މީދޫއަށް ސާފް ބޯފެން ފޯރުކޮށްދިނުމަށް ފެން ހޮޅި ވަޅުލުމުގެ މަސައްކަތް ފަށައިފިއެވެ.
އިއްޔެ ހަވީރު ހުޅުމީދޫ ބޭންކް އޮފް މޯލްޑިވްސް ކުރިމަތީގައި ބޭއްވި ރަސްމިއްޔާތެއްގައި މަސައްކަތް ފައްޓަވައިދެއްވީ ބީއެމްއެލް ހުޅުމީދޫ ބްރާންޗް މެނޭޖަރ އަބްދުﷲ ސާލިހް އާއި ފެނަކަ އިސްވެރިންގެ އިތުރުން ސަުރުކާރުގެ މުވައްސަސާތަކުގެ އިސްވެރިންނެވެ.
ފެނަކަ ކޯޕަރޭޝަނުން ބުނީ މީދޫގައި ފެންހޮޅި ވަޅުލުމުގެ މަސައްކަތް ކުރިއަށް ގެންދާނީ ހުޅުދޫގައި ވެސް ފެން ހޮޅި ވަޅުލި ސްރީލަންކާގެ، ޕިއުރިޓީ ކުންފުނިން ކަމަށެވެ.
އައްޑޫގެ އެކި ރަށްތަކަށް ސާފް ބޯފެން ފޯރުކޮށްދިނުމަށް ރައީސް މުހައްމަދު ނަޝީދުގެ ސަރުކާރުން ފެއްޓެވި މަސައްކަތް ހުއްޓިފައި ގިނަ ދުވަސްތަކަކަށް އިތުމަށް ފަހު މިހާރު ބާރު ސްޕީޑެއްގައި ކުރިއަށްދާ ކަން ފާހަގަކޮށްލެވެއެވެ.
ފެނަކަ ކޯޕަރޭޝަނުން ބުނީ މިއަހަރު ނިމުމުގެ ކުރިން އައްޑޫގެ ހުރިހާ ރަށަކަށް ސާފް ބޯފެން ފޯރުކޮށްދޭނެކަމަށެވެ.