ސ.ގަމުގައި ކުރިއަށްދާ ސްނިކާސް ސްޓްރީޓް ސޮކާރ ކަޕް 2016 ގެ މެޗެއް ބަލަން ގޮސް ތިބި ސަޕޯޓަރުން އަރާ ތިބި ސިޑިބަރީގެ ބައެއް ވެއްޓުމުގެ ސަބަބުން ބައެއް ސަޕޯޓަރުންނަށް އަނިޔާ ވެއްޖެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ސިޑިބަރީގެ ބައެއް ވެއްޓުމުގެ ސަބަބުން 4 މީހަކަށް ވަނީ އަނިޔާވެފައެވެ.
މަންޒަރު ދުށް މީހަކު ބުނި ގޮތުގައި އޭގެ ތެރެއިން އެކެއްގެ އަނގައިން ގިނަ އަދަދަކަށް ލޭ ފޭބި ކަމަށާއި ދެން ތިބި 3 މީހުންނަށް ވެސް އެކިވަރުގެ އަނިޔާ ލިބިފައިވާ ކަމަށެވެ.
މި ހާދިސާގައި އަނިޔާވި މީހުން ފުރަތަމަ ގެންގޮސްފައި ވަނީ، ފޭދޫ ސިއްޙީ މަރުކަޒަށެވެ. ނަމަވެސް މައުލޫމާތު ލިބިފައިވާ ގޮތުގައި މީހާރު އެމީހުން ވަނީ އިތުރު ފަރުވާ ދިނުމަށް ހިތަދޫ ރީޖަނަލް ހޮސްޕިޓަލަށް ގެންގޮސްފައެވެ.
'އައްޑޫލައިވް' އަށް އެނގިފައިވާ ގޮތުގައި ސިޑިބަރީގެ ބައެއް ވެއްޓުމުގެ ހާދިސާގައި އަނިޔާވެފައި ވަނީ 3 އަންހެނުންނާއި ފިރިހެނަކަށެވެ.
ސްޓްރީޓް ސޮކަރ ކަޕް ކުރިއަށްދާ ދަނޑަކީ، ގަމުގައި އިނގިރޭސިން ތިބި ދުވަސްވަރު އެމީހުން ޤާއިމްކޮށްފައިވާ ދަނޑެކެވެ. އަދި އެތަނުގައި ހުރި ސިޑިބަރި ތަކަކީ ވެސް އިނގިރޭސިން ޤާއިމްކޮށްފައިވާ ސިޑިބަރިތަކެކެވެ.
