އެމްއެމްޕީއާރުސީގެ ހިޔާނާތުގެ މައްސަލައާއި ގުޅިގެން އެބޭފުޅާގެ މައްޗަށް ސާބިތުކުރެވޭނެ ކޮރަޕްޝަނުގެ އެއްވެސް މައްސަލައެއް ނޯންނާނެކަމަށް ވިލިފުށީ ދާއިރާގެ މެންބަރު ރިޔާޒު ރަޝީދު ވިދާޅުވެއްޖެއެވެ.
ސަންގު ޓީވީގެ ޕްރޮގްރާމެއްގައި މިރޭ ވާހަކަ ދައްކަވަމުން ރިޔާޒު ވިދާޅުވީ އެބޭފުޅާގެ މައްޗަށް ސާބިތުކުރެވޭނެ އެއްވެސް މައްސަލައެއް ނޯންނާނެ ކަމަށާއި އަދި އެބޭފުޅާ ގެންދެވޭނެ ތަނެއް ވެސް ނޯންނާނެ ކަމަށެވެ.
"އަޅުގަނޑުގެ މައްޗަށް ސާބިތުކުރެވޭނެ އެއްވެސް މައްސަލައެއް ނޯންނާނެ. އަޅުގަނޑު ގެންދެވޭނެ ތަނެއްވެސް ނޯންނާނެ، އަޅުގަނޑާއި ކުރެވޭނެ ސުވާލެއްވެސް ނޯންނާނެ،" ރިޔާޒު ރަޝީދު ވިދާޅުވިއެވެ.
އެމްއެމްޕީއާރުސީގެ އެކައުންޓުން ރިޔާޒު ރަޝީދު ކިޔާ މީހަކަށް ގިނަ އަދަދެއްގެ ޑޮލަރު ދީފައިވާކަމަށް ބުނާ މައްސަލައެއް ފެންމަތިވެފައިވާއިރު ރިޔާޒު ވިދާޅުވީ އެފަދަ މައްސަލައެއް ހުށަހެޅިއްޖެނަމަ އަމިއްލައަށް ބަޔާން ދެއްވާނެކަމަށެވެ.
ރިޔާޒު ވިދާޅުވީ އޭނާއަކީ "ދައުލަތުގެ އެއްވެސް މަގާމަކާއި ހަވާލުވެގެން" ހުންނެވި ބޭފުޅެއް ނޫން ކަމަށާއި
ސަރުކާރުގެ ފައިސާއަށް ހިޔާނާތްތެރިވެވޭނީ އެކަމާއި ހަވާލުވެ ތިއްބަވާ ބޭފުޅުން އެފުރުސަތު ދިނުމުން ކަމަށެވެ.
"އަޅުގަނޑުމެންނަށް ލިބޭނީ މުސާރަ، ދެން ކޮން ކޮރަޕްޝަނެއްތޯ އޮންނާނީ. މިސާލަކަށް ދެކުންފުންޏެއްގެ ދޭތެރޭގައި ހިންގާފައިވާ ވިޔަފާރީގެ މުއާމަލާތް، އެއީ މުޅިން އެހެން ކަމެއްއެއީ،"
ރިޔާޒު ވިދާޅުވީ ކުންފުނިތަކާއިއެކު ވިޔަފާރި ހިންގަވާފައިވާނެކަމަށާއި ނަމަވެސް އޭނާއަކީ ސަރުކާރު ކުންފުނިތަކާއެކު ވިޔަފާރި ކުރައްވާ ބޭފުޅެއް ނޫންކަމަށެވެ.