އަދާލަތު ޕާޓީގެ ރައީސް ޝައިޚް އިމްރާން އަބްދުﷲ މޭޑޭ މުޒާހަރާގައި ދެއްކެވި ވާހަކަތަކާ ގުޅިގެން ކުރިއަށް ގެންދާ ޝަރީއަތަކީ ވުޖޫދުގައި ނެތް މައްސަލައެއް ކަމަށް އެމްޑީޕީގެ ޗެއާޕާސަން އަލީ ވަހީދު ވިދާޅުވެއްޖެއެވެ.
ގިނަ އަދަދެއްގެ ރައްޔިތުން ބައިވެރިވި މޭޑޭ މުޒާހަރާގައި ޝައިޚް އިމްރާނާއި އެކު މުޒާހަރާގައި އިސްކޮށް ހަރަކާތްތެރިވި އެމްޑީޕީގެ ޗެއާޕާސަން އަލީ ވަހީދު މި ގޮތަށް ވިދާޅުވީ ހޯމަ ދުވަހު ހަވީރު ކުރެއްވި ޓްވީޓެއްގައެވެ.
އަލީ ވަހީދުގެ ޓްވީޓްގައި ވިދާޅުވެފައި ވަނީ ޝައިޚް އިމްރާނާއި ދެކޮޅަށް ދައުލަތުން ހިންގާ ޝަރިއްޔަތަކީ ވުޖޫދުގައި ނެތް މައްސަލައަކާ ގުޅުގެން ހިންގާ ބޮޑު އަނިޔާވެރި ޖަރީމާއެއް ކަމަށެވެ.
މޭޑޭ މުޒާހަރާގެ ތެރޭގައި އިމްރާން ދައްކަވާފައިވާ ވާހަކަތަކަކީ ޓެރަރިޒަމްގެ ގާނޫނުގައި ބުނެފައިވާ ފަދައިން ރައްޔިތުންގެ ހިތްތަކުގައި ބިރުވެރިކަން އުފެދޭ ގޮތަކަށް ދައްކަވާފައިވާ ވާހަކަތަކެއް ކަމަށާއި އެވާހަކަތަކުގެ ނަތީޖާއެއް ގޮތުން އެރޭ މާލޭގައި ހަމަ ނުޖެހުންތަކެއް ހިނގާ، ބައެއް މީހުންނަށް އަނިޔާވެފައިވާ ކަމަށް ދައުލަތުން ވަނީ ކޯޓުގައި ބުނެފައެވެ.