ވައިބާ މެދުވެރިކޮށް އަގުހެޔޮ ގޮތެއްގައި މުއާމަލާތް ކުރެވޭނެ އިންތިޒާމް އުރީދޫން ހަމަޖައްސައިފިއެވެ.
ރާއްޖޭގެ އެންމެ މަގްބޫލް މުވާސަލާތީ ކުންފުނި އުރީދޫން މިއަދު ތައާރަފްކުރި ހިދްމަތް ބޭނުން ކުރައްވައިގެން ވައިބާ މެދުވެރިކޮށް ހެޔޮއަގެއްގައި ވާހަކަ ދައްކައި، ސްޓިކާ، ފޮޓޯ ފޮނުވޭނެ ކަމަށް އެކުންފުނިން ބުންޏެވެ.
އެގޮތުން އުރީދޫން މިއަދު ވަނީ ވައިބާ ޕެކްތަކެއް ތައާރްފްކޮށްފައެވެ. އެއީ އެއް ދުވަހަށް ހާއްސަ "ވައިބާ ފަހެއް" ޕެކަކާއި، ފަސް ދުވަހަށް ބޭނުން ކުރެވޭ "ވައިބާ އެގާރަ" ޕެކޭޖެވެ.
އުރީދޫގެ ސީނިއާ އެގްޒެކެޓިވް ޕަބްލިކް ރިލޭޝަންސް ނޫރާ އިބްރާހިމް ޒާހިރު މިއަދު ވިދާޅުވީ ވައިބާ ފަހެއް ޕެކޭޖައް އުރީދޫން 5 ރުފިޔާ ޗާޖް ކުރާއިރު އެދުވަހު 30 އެމްބީގެ އެލެވެންސްއެއް ލިބޭނެ ކަމަށެވެ.
"ވައިބާ ފަހެއް އެއީ، އެއް ދުވަހަށް ހާއްސަ ޕެކެއް. އެ ދުވަސް ތެރޭ 30 އެމްބީގެ އެލަވަންސާއެކު ވައިބާ ބޭނުން ކުރެވޭނެ. ވައިބާ 11 ޕެކް މިއީ 5 ދުވަހަށް ލިބޭ ޕެކެޖްއެއް، މިޕެކޭޖް މެދުވެރިކޮށް ވައިބާ ބޭނުން ކުރުމަށް 80 އެމްބީގެ އެލަވަންސެއް ލިބޭއިރު ޗާޖް ކުރާނީ 11 ރުފިޔާ." ނޫރާ ވިދާޅުވި އެވެ.
އުރީދޫން ބުނީ ޑޭޓާ ޕެކޭޖާ ނުލައި މި ހިދްމަތް ޕްރީޕެއިޑް އަދި ޕޯސްޓްޕެއިޑް ކަސްޓަމަރުންނަށް ލިބިގެންދާއިރު ހިދުމަތް ބޭނުންނަމަ، "5" ނުވަތަ "11" ޖެހުމަށް ފަހު 555 އަށް މެސެޖް ކުރުމުން މި ހިދުމަތް ލިބޭނެ ކަމަށެވެ.