2011 ވަނަ އަހަރުގެ ސާކް ސަމިޓަށް އައްޑޫގައި ބިނާކުރި، ކޮންވެންޝަން ސެންޓަރު ހޮސްޕިޓަލަކަށް ބަދަލުކުރުމުގެ މަސައްކަތް މިއަހަރުގެ ތެރޭގައި ފަށާނެ ކަމުގެ ޔަޤީންކަން ރައީސް ޔާމީން ދެއްވާފައިވާކަން 'އައްޑޫލައިވް' އަށް އެނގިއްޖެއެވެ.
ނަން ހާމަނުކުރުމަށް ޝަރުތުކޮށް 'އައްޑޫލައިވް' އާއި ވާހަކަ ދެއްކި ޕީޕީއެމްގެ އޮފިޝަލަކު ބުނި ގޮތުގައި ރައީސް އެގޮތަށް ވިދާޅުވެފައި ވަނީ މި މަހުގެ 27 ވަނަ ދުވަހު އައްޑޫ ސިޓީއަށް ކުރެއްވި ދަތުރުފުޅުގައި އައްޑޫގެ ބައެއް ރައްޔިތުންނާއި އެކު ބޭއްވި ބައްދަލުވުމެއްގައެވެ.
އޮފިޝަލް ބުނި ގޮތުގައި ހިތަދޫ ރީޖަނަލް ހޮސްޕިޓަލް ތަރައްގީކުރަން ސަރުކާރުން ނިންމި ނަމަވެސް ރަނގަޅު ފެންވަރަކަށް ތަރައްގީ ކުރަން ބޭނުންވާ ޖާގަ އެތަނުގައި ނެތް ކަމަށް ރައީސް ވިދާޅުވި ކަމަށެވެ.
" ކޮންވެންޝަން ސެންޓަރަށް ގެންނަން ޖެހޭ ބަދަލުތަށް މިއަހަރުތެރޭ ގެންނަން ފަށާނެ ކަމަށް ރައީސް ވިދާޅުވި. މެޝިންތައް ބަހައްޓާނެ ޖާގަ ވެސް ނެތްކަމަށް އެމަނިކުފާނު ފާހަގަކުރެއްވި"
އޮފިޝަލް ބުނި ގޮތުގައި އީސީސީ ތަރައްގީ ކުރާނީ އެންމެފަހުގެ ވަސީލަތްތަކާއެކުގައި ކަމުގެ ޔަޤީންކަން ރައީސް ޔާމީން އެބައްދަލުވުމުގައި ދެއްވާފައިވާ ކަމަށެވެ.