އަދާލަތު ޕާޓީގެ ރައީސް ޝެއިޚް އިމްރާން އަބްދުﷲގެ މައްޗަށް ކުރާ ޓެރަރިޒަމްގެ ދަޢުވާގެ ޝަރީޢަތް ކުރިއަށް ގެންދާ ގޮތާއި މެދު ގިނަ ބަޔަކު ގެންދަނީ ސުވާލު އުފައްދަމުންނެވެ. އެގޮތުން އިމްރާންގެ މައްސަލަ ބަލަން އެކުލަވާލި ބެންޗު އުވާލައި މައްސަލަ ބެލުން ކްރިމިނަލް ކޯޓުގެ ފަނޑިޔާރު އަބްދުލް ބާރީ ޔޫސުފް އާއި ހަވާލުކުރުމުން، އިމްރާން އަށް އިންސާފުވެރި ޝަރީޢަތެއް ލިބިދާނެތޯ ގިނަ ބަޔަކު ސުވާލު އުފައްދަން ފެށިއެވެ.
ޝަރީޢަތުގެ މަޖިލީހުގައި "ވަކިގޮތެއް ނިންމަވައިގެން ހުންނެވިކަމަށް" މައްސަލަ ބައްލަވާ ފަނޑިޔާރު ވިދާޅުވެފައިވާއިރު، އޭގެ ފަހުން ވެސް އިމްރާންގެ ޝަރީޢަތުގައި ފެނިގެން ދިޔައީ "އަޖައިބުން ފުރިގެންވާ" ފަދަ ކަންތައް ތަކެކެވެ.
މާދަމާ އިމްރާންގެ މައްސަލައިގައި ހުކުމް ކުރުމަށް ނިންމާފައި ވާއިރު ފާހަގަކޮށްލެވޭ އެއްކަމަކީ، ޝަރީޢަތުގެ މަޖިލީހުގައި އިމްރާން އާއި ދެކޮޅަށް ދައުލަތުން ހުށަހެޅި ސިއްރު ހެއްކަކު ދޮގު ހަދާފައިވާކަމެވެ. އެކަން ޚުދު ގާޒީ ބާރީއަށް ވެސް ރަގަޅަށް އެނގިލައްވާނެއެވެ.
ޖެނުއަރީ 24 ވަނަ ދުވަހު ބޭއްވި އަޑުއެހުމުގައި ސިއްރު ހެކިވެރިޔާ ބުނެފައިވާ ގޮތުގައި، މޭޑޭ ގެ މުޒާހަރާގައި ޝައިހް އިމްރާން އަބްދުﷲ ދެއްކެވި ވާހަކަތަކުގެ ސަބަބުން އޭނާއަށް އަސަރެއްކޮށްފައި ނުވާކަމަށެވެ. އެހެން ނަމަވެސް ދައުލަތުން ބުނެފައިވަނީ، މޭޑޭގެ މުޒާހަރާގައި ހިނގި ހަމަނުޖެހުމުގެ ޒިންމާ އިމްރާން ނަންގަވަން ޖެހޭނެ ކަމަށެވެ.
ވަކި ކޮޓަރިއެއްގައި ހުރެގެން އަޑު ބަދަލުކޮށްގެން ހެކިބަސް ދިން އެ މީހާ ބުނިގޮތުގައި މޭޑޭގެ މުޒާހަރާގައި ފުލުހުންގެ ސަފުތައް ފޫއަޅުވާލުމަށް ފަހު ޕިކަޕެއް ދިޔައީ ސީދާ އިމްރާންގެ އެންގުމަށް ކަމަށެވެ. ހެކި ބަސް ދެމުން ދައުލަތުން ހުށަހެޅި ސިއްރު ހެކިވެރިޔާ ބުނެފައިވާ ގޮތުގައި އޭނާ އެދުވަހު މަޣްރިބް ނަމާދަށް ދިޔައީ، ވިޔަފާރިވެރިންގެ މިސްކިތަށް ކަމަށެވެ.
ފާހަގަކޮށްލެވޭ ކަމަކީ، އެމްއެމްއޭ ސަރަހައްދުގައި ފުލުހުންގެ ގައިގައި ޕިކަޕަކުން ޖައްސާފައި ވަނީ ސީދާ އިމްރާން އަންގައިގެން ކަމަށް ސިއްރުން ހެކި ބަސްދިން މީހާ ބުނެފައިވާއިރު އެ ހާދިސާ ހިނގި ތަނާއި މާދުރު ހިސާބެކެވެ.
އެގަޑީގައި އެމްއެމްއޭ ހިމެނޭ ސަރަހައްދަށް ދާން އޮންނަ ގިނަ މަގުތަކެއް ފުލުހުން ބަންދުކޮށްފައިވާއިރު، އަދި ޕިކަޕުން ފުލުހުންގެ ސަފުތަކުގައި ޖައްސާފައިވަނީ މަޣްރިބް ނަމާދު ވަގުތުގައި ކަމަށް ވެފައި، އެމަންޒަރު ނުވަތަ އެކަން ހިނގި ގޮތް މާލޭގެ އަނެއް ކޮޅުގައި ހުރި މިސްކިތަކަށް ނަމާދަށް ދިޔަ މީހަކަށް ފެނުމަކީ އަޖައިބެކެވެ.
ވިޔަފާރިވެރިންގެ މިސްކިތާއި އެމްއެމްއޭ ސަރަހައްދާއި ދެމެދު ގާތްގަނޑަކަށް 1.18 ކިލޯމީޓަރުގެ ދުރުމިނެއް ހުރެއެވެ. އަދި ފުލުހުން އެގަޑީގައި މާލޭގެ ގިނަ މަގުތަކެއް ބަންދުކޮށްފައިވުމުން އެހިސާބަށް، ހެކިވެރިޔާއަށް ދިއުމަށް ގިނަ އިރުތަކެއް ނަގާނެ ކަމަށް ވެސް ބެލެވެއެވެ.
ސުވާލަކީ، މީގެ ކުރިން ޝަރީޢަތުގެ އަޑުއެހުމެއް ގެއްލުވާލި ފަނޑިޔާރު އަބްދުލް ބާރީ ޔޫސުފް އިމްރާންގެ މައްސަލައިގެ މި އަޑުއެހުން ވެސް ގެއްލުވާލާނީ ތޯއެވެ. ނުވަތަ ދޮގުހެކި ދިން ހެކިވެރިއެއްގެ ހެކިބަހުގެ މައްޗަށް ބުރަވެ އިމްރާންގެ މައްޗަށް ކުށް ސާބިތުވާ ކަމަށް ހުކުމް ކޮށްފާނެ ތޯއެވެ؟
މިހުރިހާ ސުވާލެއްގެ ޖަވާބު މާދަމާ ހަވީރު 4 ޖަހާއިރު ލިބިގެން ދާނެއެވެ.