ޝެއިހް އިމްރާންގެ މައްޗަށް ދައުލަތުން އުފުލާފައިވާ ޓެރަރިޒަމް ދައުވާގެ އަޑުއެހުންތައް ނިންމައި މިރޭ އިމްރާންއަށް ހުކުމް ކުރާއިރު އެހުކުމަކީ ރާއްޖޭގެ ޑިމްކްރަސީ އާއި އިންސާނީ ހައްގު އެއްކޮށް ނައްތާލުމަށް ޖަހާ ސިއްކައެއް ކަމަށް އިމްރާން އާއި އެއްކޮށް މޭއި 1 ވަނަ ދުވަހުގެ ބޮޑު މުޒާހަރާގައި ބައިވެރިވި ޖުމްހޫރީ ޕާޓީގެ ފޮރިން އެންޑް ޕަބްލިކްރިލޭޝަން އެގްޒެކެޓިވް ސޮބާހް ރަޝީދު ވިދާޅުވެއްޖެއެވެ.
މޭއި 1 ވަނަ ދުވަހުގެ މުޒާހަރާއަށް ފަހު ފުލުހުން ހައްޔަރުކޮށް ފަހުން ދޫކޮށްލުމުން ރާއްޖޭން ބޭރުގައި މިހާރު ދިރިއުޅުއްވަމުންދާ ސޮބާހު ވިދާޅުވީ މިރޭގެ ހުކުމުން ރާއްޖޭގެ ޑިމޮކްރަސީ އޮތް ގޮތާއި އިންސާނީ ހައްގު ފެނިގެންދާނެކަމަށެވެ.
އިމްރާން ހައްޔަރުކޮށްފައިވަނީ މޭއި މަހުގެ 1 ވަނަ ދުވަހު އިދިކޮޅު ފަރާތްތަކުން މާލޭގައި ބޭއްވި ބޮޑު މުޒާހަރާގައި ހަމަނުޖެހުމަށް ހިތްވަރު ލިބޭ ގޮތަށް ވާހަކަ ދެއްކި ކަމަށް ބުނެއެވެ،
އިމްރާން ހައްޔަރުކޮށް ޝަރީއަތެއް ނުކޮށް ގިނަ ދުވަސްތަކެއް ގޮސްފައިވާތީ އެކަމަށްވެސް ސޮބާ ދިޔައީ ފާޑު ކިޔަމުންނެވެ.
އިމްރާންގެ މައްޗަށް މިރޭ ހުކުމް ކުރާ އިރު މޭއި 28 ވަނަ ދުވަހު ރ. އިފުރު އެއާޕޯޓު ހުޅުވަން އެ ރަށުގައި ބޭއްވި ރަސްމިއްޔާތުގައި ރައީސް ޔާމީން ވިދާޅުވި ގޮތުގައި ރ. އުނގޫފާރު ދާއިރާގެ މެމްބަރުކަން ކުރެއްވި އަފްރާޝީމްގެ މަރުގެ މައްސަލައިގައި އިމްރާންގެ މައްޗަށް އަމިއްލަ ހައިސިއްޔަތުން އަބުރުގެ ދައުވާއެއް ނުކުރައްވާނެ އެވެ. އޭގެ ބަދަލުގައި ކުރައްވާނީ ޖިނާއީ ދައުވާއެއް ކަމަށް އެ މަނިކުފާނު ވިދާޅުވި އެވެ.
އެގޮތަށް ރައީސް އަބްދުﷲ ޔާމީން ވިދާޅުވިތާ މަދު ވަގުތުކޮޅެއްގެ ތެރޭގައި އިމްރާން ވަނީ ހައްޔަރުކޮށް ޝަރީއަތެއް ނެތި އަހަރެއްހާ ދުވަހަށް ބަންދުކޮށްފައެވެ.