Last Updated: April 6, 16:39
Sunday, April 6, 2025
ޚަބަރު

މޯލްޑިވިއަން ފްލައިޓެއްގައި މާލެއިން ގަމަށް ދަތުރުކުރި ބައެއް ޕަސިންޖަރުންގެ ލަގެޖްތައް "އޮޅިގެން" ތިމަރަފުށްޓަށް!

ޤައުމީ އެއާލައިން މޯލްޑިވިއަންގައި މާލެއިން ގަމަށް ދަތުރުކުރި ބައެއް ޕަސިންޖަރުންގެ ލަގެޖް "އޮޅިގެން" ތިމަރަފުށީ އެއާޕޯޓަށް ބޭލި މައްސަލައެއް ފެންމަތިވެއްޖެއެވެ.

'އައްޑޫލައިވް' އަށް މައުލޫމާތު ލިބިފައިވާގޮތުގައި މިއަދު މާލެއިން ގަމަށް ދަތުރުކުރި ބައެއް ޕަސިންޖަރުންގެ ލަގެޖްތައް ތިމަރަފުށީ އެއާޕޯޓަށް ބޭލުނީ އޮޅިގެންނެވެ.

ތިމަރަފުށީ އެއާޕޯޓުން ވާހަކަ ދެއްކި މުވައްޒަފަކު ބުނި ގޮތުގައި، ލަގެޖުތައް ބޯޓުން ބާލަނީ ލަގެޖް ޓެގްތަކަށް ބަލައިގެން ކަމަށާއި، އެއީ ތިމަރަފުށީ އެއާޕޯޓުގެ މުވައްޒަފުންގެ މައްސަލައެއް ނޫންކަމަށެވެ.

"ލަގެޖްގެ ޓެގަށް ބަލާފައި ޗެކްކޮށްފައި މިބޭލީ. މާލޭ އެއާޕޯޓުން ނުބަލައި ޓެގް އެޅުވީމާއި ވީ ކަމެއް މިއީ"

މޯލްޑިވިއަންގެ ފްލައިޓްތަކުގައި ދަތުރުކުރާ ބައެއް ޕަސިންޖަރުންގެ ލަގެޖްތައް ދަތުރުކުރާ އެއާޕޯޓު ނޫން އެހެން އެއާޕޯޓުތަކަށް ބޭލުމުގެ މައްސަލަތައް މީގެ ކުރިން ދިމާވެފައިވެއެވެ.

މިއަދު މާލެއިން ގަމަށް ދަތުރު ކުރި ޕަސިންޖަރަކު ބުނި ގޮތުގައި، ތިމަރަފުއްޓަށް "އޮޅިގެން" ބޭލުނު ލަގެޖްތައް ގަމަށް ގެނައުމަށް 2 ދުވަސް ވާނެ ކަމަށް އޭނާއަށް މޯލްޑިވިއަން އިން އަންގާފައިވާ ކަަމަށެވެ.