ސިވިލް ކޯޓުގެ ގާޟީއަކަށް ހުންނެވުމަށްފަހު މިދިޔަ ޑިސެމްބަރު 31 ގައި އިސްތިއުފާދެއްވި މަރިޔަމް ނިހާޔަތު ޑެޕިއުޓީ ޕްރޮސިކިއުޓާރ ޖެނެރަލްގެ މަޤާމަށް ގެނައުމަށް މަގުފަހި ކުރުމަށް، އިތުރު ޑެޕިއުޓީ ޕްރޮސެކިއުޓާ ޖެނެރަލަކު އައްޔަންކުރަންޖެހޭ ގޮތަށް ޕްރޮސެކިއުޓާ ޖެނެރަލްގެ ގާނޫނަށް ސަރުކާރުން އިޞްލާޙް ހުށަހަޅައިފިއެވެ.
"އައްޑޫލައިވް" އަށް މައުލޫމާތު ދެއްވި ވެރިކަންކުރާ ޕާޓީއަށް ނިސްބަތްވެ ވަޑައިގަންނަވާ މަޖިލިސް މެމްބަރަކު ވަނީ ދެ ޑީޕީޖީ އިން ތިބޭގޮތަށް ޤާނޫނަށް އިޞްލާޙް ސަރުކާރުން ގެންނަނީ ކުރީގެ ޤާޟީ ނިހާޔަތު އެ މަޤާމަށް ގެނައުމަށްކަން ކަށަވަރުކޮށްދީފައެވެ.
މިދިޔަ ޑިސެމްބަރު 31 ގައި ނިހާޔަތު ސިވިލް ކޯޓުގެ ޤާޟީކަމުން އިސްތިއުފާ ދެއްވީ ޖުޑިޝަލް ސާވިސް ކޮމިޝަން އިން ބަލަމުންދާ މައްސަލައަކާ ގުޅިގެން 2015 ވަނަ އަހަރު އޮގަސްޓް މަހުން ފެށިގެން އޭނާ ސަސްޕެންޑްކޮށްފައި ވަނިކޮށެވެ.
ނިހާޔަތު ސަސްޕެންޑްކުރީ ދައުވާކުރި ފަރާތަކުން ހާޒިރު ނުވެގެން ބާތިލްކުރި ގަޒިއްޔާއެއް ކުރިއަށް ގެންދިޔަ ކަމަށް ބުނެ ނިހާޔަތާ ބެހޭ ގޮތުން ހުށަހެޅި ޝަކުވާއަކާ ގުޅިގެންނެވެ.
ނިހާޔަތު މިހާރު ހުންނެވީ އެސިސްޓެންޓް ޕްރޮސިކިއުޓާރ ޖެނެރަލްގެ މަޤާމުގައެވެ. ނިހާޔަތުގެ އިތުރުން ވެސް އެސިސްޓެންޓް ޕީޖީގެ މަގާމުގައި ދެ ބޭފުޅަކު ތިއްބަވަ އެވެ. އެއީ ކަސްޓަމްސް އިންޓަގްރިޓީ ކޮމިޝަންގެ ކުރީގެ ނައިބު ރައީސާ ޖިހާދާ އަނީސް އާއި ހުސައިން ނާޝިދެވެ.
ޕީޖީގެ ގާނޫނު މިހާރު އޮންނަ ގޮތުން ހުންނާނީ އެންމެ ޑެޕިއުޓީ ޕީޖީއެއް ނަމަވެސް ސަރުކާރުން މިހާރު އިސްލާހު ހުށަހަޅާފައިވަނީ ދެ ޑެޕިއުޓީ ޕީޖީން އައްޔަންކުރަންޖެހޭ ގޮތަށެވެ. މިހާރު ޑެޕިއުޓީ ޕީޖީގެ މަގާމުގައި ހުންނެވީ މަހްމޫދް ސަލީމެވެ.