އަދާލަތު ޕާޓީގެ ރައީސް ޝެއިޚް އިމްރާން އަބްދުﷲގެ މައްޗަށް 12 އަހަރުގެ ޖަލު ހުކުމެއް އިއްވުމާއި އެކު ގިނަ ބަޔަކު ބުނަމުން ދިޔަ ވާހަކަ އަކީ އެއީ މާ ކުރީއްސުރެ ލިޔެފައިވާ ހުކުމެއް ކަމަށެވެ. އަދި އިމްރާންގެ މައްޗަށް ހުކުމް ކޮށްފައި ވަނީ ސީދާ ސަރުކާރުން ބޭނުންވި ގޮތަށް ކަމަށް ވެސް ބުނެފައިވެއެވެ.
އިމްރާންގެ މައްޗަށް ހުކުމް އިއްވުމާއި އެކު ގިނަ ބައެއް ރުޅިވެރިކަން ސަރުކާރަށް އަމާޒުވެފައި ވަނިކޮށް އެ ރުޅިވެރިކަން އިތުރުވެގެން ދިޔައީ، ޕީޕީއެމްގެ މަޖިލިސް މެންބަރުންގެ ވައިބަރ ގްރޫޕެއްގައި ދެއްކި ވާހަކަ ތަކެއްގެ ސްކްރީން ޝޮޓެއް ސޯޝަލް މީޑިޔާގައި އާންމު ވުމާއި އެކުއެވެ.
އެ ސްކްރީން ޝޮޓުގައި ވާގޮތުން، އިމްރާން އަށް ޖަލު ހުކުމް އިއްވުމާއި ގުޅިގެން ރައީސް އަބްދުﷲ ޔާމީން ވެސް އުފާކުރައްވައި އަލްހަމްދުލިﷲ ވިދާޅުވެފައިވެއެވެ.
އެހެންނަމަވެސް ސްކްރީން ޝޮޓުން އަޅުގަނޑަށް އެންމެ އަޅައިގަތީ، އަދި މާފަންނު އުތުރު ދާއިރާގެ މެންބަރު އަސްމާ ރަޝީދުގެ މެސެޖެވެ. އަދާލަތު ޕާޓީގެ ހާރިޖީ ގުޅުންތަކާ ބެހޭ ކޮމެޓީގެ ރައީސް ޝިދާތާ ޝަރީފް "ހޭނެތުނު ޚަބަރު ލިބިއްޖެ" ކަމަށް ބުނެ މަލާމާތް ކުރައްވާފައިވާތީއެވެ.
އެ މެސެޖު ފެނުމާއި އެކު ހަނދާނަށް އައީ މީގެ ދުވަސްކޮޅެއް ކުރިން ރާއްޖޭގެ އޮންލައިން ނޫހެއްގެ ނޫސްވެރިޔަކު ހިއްސާކުރި ވާހަކައެކެވެ. ހިތުގައި އުފެދުނު ސުވާލަކީ، މެންބަރު އަސްމާ އަކީ އެހެން މީހުންނަށް އަނިޔާވެރިކަން ތަހައްމަލް ކުރަން ޖެހުމުން އެކަމަށް ހަޖޫޖަހާ ފެންވަރުގެ ބޭފުޅެއް ތޯއެވެ؟
އަސްމާ ރަޝީދުއެވެ. ކަމަނާގެ ދަރިކަލުން މުހައްމަދު ޝަރީފް (މުންދު) ގެ މައްސަލަ އެއްގައި ދައުވާކުރަން ފޮނުވުމަށް އޭސީސީ އިން ނިންމުމާއި ގުޅިގެން އެ ޚަބަރު ޝާޢިއު ކުރި ނޫހުގެ ނޫސްވެރިޔަކަށް މުންދު އާއި ބެހޭގޮތުން ލިޔުނު ޚަބަރު ނެގުމަށް އެދި ރޮއެފައި ކުރި އާދޭސްތައް ހަނދާން ވޭ ހެއްޔެވެ؟
އެދުނު ގޮތަށް ޚަބަރު ނުނެގުމުން އެދުމުން އެއްބަސް ނުވުމުން ހެއްދެވި ނުހެއްދެވި އަށް ގޮވި ހަނދާން ވޭ ހެއްޔެވެ؟
އަސްމާ އެދުނު ގޮތަށް އެ ޚަބަރު ނަގަން އެއްބަސްނުވުމުން ނޫސްވެރިޔަކާއި ދިމާލަށް މަޖިލީހުގެ މެންބަރަކަށް ވެ ހުރެ ހެއްދެވި ނުހެއްދެވި އަށް ގޮވި އިރު އެ ނޫސްވެރިޔާ އެވާހަކަ ހިއްސާކުރީ ހަމައެކަނި ކޮފީ މޭޒު ތަކުގައެވެ.
ކަމަނާއަކަށް މަލާމާތެއް ނުކުރައްވައެވެ. ނޫސްވެރިއެއްގެ ހައިސިއްޔަތުން އެ ވާހަކަ ލިޔުމުގެ ފުރިހަމަ އިޙްތިޔާރު އެ ނޫސްވެރިޔާއަށް އޮތެވެ.
މެންބަރު އަސްމާއެވެ. މަލާމާތް ކުރުމާއި އެހެން މީހުންނަށް ޖެއްސުން ކުރުމުގެ ކުރިން ތިމަންނާގެ ހާލު ބައްލަވާލެއްވުން ކީއްތޯއެވެ؟
އަދި އެއް ވާހަކައެއް ބުނެލާނަމެވެ. މާދަމާ ކަމަނާގެ ދަރިކަލުން މުހައްމަދު ޝަރީފް (މުންދު) ގެ މައްޗަށް ހުކުމެއް އިއްވުމުން އެވާހަކަ ލިޔާ ނޫސްވެރިޔާއަށް ގުޅާފައި " ތީ މީހެއްގެ އަބުރު ގެއްލުވާލީއޭ، ތިދިނީ ކިހާ ބޮޑު ނިކަމތި ކަމެއް ހެއްޔޭ" ނުބުނައްޗެވެ.