ފުލުހުންނަށް ބޯހިޔާވަހިކަން ފޯރުކޮށްދިނުމަށް ހިންގާ މަޝްރޫއުގެ ދަށުން 30 މާރޗް 2013 ވަނަ ދުވަހު ބިންގާ އެޅި 300 ފްލެޓް ލިބުނު ފަރާތްތަކަށް އިސްކަންދަރު ބިލްޑިންގައި އޮތް ރަސްމިއްޔާތެއްގައި 2013 ވަނަ އަހަރުގެ ސެޕްޓެމްބަރ މަހުގެ ތެރޭގައި ފްލެޓް ލިބިފައިވާކަމުގެ ލިޔުން ވަނީ ހަވާލުކޮށްފައެވެ. ލިޔުން ހަވާލުކުރި ތާރީޚުން ފެށިގެން އެތައް ދުވަހެއް ފާއިތުވެގެން ގޮސްފައިވީނަމަވެސް، ލިބިފައިވާ ފްލެޓް ތަކުގައި ދިރިއުޅެވޭނެ ތާރީޚެއް އެނގޭނެ ގޮތެއް ނެތުމުން ފްލެޓް ލިބިފައިވާ ވަރަށް ގިނަފަރާތްތަކެއްވަނީ ކަންބޮޑުވުން ފާޅުކޮށްފައެވެ.
ފުލުހުންގެ ކޯޕަރޭޓިވް ސޮސައިޓީ (ޕޮލްކޯ)ގެ ދަށުން ހިންގާ މި މަޝްރޫއަކީ ކުރިންބުނެފައިވާ ގޮތުގައި ދައުލަތުގެ ބަޖެޓުން އެއްވެސް ހަރަދެއް ނުކޮށް ކުރިއަށް ގެންދާ މަޝްރޫއެކެވެ. އޭރު ފުލުހުންގެ އިސް ފަރާތްތަކުން ވިދާޅުވެފައިވަނީ ފްލެޓްތަކުގައި ގިނަވެގެން ދެ އަހަރު ދުވަހު ތެރޭގައި ދިރިއުޅެވޭނެ އިންތިޒާމް ހަމަޖެހިގެން ދާނެކަމަށެވެ.އެގޮތުން ވެފައިވާ އެގްރީމެންޓުގެ ދަށުން ޑިސެމްބަރ 2015 ގެ ނިޔަލަށް ފްލެޓްތައް ހަވާލުކުރަންޖެހެއެވެ. ނަމަވެސް ބިންގާއެޅި ފަހުން 3 އަހަރާއި ގާތްވެފައިވާއިރުވެސް އިމާރާތްކުރުމުގެ މަސައްކަތް ކުރިއަށްދާތަނެއް ނުފެނެއެވެ.
ޕޮލްކޯގެ ފަރާތުން ރާއްޖޭގެ ބައެއް މީޑިޔާތަކަށް ކުރިން މައުލޫމާތު ދީފައިވާގޮތުން ފްލެޓް އެޅުމުގެ މަސައްކަތް ކުރިއަށް ގެންދިއުމަށް އޭރު ނިންމާފައިވަނީ އަމިއްލަ ފަރާތެއް ކަމަށްވާ ނޫމަޑި ރިޒޯޓްސް އެންޑް ރެސިޑެންސް އާއި ގުޅިގެންނެވެ. ނަމަވެސް އެކުންފުންޏާއި ގުޅިގެން މަސައްކަތް ކުރިއަށް ގެންދިއުމަށް ނިންމާފައިވަނީ ކޮން އުޞޫލަކުން ކަމާއި، އިއުލާންކުރެވިގެން އެންމެ ރަނގަޅު ހުށަހެޅުމެއް ހުށަހަޅާ ކުންފުންޏަކާއި ހަވާލުކުރުމުގެ ބަދަލުގައި އެގޮތަށް ވަކި ކުންފުންޏަކާއި ހަވާލުކުރުމަށް ނިންމާފައިވަނީ ކީއްވެގެން ކަމެއް ހާމަކޮށްފައިނުވެއެވެ. މިކަމާއި ގުޅިގެން އޭރުވެސް ވަރަށް ގިނަ ފަރާތްތަކެއް ސުވާލު އުފެއްދިއެވެ.
ޕޮލްކޯ އިން ހިންގާ މި މަޝްރޫޢަކީ އަމިއްލަ ފައިނޭންސްގައި ކުރިއަށްގެންދިއުމަށް ނިންމާފައިވާ މަޝްރޫއަކަށް ވިޔަސް، މައުލޫމާތު ލިބިފައިވާގޮތުން ފްލެޓް ލިބިފައިވާ ފަރާތްތަކުން ޕޮލްކޯއަށް ވަނީ 21 މިލިއަނަށްވުރެ ގިނަ ރުފިޔާ ޑައުންޕޭމެންޓުގެ ގޮތުގައި ދައްކާފައެވެ. އަދި ސަރުކާރުންދޭ އެހީގެ ގޮތުގައި ލިބިފައިވާ 30 މިލިއަން ރުފިޔާ އާއިއެކު ޖުމްލަ 51 މިލިއަން ރުފިޔާ ފުލުހުންގެ ކޯޕަރޭޓިވް ސޮސައިޓީ (ޕޮލްކޯ) އަށް ދައްކާ ނިމިފައިވާތާ އެތައް ދުވަހެއް މިހާރުވަނީ ވެފައެވެ.
