އިނގިރޭސި ވިލާތުގެ އެންމެ ކާމިޔާބު އަދި އެންމެ ބޮޑު ފުޓުބޯޅަ ކުލަބު، މެންޗެސްޓާ ޔުނައިޓެޑް 3 އަހަރު ތެރޭގައި ދެވަނަ ފަހަރަށް ތާވަލުގެ ކުރިން ޖާގައެއް ނުލިބި ސީޒަން ނިންމާލަން ޖެހުމުގެ ބިރާ ކުރިމަތިލާން ފަށައިފިއެވެ.
ރެލިގޭޝަން ޒޯނުގައި އޮތް ސަންޑަލޭންޑް އާ ދެކޮޅަށް މެންޗެސްޓާ ޔުނައިޓެޑް ކުޅުނު މެޗުން 1-2 ގެ ނަތީޖާ އަކުން ބަލިވެ 4 ވަނައިގައި އޮތް މެންޗެސްޓާ ސިޓީ އާ ދެމެދު 6 ޕޮއިންޓުގެ ފަރަގެެއް އުފެދިފައިވާ އިރު ޔުނައިޓެޑް އިން ވަނީ ސިޓީ އަށްވުރެ އިތުރަށް އެއް މެޗު ކުޅެފައެވެ.
މެޗުގެ ފުރަތަމަ ގޯލު ދެވަނަ މެޗުގެ ދެވަނަ މިނެޓު ތެރޭގައި ލިބުނު ހިލޭ ޖެހުމަކުން ކާމިޔާބުކޮށްފައިވަނީ ސަންޑަލޭންޑުގެ ކަޒީރީއެވެ.
މެޗުގެ ކުރީކޮޅުގައި ސަންޑަލޭންޑު ލީޑު ނެގި ނަމަވެސް ޔުނައިޓެޑަށް ބަދަލުގައި 'މާބޮޑު' ކަމެއް ކުރެވިފައި ނުވާކަން ފާހަގަ ކޮށްލެވެއެވެ.
ފުރަތަމަ ހާފު ނިމެން ކައިރި ވެފައި ވަނިކޮށް ޔުނައިޓެޑަށް މެޗުގެ ނަތީޖާ ހަމަހަމަ ކޮށްދިނީ ޒުވާން ފޯވާޑް އެންތޮނީ މާޝިއަލްއެވެ.
ފުރަތަމަ ހާފު ނިމުނު އިރު ނަތީޖާ އެއްވަރުވެފައި ވުމުން ޔުނައިޓެޑުގެ ސަޕޯޓަރުން އުއްމީދުކޮށްގެންތިބީ ދެވަނަ ހާފުގައި ޔުނައިޓެޑުން ނިކުންނާނީ ފޯރިގަދަ ކުޅުމަކާއެކު މެޗުން މޮޅުވަމަށް ކަމަށެވެ. ނަމަވެސް އަނެއްކާވެސް 'މާބޮޑު' ކުޅުމެއް ނުފެނުނު ކަން ފާހަގަކޮށްލެވެއެވެ.
މެޗުގެ 82 ވަނަ މިނެޓުގައި ޔުނައިޓެޑްގެ ކީޕަރު ޑެވިޑް ޑެހެއާ އަތުން ބަައިކޮޅަށް ވަން ގޯލަކާއެކު ސަންޑަލޭންޑް އިން ދެވަނަ ފަހަރަށް މެޗުގެ ލީޑުނެގިއިރު މިއީ ސަންޑަލޭންޑްގެ ދަނޑުގައި ޔުނައިޓެޑް ގެ އަތުން 1997 ވަނަ އަހަރުގެ ފަހުން މޮޅުވި ފުރަތަމަ މެޗެވެ.