ފުލުހުންގެ ސްޕެޝަލް އޮޕަރޭޝަން ކޮމާންޑުގައި މަސައްކަތްކުރާ ގިނަ އަދަދެއްގެ ފުލުހުން އެހެން ޑިޕާރޓްމަންޓުތަކަށް ބަދަލުކުރުމުގެ މަސައްކަތް ފަށައިފިއެވެ.
މައުލޫމާތު ލިބިފައިވާގޮތުން ސްޕެޝަލް އޮޕަރޭޝަން ކޮމާންޑަށް މިފަދަ ބަދަލެއް ގެނައުމަށް ނިންމާފައިވަނީ ރައީސް ޔާމީން ހައްޔަރު ކުރުމަށް ނެރުނު ކޯޓު އަމުރާއި ގުޅިގެން ސީދާ ރައީސްގެ އެންގެވުމަށެވެ.
ފުލުހުންގެ ސްޕެޝަލް އޮޕަރޭޝަން ކޮމާންޑުގައި މަސައްކަތްކުރާ ފުލުހުންގެ ތެރެއިން އެހެން ޑިޕާރޓްމަންޓްތަކަށް ބަދަލުކުރަމުންދަނީ ކުރީގެ ސީޕީ ހުސެއިން ވަހީދާއި ގުޅުންބޮޑު ފުލުހުންކަމަށް "އައްޑޫލައިވް" އާއި މައުލޫމާތު ހިއްސާކުރި ފަރާތުން ބުނެފައިވެއެވެ. އަދި މިއީ ރައީސް އަށް އެސްއޯގައި މަސައްކަތްކުރާ ގިނަ އަދަދެއްގެ ފުލުހުންގެ މައްޗަށް އިތުބާރު ނުކުރެވޭތީ ގެނައުމަށް ނިންމާފައިވާ ބަދަލެއް ކަމަށްވެސް ވެއެވެ.
ކުރީގެ ސީޕީ ހުސެއިން ވަހީދަކީ ގިނަ އަހަރުތަކެއް ވަންދެން ސްޕެޝަލް އޮޕަރޭޝަން ކޮމާންޑުގެ ހެޑް އޮފް ޑިޕާޓްމަންޓްގެ ގޮތުގައި މަސައްކަތް ކޮށްފައިވާ ބޭފުޅެކެވެ. އަދި އެޑިޕާރޓްމަންޓުގައި މަސައްކަތްކުރާ ފުލުހުންނާއި ގާތްގުޅުމެއް އަބަދުވެސް ބާއްވަމުން ގެންދަވާ ބޭފުޅެކެވެ.
މިފަދަ ބަދަލެއް ފުލުހުންގެ ޑިޕާރޓްމަންޓަކަށް ގެންނަމުން މިދަނީ ރައީސް ޔާމީން ހައްޔަރުކުރުމަށް ނެރުނު ކޯޓު އަމުރާއި ގުޅިގެން އެމަނިކުފާނު ހައްޔަރު ކުރުމަށް ހުސެއިން ވަހީދު ފުލުހުންނާއި ގުޅިގެން ރޭވިކަމަށް އަޑުފެތުރިފައި ވަނިކޮށެވެ. އޭގެފަހުން ހުސެއިން ވަހީދު ރާއްޖެއިން ބޭރަށް ވަޑައިގަތުމަށްފަހު އެނބުރި ވަޑައިގެންނެވިކަން އެނގިފައިނެތެވެ.
އައްޑޫލައިވް އަށް މައުލޫމާތު ލިބިފައިވާގޮތުން ފުލުހުންގެ ތެރޭގައި ރައީސް ޔާމީންއަށް އޮތްތާއީދު ކޮރަޕްޝަންގެ މައްސަލަތަކާއި ގުޅިގެން މިވަނީ ވަރަށްބޮޑަށް ކުޑަވެފައެވެ. އަދި ފުލުހުން ބަދުނާމުވާގޮތަށް ރައީސް ވާހަކަފުޅު ދައްކަވާފައިވުމާއި ގުޅިގެން ފުލުހުންގެ ސީނިއާރ މެނޭޖްމެންޓްގައި ވަރަށް ބޮޑަށް ރައީސް ޔާމީން އާއި ދޭތެރޭ ހިތްހަމަނުޖެހުން އުފެދިފައިވާކަމަށް މައުލޫމާތު ލިބިފައިވެއެވެ.