މީގެ އިތުރުން ސަރުކާރުން ޓުއަރިސްޓް ރިސޯޓެއް ތަރައްޤީކުރުމަށް ޕޮލްކޯއަށްދީފައިވާ ފަޅުރަށެއް ވިއްކައިގެން ލިބިފައިވާ 24 މިލިއަނަށްވުރެ ގިނަ ރުފިޔާވެސް މި ހައުސިން ޕްރޮޖެކްޓަށް ޚަރަދުކުރުމަށް ނިންމާފައިވެއެވެ. އެހެންކަމުން މިހާތަނަށް ޕޮލްކޯއަށް ހަމައެކަނި ފްލެޓްތައް ތަރައްޤީ ކުރުމަށް 75 މިލިއަނަށްވުރެ ގިނަ ރުފިޔާގެ ބަޖެޓެއް ލިބިފައިވާކަމަށް އައްޑޫލައިވް އާ މައުލޫމާތު ހިއްޞާކުރި ފަރާތުން ހާމަކޮށްފައިވެއެވެ.
އައްޑޫލައިވް އަށް މައުލޫމާތު ލިބިފައިވާގޮތުން ފްލެޓް އެޅުމުގެ މަސައްކަތް ނޫމަޑި ރިޒޯޓްސް އެންޑް ރެސިޑެންސް އާއި ހަވާލުކުރުމުން، އެފަރާތުން ކޮންސްޓްރަކްޝަން މަސައްކަތް ކުރުމަށް ހަވާލުކުރި ކުންފުންޏަށް ދައްކަންޖެހޭ ފާއިސާ ދައްކާފައި ނުވުމުގެ ސަބަބުން މަސައްކަތްވަނީ އެއްކޮށް ހުއްޓިފައެވެ. އަދި މިދިޔަ ޑިސެމްބަރު މަހުގެ ތެރޭގައި އެއްކޮށް މަަސައްކަތް ނިމިފައި ހުންނަންޖެހޭ ފްލެޓްތަކުގެ ފައުންޑޭޝަންވެސް އެއްކޮށް ނިމިފައިނުވެއެެވެ.
ފުލުހުންގެ ތެރެއިން ފްލެޓް އެވޯޑްކޮށްފައިވާ ފަރާތްތަކާއި އެކު އެގްރީމެންޓު ކުރެވިގެން ވަކި މުއްދަތެއްގެ ތެރޭގައި ފްލެޓް ހަވާލުކުރުމަށް އެއްބަސްވެފައި، އެކަން އެގޮތަށް ނުވުމުން ގިނަ ފުލުހުންވަނީ މިހާރު ނުރުހުން ފާޅުކުރަންފަށާފައެވެ. މިގޮތުން ފްލެޓާއި ގުޅިގެން މައުލޫމާތު ހިއްސާކުރުމަށް ހަދާފައިވާ ވައިބާރ ގްރޫޕުގައި ފުލުހުންގެ އިސްވެރންނަށާއި ޕޮލްކޯގެ އިސްވެރިންނަށް އަމާޒުކޮށް ބައެއް ފުލުހުން ނުރުހުން ފާޅުކޮށްފައިވާ ސްކްރީން ޝޮޓްތަކެއްވަނީ އައްޑޫލައިވް އަށް ލިބިފައެވެ.
ބައެއް ފަރާތްތަކުން ފާހަނގަކޮށްފައިވާގޮތުން ފްލެޓްގެ އަގުގެ ވިހި އިންސައްތަ ރުފިޔާ އެޑްވާންސްކޮށް ނަގައިގެން މަސައްކަތް ކުރިއަށް ނުދާންވީ ސަބަބެއް ނެތްކަމަށާއި، އެމީހުން ޕޮލްކޯއަށް ދެއްކި ފާއިސާ އަމިއްލަ ފަރާތަކަށް ދައްކައިގެން ފްލެޓެއް ހޯދަން އުޅުނުނަމަ ލިބިފައި ހުންނާނެކަމަށް ބުނެފައިވެއެވެ. އަދި ފަހަރަކު މީހަކު ފަހަރަކު ތާރީޚެއް ދެމުން އަންނަކަމަށާއި، ނަމަވެސް މަސައްކަތް އެއްވެސް ވަރަކަށް ކުރިއަށްނުދާކަމަށް ބުނެފައިވެއެވެ.
މިކަމާއި ގުޅިހެން ޕޮލްކޯ އާއި ފުލުހުންގެ ބައެއް އިސްވެރިން ގްރޫޕުގައި އެހެން ފުލުހުންނަށް ނަސޭހަތްތެރިވެ ވިދާޅުވެފައިވަނީ ކެތްތެރިވުމަށާއި، މިއަހަރު ފެބްރުއަރީމަހު މަސައްކަތް ފެށިގެން ދާނެކަމަށް އުންމީދު ކުރާ ކަމަށެވެ. އަދި ބައެއް ފަރާތްތަކުން ލިބުނު ގެއްލުމުގެ ބަދަލު ހޯދުމަށް ދަޢުވާކުރާނެ ކަމުގެ އިންޒާރުވެސް ވަނީ ދީފައެވެ.
ފުލުހުންގެ ބައެއް ވެރިންވަނީ ވައިބާރ ގްރޫޕުގައި ހިތްހަމަނުޖެހުމެއް އުޅޭނަމަ ކަމާބެހޭ ފަރާތްތަކަށް ހުށަހަޅައިގެން ކުރިއަށް ގެންދިއުމަށްވެސް ބުނެފައެވެ. މިކަމާއި ގުޅިގެން ބައެއް ފަރާތްތަކުން ވައިބާ ގްރޫޕުގައި މި މައްސަލަ ތަޙްޤީޤުކުރުމަށް އޭ.ސީ.ސީ އަށް ހުށަހަޅާފައިވާކަމަށްވެސް ބުނެފައިވެއެވެ