ކްރިމިނަލް ކޯޓުގައި ޝެއިޚް އިމްރާންގެ މައްސަލަ ބައްލަވާ ގާޒީ ބާރީ އަންގަވައިގެން ކަމަށް ބުނެ އިމްރާނުގެ ޝަރީއަތުގެ އަޑުއެހުންތަކަށް ސީއެންއެމުގެ ނޫސްވެރިން ނުވަންދަން ނިންމައިފިއެވެ.
'އައްޑޫލައިވް' އަށް އެނގިފައިވާ ގޮތުގައި އިމްރާންގެ މައްޗަށް އުފުލާފައިވާ ޓެރަރިޒަމުގެ ދައުވާގައި މިއަދު އޮތް އަޑުއެހުމަށް ސީއެންއެމުގެ ނޫސްވެރިޔާ ނަން ނޯޓް ކޮށްފައި ވި ނަމަވެސް އަޑުއެހުމަށް ނަންނޯޓުކޮށްފައިވާ އެންމެން ކޯޓުރޫމަށް ވެއްދިއިރުވެސް ސީއެންއެމްގެ ނޫސްވެރިއާ ވައްދާފައެއް ނުވެއެވެ.
ސީއެންއެމް އިން ބުނެފައިވާ ގޮތުގައި ކޯޓު ރޫމަށް ނުވެއްދި ސަބަބު ހޯދަން އެދުމުން ކޯޓު އޮފިސަރު ވިދާޅުވީ އެއީ މައްސަލަ ބައްލަވާ ގާޒީ އަބުދުލް ބާރީ ޔޫސުފު އެންގުމަކަށް ސީއެންއެމް އިމްރާނުގެ މައްސަލައަށް ނުވަންދަން ނިންމީ ކަމަށެވެ.
އިދިކޮޅު ފަރާތްތަކުން މިދިޔަ އަހަރުގެ މެއި މަހުގެ އެއްވަނަ ދުވަހު ކުރި މުޒާހަރާއާއި ގުޅިގެން އެރޭގެ ވަގުތެއްގައި އަދާލަތު ޕާޓީގެ ރައީސް އިމްރާން އަބުދުﷲ ވަނީ ހައްޔަރުކޮށްފައެވެ. ފުލުހުންގެ ބެލުމުގެ ދަށުގައި ހުންނަވާތާ 97 ދުވަސްފަހުން އިމްރާން ގޭ ބަންދަށް ބަދަލުކޮށްފައިވަނީ މިދިޔަ އޮގަސްޓު މަހުގެ ފަސް ވަނަ ދުވަހުއެވެ.
މިދިޔަ ހަފުތާއާއި ހަމައަށް އެ މައްސަލައިގެ މާގިނަ އަޑުއެހުންތަކެއް ބައްވާފައެއް ވެސް ނުވެއެވެ.
ނަމަވެސް ކުއްލިގޮތަކަށް މައްސަލަ ބައްލަވާ ދެ ގާޒީއަކު ޗުއްޓީގައި ތިއްބަވަނިކޮށް މައްސަލަ ތާވަލުކޮށް އެންމެފަހުން ބެންޗު އުވާލާ މައްސަލަ ބެލުން ގާޒީ އަބުދުލް ބާރީ ޔޫސުފާއިވަނީ ހަވާލުކޮށްފައެވެ.
އެއާއި އެކު އިމްރާންގެ ޝަރީޢަތް ހަލުވި ކަމާއި އެކު ކުރިއަށް ގެންދާއިރު ވަކި މުއްދަތެއްގެ ތެރޭގައި އެ މައްސަލާގައި ގޮތެއް ނިންމަވަން ގާޒީ ކަނޑައަޅުއްވައިގެން ހުންނެވިކަން ދޭހަވާ ކަމަށް ގިނަ ބަޔަކު ގެންދަނީ ބުނަމުންނެވެ.