އައްޑޫގެ ތަރައްޤީއަށް ވަރަށް ގިނަ ޕްލޭންތަކެއް ކޮންމެ އަހަރަކު ވެސް ދައުލަތުގެ ބަޖެޓުގައި ހިމަނައެވެ. އެހެން ނަމަވެސް އަހަރު ނިމި އަނެއްކާވެސް އިތުރު ބަޖެޓެއް ފާސްކުރަން ޖެހުމާއި ހަމައަށް އެ މަޝްރޫޢުތަކެއް ނުފެށެއެވެ. މިކަން ވެފައިވަނީ އައްޑޫ ރައްޔިތުންގެ ވަރަށް ބޮޑު ކަންބޮޑުވުމަކަށެވެ.
އައްޑޫއަށް ނިސްބަތްވާ ރައްޔިތުން އެމީހުން ނިސްބަތްވާ ދާއިރާގެ މަޖިލިސް މެންބަރުންގެ ގާތުގައި އެންމެ ގިނައިން ކުރާ ޝަކުވާ އަކީ ވެސް އެއީއެވެ. ނިސްބަތްވާ ޕާޓީގެ ގޮތުން ބައެއް ފަހަރަށް މަޑުޖެހިފައިވާ މަޝްރޫޢުތަކުގެ ވާހަކަ ދައްކަން ބައެއް މެންބަރުން ބޭނުމެއް ނުވެއެވެ. އެބޭފުޅުން މަސައްކަތަކަށް ވެފައި އޮންނަނީ ސަރުކާރު ދިފާއުކުރުމެވެ.
މަޖިލިސް މެންބަރުންގެ މަސްއޫލިއްޔަތަކީ، ސަރުކާރު ޒިންމާދާރު ކުރުވުމާއި ރައްޔިތުންނަށް ބޭނުންވާ ކަންކަން ފަހިކޮށްދިނުމެވެ.
އެގޮތުން ރައްޔިތުންގެ މަޖިލީހުގެ މިދިޔަ އަހަރުގެ ދައުރުގައި ވެސް އައްޑޫގެ ތަރައްޤީއާއި ގުޅުން ހުރި ކަންކަމުގައި ވަޒީރުންނާއި ސުވާލުކުރުމަށް މަޖިލީހަށް ހުށަހަޅާފައި ވެއެވެ.
އައްޑޫ މީދޫ ދާއިރާގެ މެންބަރު ރޮޒެއިނާ އާދަމްގެ ފަރާތުން ވަޒީރުންނާއި ސުވާލުކުރުމަށް ހުށަހެޅި ނަމަވެސް ދައުރު ނިމިގެން ދިޔައިރު ވެސް އެ ސުވާލުތަކަށް ޖަވާބު ދެއްވުމަށް އެއްވެސް ވަޒީރަކު މަޖިލީހަށް ހާޒިރުވެފައެއް ނުވެއެވެ. ނުވަތަ މަޖިލީހުން އެ ވަޒީރުން ހާޒިރުކޮށްދީފައެއް ނުވެއެވެ.
ރައްޔިތުންގެ ޝަކުވާތައް އިތުރުވުމާއި ގުޅިގެން ރޮޒެއިނާ ވަނީ އަނެއްކާ ވެސް އައްޑޫގައި ކުރިއަށް ގެންދަން ނިންމި ނަމަވެސް ހުއްޓިފައިވާ މަޝްރޫޢުތަކާއި ބެހޭ ގޮތުން ދެ ވަޒީރަކާއި ސުވާލުކުރުމަށް އެދި ހުށަހަޅާފައެވެ.
މައުލޫމާތު ލިބިފައިވާ ގޮތުގައި ފެބްރުއަރީ މަހުގެ 4 ވަނަ ދުވަހު މަޖިލީހުގެ މިއަހަރުގެ ދައުރުގެ ޖަލްސާތައް ފެށުމުގެ ކުރިން ހެލްތު މިނިސްޓަރު އިރްތިޝާމާ އާދަމާއި އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރަށް މަޖިލީހުގެ އިދާރާއިން ވަނީ ނޯޓިސް ފޮނުވާފައެވެ. ދެ ވަޒީރުންނަށް މަޖިލީހަށް ހާޒިރުވުމުގެ ނޯޓިސް ފޮނުވާފައި ވަނީ މިމަހުގެ 26 ވަނަ ދުވަހުއެވެ.
