އައްޑޫ ސިޓީގެ މިސްކިތްތަކުގެ އިމާންނާއި މުދިމުންނަށް ފާއިތުވި ޖެނުއަރީ މަހުގެ މުސާރަ އަދިވެސް ނުލިބޭތީ އެމީހުން ކަންބޮޑުވުން ފާޅުކުރަމުން އެބަގެންދެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ޖެނުއަރީ މަހުގެ މުސާރަ ލިބުން ލަސްވާތީ އެކަމުގެ ޝަކުވާ ބައެއް އިމާމުން ވަނީ މިނިސްޓްރީއަށް ހުށަހަޅާފައެވެ. ނަމަވެސް މިހާތަނަށް އިމާމުންގެ މުސާރަ ޖަމާކޮށްދީފައި ނުވާކަމަށް ވެއެވެ.
އައްޑޫގެ މިސްކިތްތަކުގެ އިމާމުންނަކީ، ފާއިތުވި ޑިސެމްބަރު މަހުގެ 1 ވަނަ ދުވަހުން ފެށިގެން އިސްލާމިކް މިނިސްޓްރީގެ މުވައްޒަފުންނެވެ.
'އައްޑޫލައިވް' އާއި ވާހަކަ ދެއްކި އިމާމަކު ބުނިގޮތުގައި، މިނިސްޓްރީގެ ދަށަށް އައްޑޫގެ މިސްކިތްތައް ބަދަލު ކުރި ފަހުން ހުރިހާ ކަމެއް ވެސް ބޮއްސުންލާފައިވާ ކަމަށެވެ.
އިމާމު ބުނިގޮތުގައި، މީގެ ކުރިން މިސްކިތްތައް ސާފުކުރުމަށް ބޭނުންވާ ސާމާނު ސިޓީ ކައުންސިލުން ފޯރުކޮށްދިން ނަމަވެސް މިހާރު އެތަކެތި އެއްގޮތަކަށް ވެސް ނުލިބޭ ކަމަށާއި އެކަމުގެ ޝަކުވާގެ އެތައް ފަހަރަކު މިނިސްޓްރީއަށް ހުށަހަޅާފައިވާ ކަމަށެވެ.
" މިސްކިތްތައް ސާފުކުރުމަށް ބޭނުންވާ ތަކެތި ނުލިބޭތާ މިހާރު އެތަކެއް ދުވަހެއް ވެއްޖެ. އެކަމުގެ ޝަކުވާ މިނިސްޓްރީއަށް ހުށަހެޅުނު އަދަދެއް ވެސް ނޭނގޭ"
މިކަމާއި ގުޅިގެން މިނިސްޓްރީގެ ބަހެއް ހޯދާލުމަށް 'އައްޑޫލައިވް'ގެ ފަރާތުން ކުރި މަސައްކަތް އަދި ވަނީ ކާމިޔާބު ވާގޮތް ނުވެފައެވެ.