ރާއްޖޭގައި ހިނގާ ޚަބަރުތައް ގެނެސްދޭ އޮންލައިން ނޫހެއް ކަމުގައިވާ "ސީއެންއެމް" ނޫހުގައި މަޝްހޫރު ވިޔަފާރިވެރިޔާ، އަދި މޯލްޑިވްސް އެސޯސިއޭޝަން އޮފް ކޮންސްޓްރަކްްޝަން އިންޑަސްޓްރީ (މަސީ)ގެ ރައީސް މުހައްމަދު އަލީ ޖަނާހް (ޖަނާ)ގެ ހިއްސާ ސަރުކާރުގެ ޕްރެޝަރާއި ހެދި އޭނާ ދޫކޮށްލައިފިއެވެ.
ކޮންސްޓްރަކްޝަން ދާއިރާގައި އިސްކޮށް ހަރަކާތްތެރިވާ ޖަނާ "ސީއެންއެމް" ނޫހުގެ ހިއްސާ ދޫކޮށްލާފައިވާ ކަން 'އައްޑޫލައިވް' އަށް ވަނީ ކަށަވަރުވެފައެވެ.
މައުލޫމާތު ލިބިފައިވާ ގޮތުގައި ސަރުކާރުގެ ތެރޭގައި ހިނގާފައިވާ ބޮޑެތި ކަރަޕްޝަން މައްސަލަތައް ރައްޔިތުންނާއި ހަމައަށް "ސީއެންއެމް" އިން ގެނެސްދޭތީ ސަރުކާރުން ދަނީ ޖަނާއަށް ބޮޑެތި ޕްރެޝަރުތައް ކުރިމަތި ކުރުވަމުންނެވެ.
މައުލޫމާތު ލިބޭ ގޮތުގައި ސަރުކާރުގެ ތެރެއިން ޖަނާއަށް ބޮޑެތި މަޝްރޫއުތަކެއް ވަނީ ހުށަހަޅާފައެވެ. ޖަނާގެ ހިއްސާ ދޫކޮށްލުމަށް އެންމެ ބޮޑަށް ބާރު އެޅުއްވީ ސީދާ ރައީސް ޔާމީންކަމަށް ވަނީ މައުލޫމާތު ލިބިފައެވެ.
ޖަނާ "ސީއެންއެމް" ގެ ހިއްސާ ދޫކޮށްލާފައި ވާއިރު ބިލްޑް އެންޑް ހޯމް އެކްސްޕޯ ހުޅުއްވައި ދެއްވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ދިވެހިރާއްޖޭގެ އިގްތިސާދު މިހާރު އޮތީ ރަނގަޅު ޓްރެކްގައި ކަމަށާއި ކޮންސްޓްރަކްޝަން އިންޑަސްޓްރީ އަށް ބޮޑެތި ކުރިއެރުންތައް ލިބެމުން އަންނަ ކަމަށް ވިދާޅުވެ ސަރުކާރަށާއި ރައީސް ޔާމީން އަށް ވަރަށް ބޮޑަށް ތަޢުރީފްކޮށް ވަނީ ވާހަކަ ދައްކާފައެވެ.
ދާދި ފަހުން ހައި ކޯޓުގައި ކުރިއަށް ގެންދިޔަ ޝެއިހް އިމްރާންގެ ޝަރީއަތަށް "ސީއެންއެމް"ގެ ނޫސްވެރިން ނުވެއްދުމަށް ފަނޑިޔާރު އަބްދުލް ބާރީ ޔޫސުފް ވަނީ ނިންމަވާފައެވެ.