ގައން ގަޔަށް އަރާ ނުރައްކާތެރި ބައްޔެއް ކަމަށްވާ ހެޕަޓައިޓިސް ސީ “ޖެހިފައިވާ” ބިދޭސީ ޑޮކްޓަރަކު ހިތަދޫ ރީޖަނަލް ހޮސްޕިޓަލްގައި މަސައްކަތް ކުރަމުންދާކަން 'އައްޑޫލައިވް' އަށް އެނގިއްޖެއެވެ.
ހޮސްޕިޓަލުގެ މުވައްޒަފަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި، ހޮސްޕިޓަލުގައި މަސައްކަތް ކުރާ ޕާކިސްތާން ޑޮކްޓަރަކަށް ހެޕަޓައިޓަސް ސީ ޖެހިފައިވާކަން ބައެއް ނަރުހުންނަށް އެނގިގެން، ބިދޭސީ ޑޮކްޓަރާ މެދު ފިޔަވަޅު އަޅައި، އޭނާ ހޮސްޕިޓަލުން ފޮނުވައި ދިނުމަށް މެނޭޖްމެންޓުގައި އެދިފައިވާ ކަމަށް ވެއެވެ.
'އައްޑޫލައިވް' އާއި ވާހަކަ ދެއްކި ހޮސްޕިޓަލުގެ ސީނިއާ މުވައްޒަފަކު ބުނި ގޮތުގައި އެހެން ނަމަވެސް ހޮސްޕިޓަލްގެ މެނޭޖްމަންޓުން ޑޮކްޓަރު ފޮނުވާލުމަށް ވަނީ ދެކޮޅު ހަދާފައެވެ.
ނުރައްކާތެރި ބައްޔެއް ޖެހިފައިވާ މީހަކު ހޮސްޕިޓަލްގައި މަސައްކަތް ކުރާ ނަމަ އޭގެ ސަބަބުން، ހޮސްޕިޓަލްގެ މުވައްޒަފުންނަށާއި ހޮސްޕިޓަލުން ހިދުމަތް ހޯދާ ބަލި މީހުން ވެސް ނުރައްކަލަށް ހުށަހެޅިފައިވާ ކަމަށް ބުނެ ހޮސްޕިޓަލުގެ މުވައްޒަފުން ގެންދަނީ ކަންބޮޑުވުން ފާޅުކުރަމުންނެވެ.
މައުލޫމާތު ލިބިފައިވާ ގޮތުގައި ޕާކިސްތާން ޑޮކްޓަރު މީހާ އައްޑޫ އިން ފުރުވާލަން މެނޭޖްމެންޓުން ދެކޮޅު ހަދާފައި ވަނީ ހޮސްޕިޓަލްގައި މި ވަގުތު ޑޮކްޓަރުން ތިބި އަދަދު މަދުވެގެންނެވެ.
ނަމަވެސް ދާދި ފަހުން ސަރުކާރު ކޯލިޝަނުން ބޭއްވި ޖަލްސާއެއްގައި ބުނެފައިވާ ގޮތުގައި އައްޑޫ ހޮސްޕިޓަލުގައި ހުރިހާ ބަލިތަކެއްގެ މަލްޓި ސްޕެޝަލިސްޓުން ވެސް ދަނީ ޚިދުމަތް ދެމުންނެވެ.
ހެޕަޓައިޓަސް ސީ ޖެހެނީ ކިހިނެތް؟
ޕަޓައިޓިސް ސީ (Hepatitis C) އަކީ ފުރަމޭ ނުވަތަ މޭގަނޑަށް ޖެހޭ ގައިންގަޔަށްއަރާ ވަރަށް ނުރައްކާތެރި ބައްޔެކެވެ.
ހެޕަޓައިޓިސް ސީ ޖެހޭގޮތްތައް:
– ބަލިޖެހިފައިވާ މީހެއްގެ ލޭ ސަލާމަތުންހުރި މީހެއްގެ ލޭގެތެރެއަށް ދިއުން (ލޭގެ ޒަރީޢާއިން) : މީގެ ތެރޭގައި ލޭއެޅުމާއި، ގުނަވަންތައް އިންދުމާއި، ރައްކާތެރި ނޫން ގޮތުގައި އިންޖެކްޝަން ، އިންޖެކްޝަން ކަށި ބޭނުންކުރުމާއި، އިންޖެކްޝަންގެ ޒަރީޢާއިން މަސްތުވާތަކެތި ބޭނުންކުރާއިރު އެކަކު ބޭނުންކޮށްފައިވާ ކައްޓާއި ސިރިންޖު އަނެކަކު ބޭނުންކުރުން ފަދަ ކަންތައްތައް ހިމެނެއެވެ. ލޭއަޅާއިރު ރަގަޅަށް ސްކްރީންކުރެވިފައި ނެތުމުން، ބަލީގެ ޖަރާސީމާއި ތަޣައްޔަރުވެފައިވާ ލޭއެޅުމަކީ ވެސް ބަލިޖެހޭ ކަމެކެވެ.
