އަދާލަތު ޕާޓީގެ ރައީސް ޝެއިހް އިމްރާން އަބުދުﷲގެ މައްޗަށް އުފުލާފައިވާ ޓެރަރިޒަމްގެ ދައުވާގެ މިއަދު ކްރިމިނަލް ކޯޓުގައި ތާވަލް ކުރި ޝަރީއަތް ކެންސަލް ކޮށްފިއެވެ.
"އައްޑޫލައިވް"އަށް މައުލޫމާތު ލިބިފައިވާ ގޮތުގައި މިއަދު ބާއްވަން ނިންމި ޝަރީއަތް ކެންސަލް ކޮށްފައިވަނީ ދައުލަތުން އިމްރާންގެ މައްޗަށް އުފުލާފައިވާ ދައުވާ އަނބުރާ ގެނައުމަށް ސަރުކާރުން ނިންމެވުމާއި ގުޅިގެންނެވެ.
އިމްރާނުގެ މައްޗަށް ދައުލަތުން ދައުވާ ކުރަނީ މިދިޔަ އަހަރުގެ މެއި މަހުގެ ފުރަތަމަ ދުވަހު އިދިކޮޅު ފަރާތްތަކުން ބޭއްވި މުޒާހަރާގައި، އަނިޔާވެރިކަމަށް ހިތްވަރު ލިބޭ ގޮތަށް ވާހަކަ ދެއްކެވި ކަމަށް ބުނެއެވެ.
އިމްރާންގެ މައްސަލަ ދައުލަތުން އަނބުރާ ގެންނަން ނިންމާފައިވަނީ ސިޔާސީ ޕާޓީ ތަކާއި އެކު ސަރުކާރުން މަޝްވަރާ ކުރުމަށް ނިންމާފައި ވަނިކޮށެވެ.
އިދިކޮޅު ފަރާތްތަކުން މަޝްވަރާއަށް ދާން ނިންމާފައިވަނީ އިދި ކޮޅު ސިޔާސީ ކުށްވެރިން ދޫކޮށްލުމުންނެވެ. އޭގެ ތެރޭގައި ޝެއިހް އިމްރާން އާއި، އެމްޑީޕީގެ ރައީސް މުހައްމަދު ނަޝީދު އާއި ކުރީގެ ޑިފެންސް މިނިސްޓަރ ކާނަލް ނާޒިމް ހިމެނެއެވެ.
އިމްރާންގެ މައްސަލަ ކެންސަލް ކުރި ކުރުމާއި ގުޅިގެން ކްރިމިނަލް ކޯޓު އަދި ޕީޖީގެ ބަހެއް ވަނީ ލިބޭ ގޮތް ނުވެފައެވެ.