އިނގިރޭސި ޕްރިމިއާ ލީގުގައި ލިވަޕޫލް އާއި ނޯވިޗް ސިޓީ ބައްދަލުކުރި މެޗު ފޯރިގަދަ ކުޅުމަކަށްފަހު ލިވަޕޫލް 4-5 ގެ ނަތީޖާ އަކުން މޮޅުވެއްޖެއެވެ. މެޗުގެ ފުރަތަމަ ގޯލު 19 ވަނަ މިނެޓުގައި ރޮބާޓް ފިރްމީނޯ ޖަހައި ލީޑުނަގާފައިވަނިކޮށް ނޯވިޗް ސިޓީއިން ވަނީ ފަހަތުން އަރައި ތިން ލަނޑުޖަހައިފައެވެ.
ފުރަތަމަ ހާފު ނިމިފައިވަނީ 1-2 ގެ ނަތީޖާ އަކުން ނޯވިޗް ކުރީގައި އޮވެގެންނެވެ. ދެވަނަ ހާފު ފެށިގެން ލިވަޕޫލްގެ ޑިފެންޑަރ އަލްބާޓޯ މޮރޭނޯ ކުރި ފައުލް އަކާއި ގުޅިގެން ނޯވިޗް އަށް ވަނީ ޕެނަލްޓީއެއް ލިބިފައެވެ. ޕެނަލްޓީ ކާމިޔާބުކޮށް މެޗުގެ ނަތީޖާ 1-3 އަށް ވެފައި ވަނިކޮށް ލިވަޕޫލްގެ ކެޕްޓަން ޖޯޑަން ހެންޑަސަން ވަނީ ދެ މިނެޓުފަހުން މެޗުގެ ނަތީޖާ 3-2 އަށް ހަދާފައެވެ.
63 ވަނަ މިނެޓުގައި ފިރްމީނޯ މެޗުގެ ނަތީޖާ ހަމަހަމަކޮށްފައި ވަނިކޮށް ނޯވިޗްގެ ޑިފެންސް ލައިނުން ފަހަތަށް ކުޅުނު ބޯޅައެއް ޖޭމްސް މިލްނާވަނީ ހޯދައި ލިވަޕޫލް އަށް މެޗުގެ ލީޑު ދެވަނަ ފަހަރަށް ނަގާދީފައެވެ.
މެޗުގެ 90 މިނެޓު ހަމަވެގެން އިތުރު ވަގުތުގެ ގޮތުގައި ލިބުނު 5 މިނެޓު ތެރޭގައި ނޯވިޗް އިން ވަނީ އިތުރު ގޯލެއް ޖަހައި ނަތީޖާ އެއްވަރުކޮށްފައެވެ. ނަމަވެސް މެޗުގެ ފުރިހަމަ ވަގުތު ހަމަވުމުގެ ކުރިން ލިވަޕޫލްގެ އެޑަމް ލަލާނާ ވަނީ ގޯލެއް ޖަހައި މެޗު ކާމިޔާބުކޮށްފައެވެ.
ލިވަޕޫލް މިހާރު އޮތީ ތާވަލުގެ 7 ވަނައިގައެވެ.
ރޭގައި މެންޗެސްޓާ ޔުނައިޓެޑް އަދި ސައުތްހެމްޕްޓަން ކުޅުނު މެޗު 0-1 ގެ ނަތީޖާ އަކުން ސައުތްހެމްޕްޓަން ކާމިޔާބުކޮށްފިއެވެ. މެންޗެސްޓާ ޔުނައިޓެޑް ގެ ދަނޑު އޯލްޑް ޓްރެފޯޑްގައި ކުޅުނު މިމެޗުގެ ފުރަތަމަ ހާފު އާދައިގެ މަތިން ނިމިފައިވަނީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހިއެވެ.
ދެވަނަ ހާފުގައިވެސް މާބޮޑު ކުޅުމެއް ދެ ޓީމަށްވެސް ނުކުޅެވުނު ނަމަވެސް މެޗުގެ 87 ވަނަ މިނެޓުގައި ޗާލީ އޯސްޓިންގެ ސައުތްހެމްޕްޓަންގެ ފުރަތަމަ މެޗު އަދި މި ސީޒަނުގައި ޕްރިމިއާ ލީގުގެ ފުރަތަމަ މެޗުގައި ގޯލެއް ޖަހައި ސައުތްހެމްޕްޓަން ވަނީ މެޗުން މޮޅުވެފައެވެ.
ލެސްޓާ ސިޓީ އަދި ސްޓޯކް ސިޓީ ބައްދަލު ކުރި މެޗު ލެސްޓާ އިން ވަނީ ކާމިޔާބުކޮށް ތާވަލުގެ އެއްވަނައަށް އަރާފައެވެ. 0-3 ގެ ނަތީޖާ އަކުން ލެސްޓާ މޮޅުވި މިމެޗުގެ ފުރަތަމަ ގޯލު ޖަހާފައިވަނީ ޑްރިންކްވޯޓާއެވެ. ދެވަނަ ގޯލު ވާޑީ ކާމިޔާބުކޮށްފައިވާއިރު ތިން ވަނަ ގޯލު ކާމިޔާބުކޮށްފައިވަނީ އުލޮއާއެވެ.
މެންޗެސްޓާ ސިޓީ އާއި ވެސްޓް ހެމް ބައްދަލު ކުރި މެޗު އެއްވަރުވެ ލިބުނު ޕޮއިންޓާއެކު އެމީހުން މިހާރު ވަނީ އާސެނަލް އަށް ވުރެ އެއް މެޗު އިތުރަށް ކުޅެ ކުރި އަރާފައެވެ. ނަމަވެސް ރޭގެ މެޗުން މޮޅު ނުވެވުމުގެ ސަބަބުން ސިޓީ ކުރީގައި އޮތީ ގޯލުގެ ތަފާތުންނެވެ. 2-2 ގެ ނަތީޖާއަކުން އެއްވަރުވި މިމެޗުގައި ސާޖިއޯ އެގުއޭރޯ ވަނީ ސިޓީގެ ދެ ގޯލުވެސް ކާމިޔާބުކޮށްދީފައެވެ.
މިރޭ އާސެނަލް ނިކުންނާނީ އަވައްޓެރި ޗެލްސީ އާ ދެކޮޅަށެވެ. މިމެޗުން އާސެނަލް މޮޅުވެއްޖެނަމަ ގޯލުގެ ތަފާތުން އެއްވަނައަށް ދިއުމުގެ ފުރުސަތު ބޮޑެވެ. މިމެޗު ކުޅޭނީ ރާއްޖެ ގަޑިން މިރޭ 9:00 ގައެވެ.