އަދާލަތު ޕާޓީގެ ރައީސް ޝެއިހް އިމްރާންގެ މައްޗަށް އުފުލާފައިވާ ޓެރަރިޒަމް ދައުވާގެ އަޑުއެހުން މިއަދު ނިންމާލައި މާދަމާ ހުކުމް ކުރުމަށް ނިންމައިފިއެވެ.
ކްރިމިނަލް ކޯޓުގައި އިއްޔެ އިމްރާންގެ ޝަރީއަތް ބާއްވަން ނިންމައި، ފަހުން ވަނީ މައްސަލަ އަނބުރާ ގެންގޮސްފައެވެ. ޕީޖީން ބުނީ އިމްރާންގެ މައްސަލަ އަނބުރާ ގެންދިޔައީ ބައެއް ހެކި ދައުލަތުން ހުށަހެޅުމަށް ކަމަށެވެ.
އިމްރާންގެ ޝަރީއަތް މިއަދު ނިންމާލި އިރު، ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ރޭ ވަނީ އާއިލާއާއި ބެހޭ ކޯޓަށް ބަދަލުކޮށްފައެެވެ.
އިމްރާންގެ ޝަރީއަތް މިއަދުވެސް ކުރިއަށް ގެންދިޔައީ ގާޒީ ބާރީއެވެ. ބާރީ ވަނީ އިމްރާންގެ މައްސަލައިގެ އަޑުއެހުން ކުރިއަށް ގެންދަމުން އިމްރާންގެ ޝަރީއަތާއި މެދު "ގޮތް ނިންމަވައިގެން ހުރި" ކަމަށް ވިދާޅުވެފައެވެ.
އެހެން ކަމުން މާދަމާ ގާޒީ ބާރީ ނިންމަވައިގެން ހުރި ގޮތެއް އެނގިގެންދާނެއެވެ.
އިމްރާނުގެ މައްޗަށް ދައުލަތުން ދައުވާ ކުރަނީ މިދިޔަ އަހަރުގެ މެއި މަހުގެ ފުރަތަމަ ދުވަހު އިދިކޮޅު ފަރާތްތަކުން ބޭއްވި މުޒާހަރާގައި، އަނިޔާވެރިކަމަށް ހިތްވަރު ލިބޭ ގޮތަށް ވާހަކަ ދެއްކެވި ކަމަށް ބުނެއެވެ