ރޮޒެއިނާ ވަޒީރުންނާއި ސުވާލު ކުރުމަށް ހުށަހަޅާފައިވާ ކަންތައް:
– އައްޑޫ ސިޓީގައި 100 އެނދުގެ ހޮސްޕިޓަލް އެޅުން ލަސްވާ ސަބަބު ސާފުކުރުމަށް.
– ސ.މީދޫގައި އަޅާނެ ކަމަށް ސަރުކާރުން ބުނެފައިވާ މިސްކިތުގެ މަސައްކަތް ނުފެށި ލަސްވާ ސަބަބު.
ސ. މީދޫގައި މިސްކިތެއް އެޅުމަށް 2014 އަދި 2015 ވަނަ އަހަރުގެ ބަޖެޓުގައި ހިމަނާފައި ވެއެވެ. ނަމަވެސް މިހާތަނަށް އެ މިސްކިތް އެޅުމުގެ އެއްވެސް މަސައްކަތެއް ކުރިއަށް ގެންގޮސްފައި ނުވާކަން ފާހަގަކޮށްލެވެއެވެ.
މީގެ އިތުރުން އައްޑޫގައި އަޅާނެ ކަމަށް ބުނާ 100 އެނދުގެ ހޮސްޕިޓަލްގެ ޑިޒައިންކޮށް ނިމިފައިވާއިރު، ދާދި ފަހުން ސަރުކާރުން ވަނީ މިވަގުތަށް އެ ހޮސްޕިޓަލް އެޅުމުގެ މަޝްރޫޢު "މަޑުޖައްސާލާފައި" ވާކަމަށް ބުނެފައެވެ. އެގޮތަށް ހާމަަކުރުމަށް ފަހު އަނެއްކާވެސް މި މަހުގެ 27 ވަނަ ދުވަހު އައްޑޫ ރައްޔިތުންނާއި ބައްދަލުކުރައްވައި ރައީސް ޔާމީން ވަނީ، ހިތަދޫ ރީޖަނަލް ހޮސްޕިޓަލް ރަނގަޅު ފެންވަރަކަށް ތަރައްގީ ކުރަން ބޭނުންވާ ޖާގަ އެތަނުގައި ނެތް ކަމަށް ވިދާޅުވެފައެވެ.
އެމަނިކުފާނު ވިދާޅުވެފައިވާ ގޮތުގައި، ސަރުކާރުން މަސައްކަތް ކުރަނީ، އީސީސީ ހޮސްޕިޓަލަކަށް ބަދަލުކުރުމަށެވެ.
ބަޖެޓު ނެތިގެން ކަމަށް ބުނެ އައްޑޫގައި ހިންގަން ސަރުކާރުން ވަޢުދުވެފައިވާ ގިނަ މަޝްރޫޢުތަކެއް ހުއްޓިފައިވާއިރު، އެކަން ދިމާވާން ޖެހޭ ސަބަބު ބަޔާންކުރުމަށް ސަރުކާރުގެ ވަޒީރުން ފަސްޖެހުމަކީ ރައްޔިތުން ބަލައިގަންނާނެ ކަމެއް ނޫނެވެ.
ސުވާލަކީ، މަޖިލީހުގެ މިދިޔަ އަހަރުގެ ދައުރުގައި ވެސް ރައްޔިތުންގެ ފަރާތުން މީދޫ ދާއިރާގެ މެންބަރ ރޮޒެއިނާ އާދަމް ހުށަހެޅުއްވި ސުވާލުތަކަށް ޖަވާބު ދެއްވުމަށް މަޖިލީހަށް ވަޑައިގަންނަވާނެ "ގަޓު" ވަޒީރުންގެ ކިބައިގައި އެބަހުންނެވި ތޯއެވެ.