ފިރިހެނުންގެ ތުނބުޅި އޮމާަންކޮށް ބޭލުމުގެ ބަދަލުގައި ތުނބުޅި ދިގުކޮށްފައި ބެހެއްޓުމަކީ އޭގެ ސަބަބުން ސިއްހަތަށް ފާއިދާކުރަނިވި ކަމެއް ކަމަށް ޢިލްމީ ދިރާސާއަކުން ދައްކައިފިއެވެ.
އެމެރިކާގެ ނެޝަނަލް ސެންޓަރ ފޯރ ބަޔޯޓެކްނޮލޮޖީ އިންފޮމޭޝަން އިން ޝާއިރުކޮށްފައިވާ ދަ ޖާނަލް އޮފް ހޮސްޕިޓަލް އިންފެކްޝަންގައި ބުނެފައިވާގޮތުން އެމް.އާރް.އެސް.އޭ ފަދަ ނުރައްކާތެރި ބެކްޓީރިއާތައް ތުނބުޅި އެއްކޮށް ބާލާފައިތިބޭ ފިރިހެނުންގެ ކިބައިން އުފުލުމުގެ ފުރުޞަތު ތުނބުޅި ދިގުކޮށްފައި ތިބޭ މީހުންނަށްވުރެ ތިންގުނަ ބޮޑެވެ.
މީގެއިތުރުން ތުނބުޅި އެއްކޮށް ބާލާފައިތިބޭ މީހުންގެ މޫނުގައި ނުރައްކާތެރި ހަމުގެ އިންފެކްޝަންތަކާއި، ނޭވާލާނިޒާމުގެ ބަލިތައް ޖައްސުވާ ބެކްޓީރިއާތައް ކޮލޮނީ ހަދައިގެން ތިބޭ ނިސްބަތް ތުނބުޅި ދިގުކޮށްފައިތިބޭ މީހުންނަށްވުރެ ދިހަ އިންސައްތަ ބޮޑުކަމަށް މި ދިރާސާގައި ބުނެފައިވެއެވެ.
މި ދިރާސާކުރި ސައިންސްވެރިން ބުރަވެވަޑައިގަންވާގޮތުގައި މިކަން މިހެން ދިމާވާންޖެހޭ ސަބަބަކީ ތުނބުޅި ބޭލުމުގެ ސަބަބުން މޫނުގެ ހަންގަނޑުގައި ނުރައްކާތެރި ބެކްޓީރިއާތައް އާލާވުމަށް މަގުފަހިވުމެވެ. އަދި ތުނބުޅިދިގުކޮށްފައި ބެހެއްޓުމުގެ ސަބަބުން ތުނބުޅީގައި އުފެދޭ ބެކްޓީރިއާތަކަކީ އާ އެންޓިބައޯޓިކް އަކަށް ތަރައްޤީ ކުރެވިދާނެ ބެކްޓީރިއާތަކެއް ކަމަށް ސައިންސްވެރިން ދެކެއެވެ.
މި ދިރާސާގައި 408 ހޮސްޕިޓަލެއްގެ ތުނބުޅި ދިގުކޮށްފައިތިބި މުވައްޒަފުންނާއި ތުނބުޅި ބާލާފައިތިބި މުވައްޒަފުން ބޭނުންކޮށްފައިވެއެވެ.
ޔުނިވާސިޓީ ކޮލެޖް ލަންޑަންގެ މައިކްރޯބައޮލޮޖިސްޓެއް ކަމުގައިވާ ޑރ.އެޑަމް ރޮބަޓްސް ވިދާޅުވީ ތުނބުޅީގައި އެކުލެވޭ ބެކްޓީރިއާ ބޭނުންކޮށްގެން އާ ވައްތަރެއްގެ އެންޓިބައޯޓިކް އެއް ތަރައްޤީ ކުރެވިދާނެ ކަމުގެ އުންމީދު ވަރަށްބޮޑުކަމަށެވެ. އަދި މިއީ މިހާރު ބޭނުންކުރަމުން އަންނަ ގިނަ އެންޓިބައޮޓިކް ތަކުން ކުރާއަސަރު އަވަސްމިނެއްގައި ދަށްވެ، އެންޓިބައޯޓިކް ރެސިސްޓެންޓް އިންފެކްޝަންތަކުގައި އަހަރަކު 700,000 މީހުން މަރުވަމުން ދާއިރު ވަރަށް އުފާވެރި ޚަބަރެއް ކަމަށް ޑރ.އެޑަމް ރޮބަޓްސް ދެކެވެ.