ރިޔާސީ ލޯންޗް "ފިނިފެންމާ" ގައި އެއްޗެއް ގޮއްވާލި މައްސަލައާ ގުޅިގެން ހައްޔަރު ކުރެވުނު މީހުންގެ މައްޗަށް ދަޢުވާކުރުމަށް އެދި މާދަމާ ޕީޖީ އޮފީހަށް މައްސަލަ ވައްދާނެ ކަމުގެ މަޢުލޫމާތު އިތުބާރުހުރި ގޮތަކަށް "އައްޑޫ ލައިވް" އަށް އެނގިއްޖެއެވެ.
"އައްޑޫލައިވް"އަށް މައުލޫމާތު ލިބިފައިވާ ގޮތުގައި، ދަޢުވާ ކުރަން ފޮނުވަނީ ކުރީގެ ނާއިބު ރައީސް އަޙްމަދު އަދީބު އާއި އިސްޙާޤު ޙަސަން އާއި އަދީބުގެ ޕާސަނަލް ސެކިއުރިޓީ އޮފިސަރު ސާޖެންޓް އަހްމަދު ރިކާޒްގެ މައްޗަށެވެ.
މި މައްސަލައިގެ ތުހުމަތުގައި ހައްޔަރު ކުރެވުނު އެމް.އެން.ޑީ އެފްގެ ޖަވާޒު ބޭނުންކުރަނީ ދައުލަތުގެ ހެއްކެއްގެ ގޮތުގައި ކަމަށެވެ.
ސާޖެންޓް އަހްމަދު ރިކާޒްއަކީ ރައީސުލް ޖުމްހޫރިއްޔާގެ އޮފީހުގެ ސްޓޭޓް މިނިސްޓަރ މުޙައްމަދު މުޖުތާޒުގެ އެއްބަނޑު އެއްބަފާ ކޮއްކޮއެވެ. ހެކީގެ ގޮތުގައި މައިގަނޑުގެ ގޮތެއްގައި ފުލުހުންނަށް ލިބިފައިވަނީ ޖަވާޒުގެ ބަޔާނުގެ އިތުރުން ރެހެންދި ފްލެޓުގެ ސީސީޓީވީ ފުޓޭޖާއި ރެހެންދި ފްލެޓްގައި އަދީބު ބޭނުން ކުރެއްވި އެޕާޓްމަންޓުގެ ކާޕެޓުން ނަގާފައިވާ ޑީ.އެން.އޭ ސާމްޕަލްތަކެއް ކަމަށް މައުލޫމާތު ލިބެއެވެ.
ފުލުހުން ތުހުމަތު ކުރާ ގޮތުގައި ބޮން ހަދާފައިވަނީ ރެހެންދި ފްލެޓްގައެވެ. މި މައްސަލާގައި ހައްޔަރު ކުރެވިފައިވާ ފަރާތްތައް ހައްޔަރު ކުރި ފަހުން މިހާރުވަނީ ހަތަރުމަސް ދުވަހަށްވުރެ ގިނަދުވަސް ވެފައެވެ.
މީގެ އިތުރުން، ބޮމުގެ މައްސަލައާއި ގުޅިގެން ފުލުހުން ހިންގި ހާއްސަ އޮޕަރޭޝަނެއްގައި ހިބަޅިދޫއިން ހަތިޔާރު ތަކަކާއި ވަޅުލާފައިވާ ފައިސާތަކެއް ފެނިފައިވާ ކަމަށްވެސް މައުލޫމާތު ލިބިފައިވެއެވެ.
އަދި ހިބަޅިދޫން ފައިސާތަކެއް ފެނުނު ފަހުން ފުލުހުންގެ އިސް އޮފިޝަލުން ތަކަކާއި ރައީސް ޔާމީން ބައްދަލުކޮށް ފައިސާ ހޯދައި ދިނުމަށް އެދިފައިވާ ކަމަށްވެސް މައުލޫމާތު ލިބިފައިވެއެވެ.