މޯލްޑިވް ގޭސްގެ މެނޭޖިން ޑިރެކްޓަރ އަބްދުﷲ މައުމޫން (މާނު)ގެ ހިއްސާ އޮންނަ ކުންފުންޏަކާއި، ޕަބްލިކް މީޑިއާ ސާވިސް (ޕީއެސްއެމް) އާއި ދެމެދު، ހިންގާފައިވާ ކަރަޕްޝަނާއި ގުޅޭ މައްސަލަތަކެއް އޭސީސީއަށް އަމިއްލަ ފަރާތަކުން ހުށަހެޅުމަށް މަސައްކަތް ކުރަމުންދާ ކަމުގެ މައުލޫމާތު "އައްޑޫލައިވް"އަށް ލިބިއްޖެއެވެ.
މައުލޫމާތު ލިބިފައިވާ ގޮތުގައި އޭސީސީއަށް ހުށަހެޅުމަށް ނިންމާފައިވަނީ މާނުގެ ހިއްސާ އޮންނަ "ވީވާ" ނަމަކަށް ކިޔާ ކުންފުންޏަކާއި، ޕީއެސްއެމް އާއި ދެމެދު ސަރުކާރުގެ ހަފްލާތައް ބޭއްވުމަށް ކުރެވިފައިވާ މުއާމަލާތަކާއި ގުޅޭ މައްސަލަތަކެވެ.
އެގޮތުން 2016 އާއަހަރު ފާހަގަ ކުރުމަށް ކާނިވާ ސަރަހައްދު ތައްޔާރުކޮށް، ސްޓޭޖް ހެދުމާއި، އެ ސަރަހައްދުގެ މަގު ފާރު ރޭނުމާއި، ބިންގަޑު ލެވެލް ކުރުމަށް "ވީވާ" ކުންފުންޏާއި ހަވާލުކޮށްފައިވަނީ ޕީއެސްއެމްއިންނެވެ. އެކަމަށް 24 މިލިއަން ރުފިޔާ "ވީވާ" ދީފައިވާ ކަމަށް މައްސަލަ އޭސީސީއަށް ހުށަހަޅާ ފަރާތުން ބުނެއެވެ.
މީގެ އިތުރުންވެސް ސަރުކާރުގެ ގިނަ ހަފްލާތައް ބޭއްވުމަށް މިހާރު ދެނީ ވީވާ ކުންފުންޏަށެވެ. އެގޮތުން ބްރިޖް މަޝްރުއު އިފްތިތާހު ކުރުމަށް ބޭއްވި ރަސްމިއްޔާތާއި، ދާދި ފަހުން "ރަސްފަންނު" ހުޅުވަން ބޭއްވި ރަސްމިއްޔާތުވެސް ހަވާލުކޮށްފައިވަނީ "ވީވާ" ކުންފުންޏަށް ކަމަށް މައުލޫމާތު ލިބެއެވެ.
ވީވާގެ ހިއްސާދާރު މާނު މައްސަލައެއް އޭސީސީއަށް ހުށަހެޅުމަށް މަސައްކަތް ކުރަމުން އަންނަ އިރު މާނު މެދުވެރި ކޮންމެ މަހަކު "ދޮޅު ލައްކަ ރުފިޔާ" އެސްއޯއެފްގެ ފަރާތުން މެޑަމް ފާތިމަތު އިބްރާހިމްއަށް ހަވާލުކޮށްފައިވާ ކަމުގެ ހެކި ލިބިފައިވާ ކަމަށް އެމްޑީޕީގެ ޗެއާޕާސަން އަލީ ވަހީދު ވަނީ ވިދާޅުވެފައެވެ.
މާނު އަކީ ރައީސް އަބްދުﷲ ޔާމީން އާއި މެޑަމް ފާތިމަތު އިބްރާހިމް އާއި ގާތް ގުޅުމެއް އޮންނަ ބޭފުޅެކެވެ.