– ހެޕަޓައިޓިސް ސީ ޖެހިފައިވާ މައިމީހާގެ ފުށުން ވިހެއުމުގެ ތެރޭގައި ކުޑަ ދަރިފުޅަށް : މިއީ ކުޑަކުދިންނަށް ވަރަށް ނުރައްކާތެރި ބައްޔެކެވެ.
ހެޕަޓައިޓިސް ސީ ޖެހިފައިވާ މީހަކާއެކު ރައްކާތެރި ނޫން ގޮތަކަށް ޖިންސީގުޅުން ހިންގުމުން ނުވަތަ އަނބިފިރިވަންތަކަމުގެ ގުޅުންހިންގުން.
ބަލިޖެހިފައިވާ މީހާގެ ލޭ އުގުޅިފައިވާ ތަކެތި ނަގައިގެންގުޅުމުގެ ތެރޭގައި ދިމާވާ ހާދިސާ އަކުން ބަލިޖެހުން : ( މިސާލަކަށް ޞިއްޙީ މަސައްކަތްތެރިންގެ ތެރެއިން އޮޕަރޭޝަންކުރާ ޑޮކްޓަރުންނާއި، ނަރުހުންނާއި، ލެބޯޓްރީގައި މަސައްކަތްކުރާ މުއައްޒަފުންނަށް، މަސައްކަތުގެ ތެރޭގައި ދިމާވާ ހާދިސާ ތަކުގައި މިބަލިޖެހެއެވެ. ނޭގުމެއްގެ ތެރޭގައި ހެޕަޓައިޓިސް ސީ ޖެހިފައިވާ މީހަކަށް ފަރުވާކުރުމުގައި ބޭނުންކުރެވުނު ކަށްޓެއް ގަޔަށްހެރުމުގެ ސަބަބުންވެސް ބަލިޖެހިދާނެ އެވެ. އަދި އެފަދަ މީހެއްގެ އޮޕަރޭޝަނެއް ކުރުމުގެ ތެރޭގައި ބުރައިގެންދާ ލޭ ސަލާމަތުންހުރި މީހާގެ ލޮލަށް ވާޞިލްވި ނަމަވެސް ބަލިޖެހިދާނެއެވެ.
ބަލިމީހާ ބޭނުންކުރާ ތަކެތި އެހެންމީހަކު ބޭނުންކުރުން : މަދުން ނަމަވެސް ބަލިމީހާ ބޭނުންކުރާ ރޭޒަރު، ނިޔަފަތި ކަނޑާ ދަތި، އަދި ދަތް އުގުޅާ ބުރުސް ފަދަ ތަކެތި އެހެން މީހަކު ބޭނުންކޮށްފިނަމަ އެމީހަކަށް ބަލިޖެހުމަކީ ވެދާނެ ގޮތެކެވެ.
ހެޕަޓައިޓިސް ސީ ވައިރަސް އަކީ ، ގާތުންކިރުދިނުމާއި، ކާބޯތަކެތީގެ ޒަރީޢާއިންނާއި، އެކުގައި މަސައްކަތްކޮށް، ނުވަތަ އެއްގެއެއްގައި އުޅުމުގެ ސަބަބުން ގައިންގަޔަށް އަރާނެ ވައިރަހެއް ނޫނެވެ. ވުމާއެކު މިބަލި ޖެހިފައިވާ މީހަކާއި އެއްތަނެއްގައި މަސައްކަތްކުރުމާއި، އެއްތަނެއްގައި ކައިބޮއި ހެދުމަކީ ނުރައްކާތެރި ކަމެއް ނޫނެވެ.
ހެޕަޓައިޓިސް ސީ ޖެހުމުގެ ފުރުޞަތު ބޮޑު ފަރާތްތަކުގެ ތެރޭގައި އިންޖެކްޝަންގެ ޒަރީޢާއިން މަސްތުވާތަކެތި ނެގުމުގައި އެއްކަށްޓެއް ހިއްސާކުރާ ފަރާތްތަކާއި ހެޕަޓައިޓިސް ބީ ޖެހިފައިވާ މައިންނަށް ލިބޭ ތުއްތުކުދިން، ގިނަގިނައިން ލޭއަޅަންޖެހޭ ފަރާތްތައް އަދި މޭގަނޑުން އުފައްދާ އެންޒައިމްތައް ލޭގައި ގިނަވެފައިވާ ފަރާތްތަކާއި ޞިއްޙީ ދާއިރާގައި މަސައްކަތްކުރާ މީހުން ހިމެނެއެވެ.