އަންގާރަވިލޭރޭ ތިނަދޫ އިންޖީނުގޭގައި ހިނގި އަލިފާނުގެ ހާދިސާގައި އަނދައި ހުލިވި ހާދިސާއަށްފަހު ރައްޔިތުން ހޭދަކުރަމުން ދަނީ ވަރަށް ހިތްދަތި ވަގުތުތަކެވެ. މުޅި ރަށް ހުއްޓުމަކަށް އައިސް ރައްޔިތުންނަށް އުފުލަން ޖެހިފައި ވަނީ ކުރިން ހީވެސް ކުރެވިފައި ނެތް ބުރައަކާއި އުނދަގުލެކެވެ.
އެހެން ނަމަވެސް ތިނަދޫ ރައްޔިތުންގެ ކިބައިން ފެންނަމުން ދަނީ އެކުވެރިކަމާއި އެއްބައިވަންތަކަމެވެ. ތިނަދޫގެ ރައްޔިތުން ބުނާގޮތުގައި ހިތްދަތި ވަގުތުތަކެއް ހޭދަކުރަމުން ދިޔަ ނަމަވެސް ރަށުގެ ރައްޔިތުން އެކަތިގަނޑަކަށް ވެގެން ތިބުމަކީ، ލިބޭ ވަރަށް ބޮޑު ހިތްހަމަޖެހުމެކެވެ.
އެގޮތުން މިއަދުގެ ހުކުރު ނަމާދަށް ހާޒިރުވި ތިނަދޫ ރައްޔިތުންގެ އަދަދު ގިނަކަން ފާހަގަކޮށްލެވެއެވެ.
ތިނަދޫ ސްކޫލްގައި މަސައްކަތް ކުރާ ޓީޗަރަކު، 'އައްޑޫލައިވް' އާއި ވާހަކަ ދައްކަމުން ބުނިގޮތުގައި، ފަހުގެ ތާރީޚެއްގައި އެރަށުގެ އެންމެ ގިނަ ބަޔަކު ހުކުރު ނަމާދަށް ދިޔަ ދުވަހަށް މިއަދު ވެގެން ދާނެ ކަމަށެވެ.
" އެހެން ހުކުރު ދުވަސްތަކާއި ޚިލާފަށް ވަރަށް ގިނަ ބަޔަކު މިއަދު ހުކުރަށް ދިޔަ. ވަރަށް އުފާވެރި މަންޒަރެއް މިއަދު މިފެނުނީ. ﷲ އަށް ޙަމްދުކުރަން"
ގދ.ތިނަދޫގައި 3 މިސްކިތެއްގައި ހުކުރު ނަމާދު ކުރާއިރު، މިއަދު އެ 3 މިސްކިތަށް ވެސް މިއަދު ގިނަ އަދަދެއްގެ ބަޔަކު ގޮސްފައިވާކަން ފާހަގަކޮށްލެވެއެވެ.
ތިނަދޫ މަސްވެރިޔަކު ބުނި ގޮތުގައި ތިނަދޫ އިން މިއަދު ފެނުނީ، އުފާވެރި މަންޒަރެއް ކަމަށާއި، ހުރިހާ އެންމެން ވެސް ހުކުރު ނަމާދުން ފޭބުމަށް ފަހު ސަލާމް ކުރަމުން ދިޔަ މަންޒަރު ފެނިފައި ތިނަދޫގެ ކޮންމެ ރައްޔިތެއްގެ ލޮލުން ވެސް ކަރުނަ ހިލިގެން ދާނެ ކަމަށެވެ.
" މިއީ ވަރަށް އުފާވެރި މަންޒަރެއް. މިސްކިތުން ފައިބައިގެން އެކަކު އަނެކަކަށް ސަލާމް ކުރަމުން ދިޔަ މަންޒަރު ފެނިފައި ރޮވުނު އުފަލުން. މުސީބާތުގެ ވަގުތުގައި އެކަންޏެއް ނޫން ﷲ ހަދުމަކުރަންވީ."