ސ .ފޭދޫ ފިހާރައަކާ ގުޅިގެން ފޭދޫ މެޖިސްޓްރޭޓް ކޯޓަށް ހުށަހެޅުނު މައްސަލައެއްގައި އެފިހާރަ ދަޢުވާކުރި ފަރާތާ ޙަވާލުކުރުމަށް ދަޢުވާރައްދުވި ފަރާތަށް އަންގާ އަމުރުކޮށް ކޮށްފައިވާ ޙުކުމް ހައިކޯޓު ދެކުނުގޮތްޕަށް އިސްތިޢުނާފަށް ހުށަހަޅާފައިވަނިކޮށް ފޭދޫ މެޖިސްޓްރޭޓް ކޯޓުން ޙުކުމް ތަންފީޒުކުރުވައިފިއެވެ.
'އައްޑޫލައިވް' އަށް އެނގިފައިވާގޮތުގައި "ޔުނިސްޓައިލް" ފިހާރަ ހުސްކޮށް ސ.ފޭދޫ އަސުރުމާގެ މަރިޔަމް ޝާހިބާއާ ޙަވާލުކުރުމަށް ފޭދޫ ކޯޓުން ކުރިޙުކުމް ދެކުނު ހައިކޯޓަށް ބަލައިގެން ރަޖިސްޓްރީ ވެސް ކުރިފަހުން ފޭދޫ މެޖިސްޓްރޭޓްކޯޓުން މިދިޔަ ބުރާސްފަތި ދުވަހު ކޯޓުގެ ރަސްމީގަޑި ވެސް ނިމުނު ފަހުން ދަޢުވާލިބޭ ސ.ފޭދޫ އާޒާދުގެ އިބްރާހީމް ޒާދީގެ ޣައިރު ޙާޟިރުގައި ޙުކުމް ތަންފީޒުކުރުމުގެ މައްސަލަ ވަނީ ނިންމާފައެވެ.
ޙުކުމް ތަންފީޒުކުރުމުގެ މައްސަލަ ނިންމާފައިވާއިރު އެ ޙުކުމުގައި އެފިހާރަ 12 ގަޑިއިރު ތެރޭގައި ހުސްކޮށް މަރިޔަމް ޝާހިބާއާ ތަން ޙަވާލުކުރުމަށް ފުލުހުންގެ މައްޗަށް އަމުރު ނެރެފައިވެއެވެ. އެ އަމުރާ އެއްގޮތަށް ފުލުހުންވަނީ އެ ފިހާރަ ހުސްކުރުވައިފައެވެ.
ދަށު ކޯޓުގެ ޙުކުމެއް އިސްތިޢުނާފްކޮށްފިނަމަ ޙުކުމް ތަންފީޛުކުރުން ކުރިއަށް ގެންގޮސްގެން ނުވާނެކަމަށް ސުޕްރީމް ކޯޓުން މީގެކުރިން ނިންމާފައިވާއިރު ފޭދޫ މެޖިސްޓްރޭޓް ކޯޓުން އެ މައްސަލައިގެ ތަންފީޒުކުރުން ކުރިއަށްގެންގޮސްފައިވަނީ އެ މައްސަލަ އިސްތިޢުނާފްކޮށްފައިވާކަން އެކޯޓަށްވެސް އަންގާފައިވަނިކޮށް ކަމަށް މަޢުލޫމާތުލިބެއެވެ.
މައުލޫމާތު ލިބިފައިވާ ގޮތުގައި އިސްތިޢުނާފްގެ އެކި ލިޔުންތައް ހައި ކޯޓަށް ފޮނުވާފައިވަނީވެސް ފޭދޫ މެޖިސްޓްރޭޓް ކޯޓު މެދުވެރިކޮށެވެ.
އިބްރާހީމް ޒާދީގެ ޣައިރު ޙާޟިރުގައި ފޭދޫ ކޯޓުންމިދިޔަ ބުރާސްފަތި ދުވަހު ރަސްމީގަޑިވެސް ނިމުނުފަހުން ޙުކުމް ތަންފީޛުކުރުމަށް ނެރުނު އަމުރާ ގުޅިގެން ދަށު ކޯޓުގެ ޙުކުމް ތަންފީޛުކުރުން ހުއްޓުވުމަށް ވަގުތީ އަމުރެއް ހޯދުމަށް ޒާދީގެ ފަރާތުން ދެކުނު ހައިކޯޓަށް ހުށަހެޅިނަމަވެސް އެރޭ ހައި ކޯޓުން އެ އަމުރު ނެރުއްވާފައެއްނުވެއެވެ.
ނަމަވެސް ހައި ކޯޓުގެ ދެކުނު ގޮފިން ވަނީ އިއްޔެގެ ވަގުތެއްގައި ދަށު ކޯޓުގެ ޙުކުމް ތަންފީޛުކުރުން ފަސްކުރުމަށް އަމުރެއްނެރުއްވާފައެވެ. އެ އަމުރު ނެރުނުއިރު ފުލުހުން ވަނީ އެ ފިހާރަ ހުސްކުރުވައި ސ.ފޭދޫ އަސުރުމާގެ މަރިޔަމް ޝާހިބާއާ ފިހާރަ ޙަވާލުކުރުވައިފައެވެ.
ފޭދޫ ކޯޓުގެ ޙުކުމް ހައިކޯޓުގައި އިސްތިޢުނާފްކޮށްފައިވަނިކޮށް އެ ޙުކުމް ތަންފީޒުކުރުމުގެ މައްސަލަ ފޭދޫ ކޯޓުގައި ހިންގަވާފައިވަނީ އެ ކޯޓުގައި މިހާރު މަސައްކަތްކުރައްވަމުން ގެންދަވާ ޖުޑީޝިއަލް ވަފްދުގައި ހިމެނިވަޑައިގަންނަވާ ވ.އަތޮޅުގެ މެޖިސްޓްރޭޓެއް ކަމަށްވާ ރާޤިބުކަމަށް މަޢުލޫމާތުލިބެއެވެ.
ރާޤިބު އަކީ އޭނާ ޝަރީޢަތް ކުރިއަށް ގެންދަވާގޮތާއި ނިންމަވާ ބައެއް ނިންމުންތަކާ ގުޅިގެން ބައެއް މީހުން ހިތްހަމަނުޖެހުން ފާޅުކުރަމުންދާކަމާއި އެގޮތުން އޭނާގެ ބައެއް ޝަކުވާތައްވެސް ބައެއް އިދާރާތަކަށް ހުށަހަޅާފައިވާކަމަށް މަޢުލޫމާތުލިބެއެވެ.
މީގެ އިތުރުން ކުއްލިއްޔަތުލް ދިރާސާތުލް އިސްލާމިއްޔާ އިން 2010 ވަނަ އަހަރު ހިންގި ޑިޕްލޮމާ ކޯހެއްގައި، ރާޤިބު ޓެސްޓް ޕޭޕަރު ކޮޕީކުރި މައްސަލައެއް ވެސް ވަނީ ފެންމަތިވެފައެވެ.