އެމެރިކާގެ އެންމެ ބޮޑު ބޭންކް އަދި ދުނިޔޭގެ ހަވަނައަށް އެންމެ ބޮޑު ބޭންކުން ދިވެހިރާއްޖޭގެ ގައުމީ ބޭންކާއި މުއާމަލާތް ކުރުން ހުއްޓާލި ޚަބަރަކީ ރާއްޖޭގެ މިހާރުގެ ހާލަތު ވަރަށްބޮޑަށް ސިފަވެގެން ދިޔަ ޚަބަރެކެވެ. އަދި ދެވަނަ ބޭންކަކުން ވެސް ރާއްޖެ ދޫކޮށްލާނެ ކަމުގެ އިޝާރާތެއް ރައީސް ޢަބްދުﷲ ޔާމީން ދެއްވާފައިވުމުން ގައުމުގެ އިގްތިސާދީ މުސްތަގްބަލް ބަނަވެފައިވާ މިންވަރު ސިފަވެއެވެ.
ރައީސް އަބްދުﷲ ޔާމީން ގދ. ގައްދޫ ރައްޔިތުންނާއި މުޙާޠަބްކޮށް ވިދާޅުވީ ދިވެހި ބޭންކާއި މުޢާމަލާ ކުރާ ބޮޑު ބޭންކަކުން މުޢާމަލާ ކުރުން ހުއްޓާލީ ރާއްޖެއާބެހޭ ގޮތުން ބައެއް ފަރާތްތަކުން ފަތުރާ ނޭދެވޭ ވާހަކަތަކާ ހެދިއެވެ.
އެގޮތުން ރައީސް ވިދާޅުވީ ރާއްޖޭގެ ގިނަ ބަޔަކު ބޭރުގެ ހަނގުރާމަތަކަށް ދާކަމަށް ބުނެ ބައެއް ފަރާތްތަކުން ދައްކާ ވާހަކަތަކާ ހެދި ބޭރުގެ ބޮޑު ބޭންކަކުން ރާއްޖެއާ މުއާމަލާތްކުރުން މިހާރުވެސް ހުއްޓާލާފައިވާ ކަމަށެވެ.
ސުވާލަކީ މިފަދަ ބޮޑު ނިންމުމެއް ދުނިޔޭގެ ބޮޑެތި ބޭންކްތަކުން ހަމައެކަނި ބަޔަކު ދެއްކި ވާހަކައަކާއި ގުޅިގެން ހަގީގަތް ނުބަލާ ނިންމަފާނެތޯއެވެ؟
މަދުބަޔަކު ބޭރު ގައުމެއްގެ ހަނގުރާމައަށް ދިއުމުން އެފަދަ މުއާމަލާތެއް ހުއްޓާލާނެތޯއެވެ. އަދި ބަޔަކު ހަނގުރާމަ ކުރުމަކީ އެފަދަ ބެންކަކާއި ދިވެހި ބޭންކާއި ދެމެދު ކުރެވޭ މުއާމަލާތްތަކަށް ކޮން ކަހަލަ އަސަރެއް ކުރުވާ ކަމެއްތޯއެވެ؟
އެމެރިކަން އެކްސްޕްރެސް އާއި ޖޭޕީމޯގަން، އަދި ލޮއިޑްސް ފަދަ ބޮޑެތި ބޭންކްތަކަކީ ދުނިޔޭގައި ބައިނަލްއަގްވާމީ ވިޔަފާރީގެ މުހިންމު ބައިވެރިންނެވެ. މިފަދަ ބޭންކްތަކަކީ ތޯތޯ ވާހަކަތަކަށް ގުޑާވަރަށްވުރެ ހަރުދަނާ ނިޒާމެއްގެ ދަށުން ހިނގަމުން އަންނަ ބޭންކްތަކެކެވެ.
އަދި އަމުދުން އޭގައި ހަގީގަތެއްގެ އެކުލެވިގެންނުވާ ވާހަކަތަކާއި ގުޅިގެން އެފަދަ ބޭންކަކުން ފިޔަވަޅެއް އެޅުމަކީ ނުވާނެ ކަމެކެވެ.
ރާއްޖޭގެ ގައުމީ ބޭންކާއި އެކު ކުރަމުންދާ މާލީ މުއާމަލާތްތައް އެފަދަ ބޭންކަކުން ހުއްޓާލުމަށް ނިންމާނީ ވަރަށް ބޮޑު މައްސަލައަކާއި ގުޅިގެން ކަމަށް ގަބޫލުކުރެވެއެވެ.
އަދި އެފަދަ މައްސަލައެއް އުޅޭކަމަށް އެ ބޭންކަކަށް ގަބޫލުކުރެވޭނެ ފަދަ ފުރިހަމަ ހެކިތަކެއް ހުރެގެން މެނުވީ އެފަދަ ނިންމުމެއް ނިންމުން އޮންނާނީ ދާދި ދުރުގައެވެ.
