހުގެ 31 ވަނަ ދުވަހަށް ތާވަލްކޮށްފައިވާ ކަމަށް މައުލޫމާތު ލިބެއެވެ.