ރައީސުލްޖުމްހޫރިއްޔާ އަބްދުﷲ ޔާމީން މިއަދު މެންދުރު އައްޑޫއަށް ވަޑައިގަންނަވާއިރު އެމަނިކުފާނުގެ އިސްތިޤްބާލަށް ގަން އެއާޕޯޓަށް ދިއުމަށް މަޖުބޫރު ކުރަމުންދާ ކަމަށް ބުނެ ފެނަކަ އަދި އެޗްޕީއެލްގެ މުވައްޒަފުން ކަންބޮޑުވުން ފާޅުކުރަމުން އެބަދެއެވެ.
'އައްޑޫލައިވް' އާއި ވާހަކަ ދައްކަމުން ފެނަކަ ކޯޕަރޭޝަނުން ހިންގާ އައްޑޫ އިންޖީނުގޭގައި މަސައްކަތް ކުރާ މުވައްޒަފަކު ބުނީ، ރައީސް ވަޑައިގަންނަވާއިރަށް އެއާޕޯޓަށް ދާން ޖެހޭނެ ކަމަށާއި ސަރުކާރު ކުންފުންޏެއް ކަމުން ސަރުކާރަށް އެއްބާރުލުން ދިނުމަށް މުވައްޒަފުން ދިއުމަކީ އެންމެ އެކަށީގެންވާ ގޮތް ކަމުގައި ވެރިން އަންގާފައިވާ ކަމަށެވެ.
" ސުޕަވައިޒަރު އެންގީ ދާންޖެހޭނެ ކަމަށް. ސަރުކާރު ކުންފުންޏެއް ވީމަ ޖެހެއޭ އެއްބާރުލުން ދޭން. ހިތަދޫގައި ހުންނަ ފެނަކަ ސޭލްސް ސެންޓަރު މުވައްޒަފުންނަށް ފޯނުން ގުޅާފައި އެންގީ ދާން ޖެހޭނެ ކަމަށް "
ފެނަކަ ކޯޕަރޭޝަނުގެ އައްޑޫ އޮފީހުގެ އިސްބޭފުޅަކު ނަން ހާމަނުކުރުމަށް ޝަރުުތުކޮށް އައްޑޫލައިވް އާޢި ވާހަކަ ދައްކަމުން ބުނީ، އެއްވެސް މުވައްޒަފަކަށް މަޖުބޫރުކޮށްފައި ނުވާނެ ކަމަށާއި ނަމަވެސް، ދިއުމަކީ އެންމެ އެދެވޭ ކަމެއް ކަމުގައި އަންގާފައިވާނެ ކަމަށެވެ. ރައީސް ވަޑައިގަންވާއިރަށް ސަރުކާރު ކުންފުނި ތަކުގެ މުވައްޒަފުން ދާން ޖެހޭނެ ކަމަށް ޤަބޫލުކުރާ ކަމަށް ވެސް އޭނާ ބުންޏެވެ.
އެޗްޕީއެލްގެ މުވައްޒަފުންނަށް މާދަމާ ރައީސް ވަޑައިގަންނަވާއިރަށް އެއާޕޯޓަށް ދިއުމަށް މަޖުބޫރުކޮށްފައިވާ ކަމަށް "އައްޑޫަލައިވް' އާއި ވާހަކަ ދެއްކި ބައެއް މުވައްޒަފުން ވަނީ ބުނެފައެވެ. ނަމަވެސް ސީނިއާ ބައެއް މުވައްޒަފުން އެވާހަކަތައް ދޮގު ކުރެއެވެ. އެމީހުން ބުނާގޮތުގައި އަންގާފައި ވަނީ ދާން ބޭނުން މީހަކު ޑިއުޓީ އިން ވީއްލައި ދޭނެ ވާހަކަ ކަމަށެވެ.
މިކަމާއި ގުޅޭ ގޮތުން އެޗްޕީއެލްގެ އެސިސްޓެންޓް މެނޭޖަރ މުހައްމަދު ރަޝީދުގެ ބަހެއް ހޯދާލުމަށް އައްޑޫލައިވް އިން ކުރި މަސައްކަތް ވަނީ ކާމިޔާބުވާގޮތް ނުވެފައެވެ.