ރާއްޖެ ވަށައިގެން ކަތަމަރާނެއްގައި ބުރެއްޖެހުމަށް ދަތުރުކުރަމުން އަންނަ އަބްދުލް އަފޫރް އަލީ (ގައްބެ) އެންމެ ބޮޑު އިސްކަމެއް ދެނީ ނަމާދު ވަގުތުތަކުގައި ހިކިފަސްތަނަކަށް މަޑުކޮށް ނަމާދު ކުރުމަށެވެ.
އެކަނި މާއެކަނި މާކަޑުގެ ބިޔަ ރާޅުތަކުގައި ގައްބެ ކުރަމުންދާ ދަތުރުގައި، އޭނާ ނަމާދު ކުރުމަށް ހާއްސަ އިސްކަމެއް ދެއެވެ.
މިވަގުތު މޫސުމް ގޯސްވެގެން ލ. ފޮނަދޫގައި ގައްބެ މަޑުކޮށްފައިވާ އިރު މާދަމާވެސް އޭނާ ދަތުރެއް ނުކުރާނެއެވެ. އެއީ ހުކުރު ދުވަސްވީމައެވެ. ހުކުރު ނަމާދު ލ. ފޮނަދޫގައި ކުރުމަށްފަހު ހުވަދޫ ކަނދު ހުރަސްކުރުމުގެ ބޮޑު ޗެލެންޖާއި ގައްބެ ކުރިމަތިލާނީ އަންނަ ހޮނިހިރު ދުވަހުއެވެ.
ގައްބެ ފިނޮޅެއްގެ މަތީ ނަމާދު ކުރަނިކޮށް ނަގާފައިވާ ފޮޓޯއެއްް "އެޓޯލް ސެއިލާސް"އިން އާއްމު ކޮށްފައިވަނިކޮށް ރާއްޖޭގެ ބައެއް ދީނީ އިލްމުވެރިންވެސް ވަނީ ގައްބޭގެ ފޮޓޯ ޝެއާކޮށްފައެވެ.
މީގެ އިތުރުން ސަލަފް ޖަމިއްޔާގައި އިސްކޮށް އުޅުއްވާ އަލީ ރަމީޒު އާއި އިތުރު ބައެއް ދީނީ އިލްމުވެރިން ވަނީ ކޮންމެ ތަނެއްގައި ހުރެ ނަމަވެސް ނަމާދު ކުރުމަށް ސަމާލްކަން ދޭންޖެހޭނެ ކަމަށް ބުނެ އެކަމަށް ތައުރީފްކޮށްފައެވެ.
ގައްބެގެ މިދަތުރުގައި ރާއްޖޭގެ ބައެއް ރަށްރަށަށް މަޑުކޮށް، އެ ރަށެއްގެ އާސާރީ އަދި ގިނަ ދުވަސްވީ ތަންތަނަށް ގައްބެ ޒިޔާރަތް ކުރާނެ އެވެ. އަދި ފޮޓޯ އާއި ވީޑިއޯ އިން މުޅި މި ދަތުރު ޑޮކިއުމަންޓް ކުރާއިރު ކަނޑުގައި ގައްބެ ކުރާ ދަތުރާއި ރާއްޖޭގެ ރީތި ރަށްތަކާއި މީހުންގެ ދިރިއުޅުމާއި ސަގާފީ ތަންތަން ވެސް ދައްކާނެ އެވެ.