ރައީސުލް ޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް އަކީ "ގަޓު" ބޭފުޅެއްކަމަށް އެމަނިކުފާނަށް ތާއިދުކުރާ ފަރާތްތަކުން ވަރަށް ގިނައިން ބުނަމުންދާ އަޑުއިވެއެވެ. މިހެން ބުނަމުންދާންޖެހޭ ސަބަބަކީ ސަރުކާރުގެ ނިންމުންތައް ތަފާތުވެފައި، އަބަދުވެސް ޖަދަލުކުރާ ޒާތަކަށް ސަރުކާރުގެ ނިންމުންތައް ހުރުމުން ކަމުގައިވެސް ވެދާނެއެވެ. ކޮންމެއަކަސް ރައީސް ޔާމީންގެ ނިންމެވުންތައް ހުންނަގޮތުން އެމަނިކުފާނު އެންމެ ބޭނުންފުޅުވާ ލަޤަބަކީ "ގަޓު ރައީސް" ގެ ލަޤަބުހެންވެސް ބައެއްފަހަރު ހީވެއެވެ.
ރައީސް ޔާމީންގެ ގަޓު ނިންމުންތަކުގެ ބޮޅަށް އެންމެފަހުން އިތުރުވެގެން މިދިޔައީ ޝެއިޙް އިމްރާން ބާރަ އަހަރަށް ޖަލަށް ލުމަށް ހުކުމްކުރުމެވެ.
މިހެންދެންނެވުމުން ކޯޓަކީ ވަކިތަނެއް ކަމަށާއި ރައީސް އަކީ ވަކި މީހެއް ކަމަށް މީހަކު ބުނެފާނެއެވެ. ނަމަވެސް ޝަރުޢީ ދާއިރާގެ ވައި ހުރިގޮތުންނާއި، ރައީސްގެ ބަސްމަގު ބަހައްޓަވާގޮތާއި، ގަޓުކަމަށް ބަލާއިރު ކަންއޮތީ މުޅިން އެހެން ކަމުގައި ދިވެހިން ޤަބޫލުކުރާކަށް ނެތެވެ. މިކަމުގައި ރައީސް ޔާމީނަށް ތާއިދުކުރާ މީހުންނާއި އިދިކޮޅު މީހުންގެވެސް ވިސްނުމުގައި ތަފާތެއް ހުރިހެނެއް ހީއެއްނުވެއެވެ. އަދި ކިއެއްތޯއެވެ. ބޭރުގެ ބޮޑެތި ޤައުމުތަކާއި ކުދި ޤައުމުތަކުގެ ވިސްނުމަކީވެސް ހަމައެއީއެވެ.
ޝެއިޙް އިމްރާން ޖަލަށް ލުމަށް ނިންމި ނިންމުމަކީ އަސްލުވެސް ވަރަށް "ގަޓު" ނިންމުމެކެވެ. ސަބަބުތައް ކިތައްމެހާވެސް ބައިވަރެވެ.
ރާއްޖޭގައި ސިޔާސީ ބޭފުޅުންނަށް ބޮޑެތި ހުކުމްތައް ކޮށްފައިވުމާއި ގުޅިގެން ބޭރުގެ ފަރާތްތަކުގެ ނުރުހުން މިދަނޑިވަޅުގައި މިވަނީ އިންތިހާއަށް ބޮޑުވެފައެވެ. އިހަށްދުވަހު ރާއްޖެއަށް ޒިޔާރަތްކުރި އީޔޫގެ ވަފްދުން ބޭއްވި ނޫސްވެރިންގެ ބައްދަލުވުމުގައިވެސް ބުނެފައިވަނީ ސިޔާސީ ބޭފުޅުން ޖަލުގައި ބައިތިއްބައިގެން ބާއްވާ އިންތިހާބެއްވެސް ޤަބޫލު ނުކުރާނެކަމަށެވެ. އަދި މިކަންކަމާއި ގުޅިގެން ދެންމެ ދެންމެ ދަތިކުރުމުގެ ފިޔަވަޅު އަޅާފާނެހެންވެސް ހީވެއެވެ.
އިމްރާންގެ ކުރިން ޖަލަށްލުމަށް ޙުކުމްކޮށްފައިވާ ސިޔާސީ ބޭފުޅުން ދޫކޮށްލުމަށް ދުނިޔޭގެ ބާރުގަދަ ޤައުމުތަކުން މެދުނުކެނޑި ގޮވާލަމުން ދަނިކޮށް އަނެއްކާ އިތުރު ސިޔާސީ ލީޑަރަކު ޖަލުގެ ތޭރިތަކުގެ ފަހަތަށް ފޮނުވާލުމަކީ ވަރަށް "ގަޓު" ހުރެގެން ނޫނިއްޔާ މީހަކު ކުރާނެ ކަމެއް ނޫނެވެ.
