އުރީދޫގެ ވަފާތެރި ކަސްޓަމަރުންނަށް ޝުކުރު އަދާކުރުމަށްޓަކައި، ވަރަށް ފުރިހަމަ ޢިނާޔަތްތަކާއި އެކު "ވެދުން" މިއަދު ތަޢާރަފް ކޮށްފިއެވެ.
ހޮޓެލް ޖެންގައި މިއަދު ބޭއްވި ހަފްލާއެއްގައި އެ ހިދުމަތް ތައާރަފްކޮށްފައިވަނީ އުރީދޫގެ ސީއީއޯ ވިކްރަމް ސިންހަ އާއި އެކުންފުނީގެ ހެޑް އޮފް ކަސްޓަމާ ކެއާ ގުލްނާޒު މާހިރުއެވެ.
އުރީދޫން ބުނީ ހޭދަކުރާ ކޮންމެ ރުފިޔާއަކަށް ޕޮއިންޓްލިބޭ ގޮތަށް އޮންނަ މި ހިދުމަތް ޕްރިޕެއިޑް އަދި ޕޯސްޓްޕެއިޑް ކަސްޓަމަރުންނަށްވެސް ލިބޭނެ އެވެ.
މިއަދު ތައާރަފް ކުރި ސްކީމާ ގުޅޭގޮތުން މައުލޫމާތު ދެއްވަމުން އުރީދޫގެ ސީނިއާ އެގްޒެކްޓިވް ޕަބްލިކްރިލޭޝަންސް، ނޫރާ އިބްރާހިމް ޒާހިރު ވިދާޅުވީ، އުރީދޫގެ ހިދުމަތް ލިބިގަތުމަށް ބޭނުންކުރާ ކޮންމެ ރުފިޔާއަކަށް އެ ސްކީމުގެ ދަށުން ޕޮއިންޓް ލިބޭނެ ކަމަށެވެ.
"ޕްރީޕެއިޑް ކަސްޓަމަރުން ރީޗާޖް ކުރާ ކޮންމެ ފަހަރަކު އެއަދަދަށް އެކަށީގެންވާ ޕޮއިންޓް ލިބިގެންދާއިރު މުއްދަތު ހަމަވުމުގެ ކުރިން ބިލް ދެއްކެވުމުން ޕޯސްޓްޕެއިޑް ކަސްޓަމަރުންނަށް ވެދުން ޕޮއިންޓް ލިބިގެންދާނެ،" ނޫރާ ވިދާޅުވިއެވެ.
ހިލޭ ލިބޭ އެ ޕޮއިންޓްތައް މެދުވެރިކޮށް ހިލޭ ކޯލް ކުރުމާއި ހިލޭ އެސްއެމްއެސް އާއި ޑޭޓާ އަދި ކޯޕަރޭޓް ހަދިޔާ ލިބިގެންދާނެ ކަމަށް ނޫރާ ވިދާޅުވިއެވެ.
ހަމައެހެންމެ އެ ޕޮއިންޓްތައް މެދުވެރިކޮށް މަޝްހޫރު ވިޔަފާރިތަކުން ވައުޗާ އަދި އިނާޔަތްތައް ލިބިގެންދެއެވެ. އެ ވިޔަފާރިތަކުގެ ތެރޭގައި ހަމީދިއާ އާއި ފެންޓަސީ ސްޓޯރުގެ އިތުރުން ރެޑްވޭވް ފަދަ ވިޔަފާރިތައް ހިމެނެއެވެ.