ދިވެހި މުޖްތަމަޢުގައި ހިނގަމުންދާ ގާނޫނާއި ޚިލާފުކަންތަކާމެދު، ފާޅުގައި އަޑުއުފުލައި ހިތްވަރާއިއެކު ސާބިތުކަމާއިއެކު ވާހަކަ ދައްކަމުންދާތީ ސަރުކާރުން ބޭނުންވަނީ ޝެއިޚް އިމްރާން އަބްދުﷲގެ އަޑު ކަނޑުވާލައި އެމަނިކުފާނު މުޖްތަމަޢް އާއި އެކަހެރިކުރަން ކަމުގައި އެމްޑީޕީ އިން ބުނެފިއެވެ.
އެމްޑީޕީން ހޮނިހިރު ދުވަހު ނެރުނު ނޫސްބަޔާނެއްގައި ބުނެފައި ވަނީ ޝެއިޚު އިމްރާން އަބްދުއްﷲގެ މައްޗަށް ކުރާ ދައުވާއަކީ އިންސާފުން އެއްކިބާވެ، ޤާނޫން އަސާސީގެ 32 ވަނަ މާއްދާގައިވާ އެއްވެއުޅުމުގެ މިނިވަންކަން ނިގުޅައިގަތުމަށް ރައީސް އަބްދުއްﷲ ޔާމީން ރާވައިގެން ކުރިއަށްގެންދާ ހީލަތްތެރި މަސައްކަތެއް ކަމަށެވެ.
ދިވެހިރާއްޖޭގައި ހިނގަމުންދާ ކަންތައްތަކާމެދު އެމީހަކަށްފެންނަ ހިޔާލުފާޅުކުރުމާއި، އަދި އިޙްތިޖާޖުކުރުމަކީ ކޮންމެމީހަކަށްވެސް ލިބިގެންވާ ޙައްގެއް ކަމަށްވާހިނދު، ވެރިކަމުގައި ހުންނަވާ ބޭފުޅަކު ގާނޫނުން ބޭރުން، ހިންގަވާ ކަންތަކާއި، ހައްގެއްނެތި މީހުން ހައްޔަރުކޮށް، ސިޔާސީ ދައުވާތައް އުފުލުމާއި، ދިވެހި ދައުލަތުގެ ތެރޭގައި ހިނގާ ގާނޫނާޚިލާފު ކަންތަކުގެ ވާހަކަދައްކާ ކޮންމެ މީހެއްގެ މައްޗަށް ދައުވާއުފުލާ، އެމީހަކަށާއި އެމީހެއްގެ އާއިލާއަށް ބިރުދައްކާ މުޖްތަމަޢައުން އެއްކިބާކޮށް ޖަލަށް ލާން ކުރާ މަސައްކަތް އެޕާޓީން ކުށްވެރިކުރާ ކަމަށް ވެސް އެމްޑީޕީގެ ބަޔާނުގައި ވަނީ ބުނެފައެވެ.
ޝެއިޚު އިމްރާންގެ މައްޗަށް އުފުލާފައިވާ ދައުވާގެ ބޭނުމަކީ ސަރުކާރުގެ ވެރިޔަކަށް ހުންނަ ބޭފުޅަކު ކުރައްވާ ޣައިރު ގާނޫނީ ކަންތަކުގެ ވާހަކަ ދައްކާ އަދި އިޙްތިޖާޖުކުރާ ކޮންމެ ދީނީ ޢިލްމުވެރިޔަކަށް ބިރުދެއްކުމާއި އެކަހެރިކުރުމާއި އަނިޔާވެރިވުންކަން ހާމަވެގެންދާ ކަމެއް ކަމަށް ވެސް އެމްޑީޕީ އިން ވަނީ ބުނެފައެވެ.
އެމްޑީޕީގެ ބަޔާނުގައި އިތުރަށް ބުނެފައިވާ ގޮތުގައި ސަރުކާރާއި ޚިޔާލުތަފާތު ކޮންމެ ދީނީއަދި ސިޔާސީ ފަރާތްތަކުގެ މައްޗަށް ދައުވާއުފުލައި އަނިޔާވެރިވުމަށް މަސައްކަތްކުރަމުންދާތަން ފެންނަމުންދާކަމަށެވެ.
ޝެއިޚު އިމްރާންގެ މައްޗަށް އުފުލާފައިވަނީ ގާނޫނީ އެއްވެސް ހުއްޖަތެއްނެތި ހަމައެކަނި ދީނީއިލްމުވެރިންނަށް ބިރުދެއްކުމުގެ ނިޔަތުގައި އުފުލާފައިވާ ދައްވާއެއް ކަމަށާއި އެހެންވެ، އިމްރާން ދޫކޮށްލުމަށް ވެސް އެމްޑީޕީގެ ބަޔާނުގައި ގޮވާލައިފަ އެވެ.