ބާވެ ހަލާކުވެފައިވާ މުސްޙަފުތައް އެއްކުރުމަށް ހާއްސަ މަސައްކަތްތަކެއް ކުރިއަށް ގެންދިއުމަށް ނިންމާފައިވާ ކަމަށް ހިތަދޫ ނޫރުލް އިސްލާމް ޖަމިއްޔާ އިން ބުނެފިއެވެ.
ނޫރުލް އިސްލާމްގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި، “ﷲ ގެ ފޮތަށް މާތްކޮށް ހިތުމުގެ މަޝްރޫއު” ގެ ނަމުގައި ކުރިއަށް ގެންދާ މަޝްރޫއު ފެށުމަށް ހަމަޖެހިފައި ވަނީ ހުކުރު ދުވަހު އެވެ. ނޫރުލް އިސްލާމުން ބުނީ މަޝްރޫއު އެންމެ ފުރަތަމަ ކުރިއަށް ގެންދާނީ ހިތަދޫގައި ކަމަށެވެ.
އެގޮތުން ހުކުރު ދުވަހު ހަވީރު 4:15-6:00 އަށް އަދި ރޭގަނޑު 8:15-10:15 އަށް ހިތަދޫ ބޮޑު މަގުގައި މިކަމަށް ހާއްސަ މޭޒެއް ބަހައްޓައިގެން މައުލޫމާތު ދިނުމާއި މުސްހަފުތައް އެއްކުރުމުގެ ހަރަކާތެއް ކުރިއަށް ގެންދަން ވަނި ރާވާފަ އެވެ.
ނޫރުލް އިސްލާމުން ބުނީ ހިތަދޫގައި މި މަޝްރޫއު ފެށުމަށް ފަހު، އައްޑޫގެ އެހެން އަވަށްތަކުގައި ވެސް ކުރިއަށް ގެންދަން ނިންމާފައިވާ ކަމަށެވެ.
“ﷲ ގެ ފޮތަށް މާތްކޮށް ހިތުމުގެ މަޝްރޫއު”އާއި ބެހޭ ގޮތުން އިތުރު މައުލޫމާތު ހޯއްދަވަން ބޭނުންފުޅުވާ ފަރާތްތަކުން އެ ޖަމިއްޔާގެ 9902900 އަދި 7636649 ނަންބަރު ފޯނަށް ގުޅުއްވުމަށް ނޫރުލް އިސްލާމް ޖަމިއްޔާއިން އެދެއެވެ.
" ބާވެފައިވާ މުސްހަފުތައް އެއްކުރުމުގެ މަޝްރޫއެއް ކުރިއަށް ގެންދަން ނިންމީ، ބައެއް މީހުން މުސްހަފުތަކަށް ދޭން ޖެހޭ ގަދަރާއި އިހުތިރާމް ކުޑަވާ ގޮތަށް އެކި ތަންތަނަަށް މުސްހަފުތައް އުކާލާފައި ހުންކަން ފާހަގަ ކުރެވޭތީ. ރަނގަޅު ގޮތުގައި މުސްހަފުތައް ނައްތާލަން އެހީތެރިވެ ބާރު އެޅުމުގެ ގޮތުން. "
އޮފިޝަލް ބުނިގޮތުގައި ވަކި ދުވަހެއް ޚާއްޞަކޮށްގެން މިކަން ކުރުމަށް ނިންމާފައިވަނީ މިފަހަކަށް އައިސް ކިރީތި ޤުރްއާނުގެ ގިނަ ޢަދަދެއްގެ ފޮތްތަކެއް ކުނިގޮނޑަށް އުކަމުން ގެންދާތީ ގޭގޭގައި ހުންނަ އެފަދަ ބާ ޚަތިމްތައް ރައްކާތެރިކަމާއެކު ނައްތާލުމުގެ ގޮތުންނެވެ.
ނޫރުލް އިސްލާމުން މައުލޫމާތު ދޭގޮތުގައި އައްޑޫ އިން އެއްކުރެވޭ ބާވެފައިވާ މުސްހަފުތައް ނައްތާލާނީ އިސްލާމިކް މިނިސްޓްރީގެ ލަފާގެ ދަށުންނެވެ.