ނަމަވެސް ރާއްޖޭގެ ރައީސުލް ޖުމްހޫރިއްޔާ ވިދާޅުވެފައިވަނީ މިއީ ހަނގުރާމައަށްދާ ދިވެހިންގެ ވާހަކަ ދެއްކުމުން ލިބުނު ގެއްލުމެއް ކަމަށެވެ. ރައީސްގެ ވާހަކަފުޅަކީ ހަގީގަތެއް ނޫންކަން ހާމަވެގެންދަނީ ޖޭޕީމޯގަން ފަދަ ބޭންކްތަކުން ރާއްޖެއަށްވުރެ ގިނައިން ހަނގުރާމައަށްދާ މީހުން ދިރިއުޅޭ ގައުމުތަކުގެ ބޭންކްތަކާއި އެކު މުއާމަލާތް ކުރަމުންދިއުމެވެ. މިގޮތުން އިންޑޮނޭޝިއާ އަދި މެލޭޝިއާ ފަދަ ގައުމުތައް ހިމެނެއެވެ.
ގައުމަކުން ހަނގުރާމައަށް ބަޔަކު ދިއުމަކީ ދެ ބޭންކެއްގެ ދެމެދުގައި ހިނގާ ވިޔަފާރި މުއާމަލާތަކާއި އެއްވެސް ގުޅުމެއް އޮތް ކަމެއް ނޫނެވެ. އެކަމަކު ހަނގުރާމައަށް ހަރަދު ކުރުމަށް ބޭންކުގެ ބޭނުން ހިފާނަމަ ގުޅުވާ ލެވިދާނެއެވެ.
ދުނިޔޭގެ ގައުމުތަކުގައި މިފަދަ ފިޔަވަޅުތައް ކަރެސްޕޮންޑިން ބޭންކް ތަކުން އަޅާފައިއެބަވެއެވެ. އެގޮތުން މީގެ އަހަރުތަކެއް ކުރިން ޗައިނާގެ ބޭންކަކާއި އެކު މުއާމަލާ ކުރުން ކަރެސްޕޮންޑް ބޭންކްތަކުން ހުއްޓާލިތާ 24 ގަޑި އިރު ތެރޭގައި އެ ބޭންކް ވަނީ ބެންކްރަޕްޓްވެފައެވެ.
ކަރެސްޕޮންޑް ބޭންކް ތަކުން މުއާމަލާ ހުއްޓާލާފައިވަނީ ބޭންކުތައް ބޭނުންކޮށްގެން ނާޖާއިޒް ފާއިދާ ހޯދަމުންދާ މައްސަލަތަކުގައި އެފަދަ ކަންކަން ހުއްޓުވުމަށެވެ. އެއީ ބައިނަލް އަގްވާމީ ގާނޫނުތައް މަނާކުރާ މަނީލޯންޑަރިން އަދި ޓެރެރިޒަމާއި އެހެނިހެންވެސް ބޮޑެތި ޖިނާއީ ކުށްތަކަށް ހަރަދުކުރުން ހުއްޓުވުމުގެ ބޭނުމުގައެވެ.
ރާއްޖޭގެ ބޭންކާއި މެދު ފިޔަވަޅު އަޅާފައިވާ ކަމަށް ރައީސް ވިދާޅުވެފައިމިވަނީ ރައީސް ޔާމީންގެ މައްޗަށް މަނީ ލޯންޑަރިން ގެ ބޮޑެތި ތުހުމަތުތަކެއް އިދިކޮޅު ފަރާތްތަކުން ކޮށްފައިވާ ދަނޑިވަޅެއްގައެވެ.
އަދި ރާއްޖޭގެ ސެންޓްރަލް ބޭންކާއި ގައުމީ ބޭންކް މިކަމުގައި ބައިވެރިވެފައިވާ ކަމަށާއި ދިވެހި ބޭންކްގެ ސީއީއޯއާއި ސިއްރު ބައްދަލުވުންތަކެއް ބޭއްވި ކަމަށް އިދިކޮޅު ފަރާތްތަކުން ބުނެފައި ވަނިކޮށެވެ.
ދިވެހި ބޭންކާއި ކަރެސްޕޮންޑިން ބޭންކް ތަކާއި މެދު އޮތް ގުޅުން ހީނަރުވަމުންދާ ވާހަކަ ރައީސް ވިދާޅުވުމަކީ މިގައުމުގެ އިގްތިސާދަށް އޮތް ނުރައްކަލެކެވެ.
މީ ދިވެހި ރައްޔިތުން ފުންކޮށް ވިސްނަން ޖެހޭ ކަމެކެވެ.