ސ.އަތޮޅު މަދުރަސާގެ ދަރިވަރުންނަށް ޔޫތް މިނިސްޓްރީގެ ފަރާތުން ކެރިއާ ގައިޑެންސް ސެޝަނެއް ކުރިއަށް ގެންގޮސްފިއެވެ.
އަތޮޅު މަދުރަސާގެ ގްރޭޑް 10ގެ ދަރިވަރުންނަށް ޚާއްސަކޮށްގެން މިއަދު ހެނދުނު ބޭއްވި މި ސެޝަންގައި މައުލޫމާތު ދެއްވާފައި ވަނީ ޔޫތް މިނިސްޓްރީގެ ފަރާތުން އައްޑޫގައި ބޭއްވުމަށް ހަމަޖެހިފައިވާ 'ކިއްސަރު' ފެއާއަށް އައްޑޫގައި ހަރަކާތްތެރިވަމުންދާ އެ މިނިސްޓްރީގެ މުވައްޒަފުންނެވެ.
މިމަހުގެ 19 ވަނަ ދުވަހު ޝަރަފުއްދީން ސްކޫލްގައި ބޭއްވުމަށް ހަމަޖެހިފައިވާ 'ކިއްސަރު' ފެއާ ބޭއްވުމުގެ ކުރިން އައްޑޫގެ އެހެން ސްކޫލްތަކުގައި ވެސް ކެރިއާ ގައިންޑެންސް ސެޝަންތަކެއް ބޭއްވުމަށް ވަނީ ހަމަޖެހިފައިވާ ކަމަށް ޔޫތް މިނިސްޓްރީ އިން މައުލޫމާތު ދެއްވައެވެ.
ކިއްސަރު ފެއާ އަކީ ޒުވާނުންނަށް ތައުލީމާ ވަޒީފާގެ ފުރުސަތުތައް ހުރި ގޮތް އަންގައިދިނުމަށް ކޮންމެ އަހަރަކު ވެސް ޔޫތް މިނިސްޓްރީގެ ފަރާތުން ބާއްވަމުން އަންނަ ފެއާއެކެވެ. މިއީ މިފެއާ އައްޑޫގައި ބާއްވާ ފުރަތަމަ ފަހަރެވެ.
އެންމެ ފުރަތަމަ އީސީސީގައި ބޭއްވުމަށް ހަމަޖެއްސި ފެއާ މިހާރު ބޭއްވުމަށް ހަމަޖެހިފައިވަނީ ޝަރަފުއްދީން ސްކޫލްގައެވެ. ނަމަވެސް އެއީ ކޮން ސަބަބަކާއި ހުރެ ކަމެއް ޔޫތް މިނިސްޓްރީ އިން ހާމަކޮށްފައެއް ނުވެއެވެ.