މުޙައްމަދު ނަޝީދު ވެރިކަމަށް ވަޑައިގަތުމާއި އެކު އައްޑު އަތޮޅު ސިޓީއަކަށް ހެއްދެވިއެވެ. އާއްމު ބަހުރުވައިން ނަމަ މިތަން ސިޓީ އަކަށް ހެއްދެވީ އެއް ރޭ އެއް ދުވާލުންނެވެ. އެއާއި އެކު "އަތޮޅު" މިބަސް އައްޑޫ ރައްޔިތުންނަށް ބީރައްޓެހި ބަހަކަށް ވިއެވެ. ރައީސް ނަޝީދު އައްޑޫއަށް ކޮށްދެވި ގިނަ ހިދްމަތްތަކަކީ އޭގެ އަގު އެތައް ދުވަހަކުން ނޫނީ އަދާނުކޮށްދެވޭނެ ހިދްމަތްތަކެވެ.
އައްޑޫ ސިޓީއަކަށް ބަދަލުވިތަނާހެން ސާކް ސަމިޓް އައިސް ބޯމަތިވެއްޖެ އެވެ. އޭރު އަދި ސަމިޓް ބާއްވާނެ ތަނެއް ކަނޑަނޭޅެއެވެ. އަނެއްކާވެސް ދުވަސްކޮޅެއް ފަހުން ރައީސް ނަޝީދު އައްޑޫއަށް ވަޑައިގަތީ އުފާވެރި ޙަބަރަކާއި ގެންނެވެ. މިސިޓީގައި 17 ވަނަ ސާކް ސަމިޓް ބާއްވާނެ ކަމުގެ އުފާވެރި ހަބަރާއިގެންނެވެ.
ސާކް ސަމިޓަށް ބިނާކުރި ކޮންވެންޝަން ސެންޓަރާއި ހިތަދޫ ބޮޑުމަގު އަދި ސިޓީ ސްކުއާރ އާއި ގަމުގެ ވައިގެ ބަނދަރުގެ ވީއަޕީ ލައުންޖް ނިންމާލީ މަދު ދުވަސްކޮޅެއްގެ ތެރޭގައެވެ. ސިޓީގެ އެތެރޭގެ ޒީނަތްތެރިކަމަށް އެތައް ސަތޭކަ "ފުރިހަމަ" ބަލާލަން "ރީތި" މާވަށިތައް ހައްދާލީ ދެތިން ދުވަހުންނެވެ. އެހާތަނުން އައްޑޫއަށް ސިޓީގެ ކުލަވަރު އަންނަންފެށިއެވެ. ކޮންމެ ބަޔަކު ކޮންމެ އެއްޗެކޭ ބުންޏަސް މިއީ ހަމަ ތަރައްގީއެވެ.
ފައިސާ ހުރިއްޔާ ތަންތަން އާރާސްތު ކުރުމަކީ ބޮޑު ކަމެއް ނޫނެވެ. ނަމަވެސް އާރާސްތު ކުރާ ތަންތަން ދެމިއޮތުމަށް އެ ތަންތަން ބަލަހައްޓަން ޖެހެ އެވެ. އައްޑޫ ސިޓީއަށް މިހާރު ދިމާވެފައިވާ އެންމެ ބޮޑު އެއް މައްސަލައަކީ ތަންތަން ރަނގަޅަށް ނުބެލެހެއްޓޭ ކަމުގެ މައްސަލަ އެވެ. ކަންކަން ކުރަން ތިބި މީހުންގެ ޒިންމާދާރު ކަން ކުޑަ މައްސަލަ އެވެ. ޒިންމާތަކުން ރެކެން އުޅޭ މައްސަލައެވެ. ޒިންމާދާރު ވުމަށް ގޮވާލާ ބަޔަކު ތިބިއްޔާ އެ ބަޔަކު ގޯސް ކުރާ މައްސަލަ އެވެ.
އައްޑޫ ސިޓީ ގައި ސާކް ސަމިޓާއި ގުޅިގެން ބިނާ ކުރެވިފައިވާ މިފަދަ ތަންތަން ހަލާކުވެ ވީރާނާ ވެގެން މިދަނީ އެންމެންގެ ލޯމަތިންނެވެ. ޒިންމާ ނަގާނެ ބަޔަކު ނެތިއެވެ. ރައީސް ނަޝީދަކަށް ވަޑައިގެން ކޮންމެ ދުވަހަކު މި ސިޓީގެ މަގުތަކުގައި ހުރި މާވަށި ތަކަށް ފެނެއް ނުދެވޭނެ އެވެ. ސިޓީ ސްކްއާގެ ވިނަގަނޑު ކޮށާ ސާފުނުކުރެވޭނެއެވެ. މިކަމާއި ބަޔަކު މަތިކޮށްފައެބަ ތިއްބެވެ.