މިއީ ޤައުމުގެ ޚާރިޖިއްޔާއަށްވެސް ޖެހުނު އިތުރު ތަކުލީފެކެވެ. އެއީ ކުރިން ޖަލަށްލާފައިތިބި ސިޔާސީ ލީޑަރުން ޖަލަށްލީ ރަނގަޅަށްކަން ބޭރުގެ ފަރާތްތަކަށް ބުނެދިނުމުގައި އެވުޒާރާ އަވަދިނެތި އުޅެނިކޮށް އިތުރު ޝަރީޢަތެއްގެ ވާހަކަ ބުނެދޭންޖެހުނީއެވެ. މިކަން މިޖެހުނީވެސް ރައީސްގެ "ގަޓު" ކަމުންނެވެ.
އިމްރާން ޖަލަށްލުން ނޫނަސް ރައީސްގެ "ގަޓު" ކަން ފެނިގެންދިޔަ ވަރަށް ކަންތައް ހިނގައްޖެއެވެ. މިގޮތުން ބަލާއިރު ކަރަންޓުބިލު ބޮޑުކުރުމަށް ސަބްސިޑީ ކަނޑާލީވެސް ގަޓު ހުރުމުންކަމަށްވެއެވެ. އެނިންމުމަށް ރައްޔިތުންގެ ނުލާހިކު ތަރުހީބުވެސް ލިބިގެން ދިޔަތަން ފެނުނެވެ.
ކުރީގެ ނައިބު ރައީސް އަދީބު އާއި ގުޅިގެން ރައީސް މައުމޫން ސިޔާސީ މައިދާނުން ބާކީކޮށްލަން އުޅުނީވެސް ރައީސް ޔާމީންގެ ގަޓު ހުރިވަރުންނެވެ. ރާއްޖޭގެ ފަޅުތަކާއި ރަށްތައް އެއެއް މިއެއް ނުބަލާ ވިއްކާ، ލިބުނު ޑޮލަރުން އަދީބު ގައުމުގަ ނެތްވަރުގެ މަހުޖަނަކަށްހަދާ، ހަވާރަސްގެފާނުގެ ލަޤަބުދީގެން އުޅުނީވެސް ރައީސް ޔާމީންގެ ގަޓު ކަމުންނެވެ.
އަދި ކޮބާތޯއެވެ. އަނބިކަމަނާގެ އިތުރުން ހަޔާތުގެ އެންމެ ބޮޑު ބައިވެރިއަކަށް ހުރި ކުރީގެ ދިއްގަރު ދާއިރާގެ މެމްބަރު ނާޒިމް ދިގުމުއްދަތަކަށް ޖަލަށްލީއިރު ފޮނުވި ޅެމުގެ އަސަރެއް ނުކުރީވެސް ރައީސް ޔާމީންގެ ގަޓުކަމުންނެވެ.
އެއްދުވަހު ހާލިދު ބިން ވަލީދު ފަދައޭ ވިދާޅުވި އަދީބު ދޫނިދޫގައި ހުރި އެންމެ ކުޑަގޮޅިއަށް ލުމަކީވެސް ގަޓު ހުރެގެން ނޫނީ ވާނެ ކަމެއް ނޫނެވެ. އަމިއްލަ ސަރުކާރުގެ ދޯދިޔާ ވާހަކަ އާއި، ޒުވާން ކުދިންނަށާއި، މަޖިލިސް މެމްބަރުންނަށް ފާއިސާ ބަހާ ވާހަކަ ޤައުމާ މުހާތަބުކޮށް ބުނުމަކީވެސް ރައީސެއްގެ ގަޓު ހުރެގެން ނޫނީ ކުރަން ކެރޭ ކަހަލަ ކަންތައް ތަކެއް ނޫނެވެ.
ކެބިނެޓް މިނިސްޓަރުން މަޤާމުން ވަކިކުރިކަން ޓީވީ ޚަބަރުން މިނިސްޓަރަށް އަންގަވާ، ދައުރުގެ ފުރަތަމަ ހާފުގައި ދެ ނައިބުން ބުރުވާލާނީ އެހެން ރައީސުންނާއި ތަފާތުބޮޑުކޮށް ގަޓު ހުރީމައެވެ. ރައީސްގެ ގަޓު ހުރިވާހަކަތައް މިހިސާބުން މި ނިންމާލަނީ ގަޓުކޮށް ކުރި ކަންތައް ހުސްވެގެންނެއް ނޫނެވެ.ސިޔާސީ މައިދާނުގައި ރިޔާޒް ރަޝީދު މެން ފަދަ ރައީސަށްވުރެ ގަޓު ހުރި މީހުން ތިބުމާއިއެކު މަޞްލަޙަތަށްޓަކައި ކުރުކޮށްލަނީއެވެ.