ސިޓީ ސްކްއާ އަކީ ސާކަށް ތައްޔާރުކުރެވުނު ބިނާތަކުގެ ތެރެއިން ރައިސް ނަޝީދު އެތަނަށް ވަޑައިގެން އަމަލީގޮތުން މަސައްކަތް ކުރެއްވި އެއްތަނެވެ. އެތަން ފުރުހަމަކޮށް ނިންމާލީ އެމަނިކުފާނު އިންނަވައިގެންނެވެ. ސިޓީ ސްކުއާރ ގައި ޖުމުހުރީ ދުވަހު ދިދަ ނެގުމާއި އެކު އެތަން ފުރިހަމަ ވެގެން ދިޔައެވެ. އެހެންވެ އެ ތަނަށް މީހުން ޝައުޤުވެރިވިއެވެ. ކުޑަކުދިންނާއި އެކު އާއްމުން ހަވީރު ގަޑީގައި އެތަނަށް އެއްވެއެވެ. އެތަނަކީ އޭރު އައްޑޫ ރައްޔިތުން ފަހުރުވެރިވި ތަނެކެވެ. ނަމަވެސް އެއީ މީގެ ކުރިއެވެ.
މިހާރު ސިޓީ ސްކްއާ އަށް ވަނުމަކޭ މާމެންދޫ ވަލަށް ވަނުމެކޭ އެއްފަދަ އެވެ. ވިނަ އެއް ނުކޮށަ އެވެ. ދިދަ އެއް ނެތެވެ. ތަން ހަލާކުވެ ވީރާނާ ވަނީ އެވެ. ހިތާމައަކީ މިކަމުގެ ޒިންމާ ނަގާނެ ބަޔަކު ނެތް ކަމެވެ. ކައުންސިލުން ފަހަކާއި ޖެހެންދެން ބުނަމުން އައީ ސިޓީ ސްކްއާ އަކީ ކައުންސިލްގެ ބެލުމުގެ ދަށުގައި އޮތް ތަނެއް ނޫންކަމަށެވެ.
ނަމެވެސް އާއްމުން އެވާހަކަ މާގިނައިން ދައްކަންފެށުމުން ކައުންސިލަށް އެތަން ލައްވާލިއެވެ. ދެން އިވެންފެށީ ދިދަ ދަނޑިއަށް ނަގަންޖެހޭ ދިދައިގެ އަގުބޮޑު ވާހަކައެވެ. އަދި ބަޖެޓް ތާށި މިފަދަ ދުވަސްވަރެއްގައި އެއީ ކުރަން އުނދަގޫކަމެއް ކަމަށެވެ. ވީ ނުވީ އެއް ނޭގެއެވެ. މިހާރު އަނެއްކާ އިވޭ އަޑަކީ "ކޮލިޓީ" ދިދައެއް އެމެރިކާއިން 5000 ޑޮލަރަށް ގެންނަވާހަކައެވެ. އަދި އެކަމަކު އެދިދައެއް އައްޑުއަކަށް ނާދެއެވެ. އިވޭ ގޮތުން ފެބްރުއަރީ މަހުގެ މެދުތެރޭ އެދިދަ އައްޑޫ ސިޓީގެ ބޮޑު ދިދަ ދަޑީގައި ވިހުރޭނެއެވެ.
މިހިރީ މިހާރުގެ މި ސިޓީގެ ހާލެވެ. ކަންކަން ކުރުމުގައި އެއްވެސް އިސްނެގުމެއް ނޯވެ އެވެ. އެއީ އޭނަގެ ކަމޭ މިއީ ތިމަންނަގެ ކަމޭ ކިޔައިގެން ތިބެ މި ސިޓީ ހަލާކުވެގެން ދަނީ އެވެ. މައްސަލަ އޮތީ ހަމައެކަނި ސިޓީ ސްކްއާގަ އެއް ނޫނެވެ. މިފަދަ އެތައް ކަމެއް އެބައޮތެވެ.
ސާކަށް ހެދި "ފުރިހަމަ" އަދި އެހާމެ "ރީތި" މާވަށިތައް ހަލާކެވެ ނެތިގެން ދަނީ އެވެ. އޭގެ ދެބައި ކުޅަ އެއްބައި ހިތަދޫ ކުޑަކުދިންގެ ޕާކާއި އިންވެ އޮތް ބިމުގައި އެބަހުރިއެވެ. އެކަކާއި ވެސް ބެހޭ ކަމެއް ނޫނެވެ. އީސީސީ ވެސް ހަމަ ވީރާނާ ވަނީ އެވެ. ސްޓޭޓް ސްކްއާ ވާ ވަނީ އެވެ. ހުސް ހިތާމަ ހުރި ކަންތަކެވެ. މިކަންކަން ކުރާނެ ބަޔަކު މި ސިޓީގައި ނެތެވެ. އެންމެންގެ ވެސް އޮތީ ހުވަފެންބެލުމެވެ.