ރައްޔިތުންގެ މަޖިލީހުގެ މެންބަރަކު މަޖިލީހުގައި ދައްކަން ޖެހެނީ ހަމައެކަނި އެބޭފުޅާގެ ދާއިރާ އާއި ބެހޭ ވާހަަކަ ކަމެއް ނުވަތަ ދާއިރާގެ ރައްޔިތުންގެ ވާހަކަ ކަމެއް އެއްވެސް ޤާނޫނެއްގައި ބުނެފައެއް ނެތެވެ.ޤައުމުގައި ހުރި ބޮޑެތި މައްސަލަތަކުގެ ވާހަކަ ދެއްކުމަށް މަޖިލީހުގެ ޤަވާއިދުން ވެސް ހުރަހެއް ނާޅައެވެ.
މަޖިލީހުގެ ހަޔާތުގައި ވެސް ދާއިރާގެ ރައްޔިތުން ފިޔަވައި އެހެން ރައްޔިތުންގެ ވާހަކަ ދައްކައިގެން މަޖިލިސް މެންބަރަކަށް އެއްވެސް ފަރާތަކުން މިހާތަނަށް ފާޑު ކިޔުން އަމާޒުވި މަންޒަރެއް އިއްޔެ އާއި ހަމައަށް ފެނިފައެއް ނުވެއެވެ. ނަމަވެސް ސ.ފޭދޫ ދާއިރާގެ މަޖިލިސް މެންބަރު އިބްރާހިމް ދީދީ ވަނީ އެކަމަށް ފާޑުކިޔައި ނުރުހުން ފާޅުކޮށް ވާހަކަ ދައްކަވާފައެވެ.
ރައްޔިތުންގެ މަޖިލީހުގައި ވާހަކަ ދައްކަވާއިރު ބައެއް މެންބަރުން ރައްޔިތުންނޭ ވިދާޅުވެ ވާހަކަ ދައްކަވާތީ އެ ވިދާޅުވާ ރައްޔިތުންނަކީ ކޮބައިތޯ އައިބީ ވަނީ ސުވާލު އުފައްދާފައެވެ.
" ރައްޔިތުންނަކީ ހަމައެކަނި ދިވެހިރާއްޖޭގައި އާބާދުވެފައިވާ މީހުންގެ ތެރެއިން އެއް ދާއިރާއަކުން އިންތިޚާބުވެފައިވާ މެންބަރު އެއީ ހުރިހާ ރައްޔިތުން ތޯ؟ ނުވަތަ ދިވެހި ހުރިހާ ރައްޔިތުންގެ ވޯޓާ އެކު އިންތިޚާބުކުރެވޭ ރައީސުލްޖުމްހޫރިއްޔާއަށް ތާއީދުކޮށްގެން އެ ރައީސުލްޖުމްހޫރިއްޔާގެ ފަހަތުގައި މިތިބީ ރައްޔިތުން ތޯ ؟ "
އައިބީ ވިދާޅުވި ގޮތުގައި ރައްޔިތުންގެ މަޖިލީހުގެ މެންބަރަކަށް ދިވެހިރާއްޖޭގެ ހުރިހާ ރައްޔިތުން ވޯޓެއް ނުލާ ކަމަށާއި މެންބަރަށް ވޯޓު ލަނީ ރާއްޖޭގެ ރައްޔިތުންގެ ތެރެއިން އާބާދުވެފައި އޮންނަ ގޮތުން މީގެތެރެއިން 5000 މީހުންނަށް ނިސްބަތްވާ ދާއިރާއަކުން ކަމަށެވެ.
ތިމަންނާމެންނަކީ މުޅި ދިވެހިރާއްޖޭގެ ރައްޔިތުންނޭ ވިދާޅުވާއިރު، އެކަން ޤަބޫލުނުކުރެވޭ ކަމަށާއި ހަމަ ޔަޤީނުން އެބޭފުޅާއަކީ ދިވެހިރާއްޖޭގެ ހުރިހާ ރައްޔިތުންނެއް ނޫން ކަން އެނގިވަޑައިގަންނަވާ ކަމަށް އައިބީ ވިދާޅުވިއެވެ.
އައިބީ ވިދާޅުވި ގޮތުގައި ނިސްބަތްވަނީ 5000 ރައްޔިތުން ހިމެނޭ އާބާދީއަކަށް ކަމަށާއި އެބޭފުޅާ އާއި މެދު ހިތްހަމަނުޖެހޭ ގިނަ އަދަދެއްގެ މީހުން ތިބޭނެ ކަމަށާއި އެހެންކަމުން ހުރިހާ ރައްޔިތުންނޭ ނުބުނެވޭނެ ކަމަށެވެ.
" ރައްޔިތުންގެ ނަމުގައި ވާހަކަދައްކަން މާ ތާހިރެއް ނުވާނެ. އެހެންވީމާ، އެ ވާހަކަ އެގޮތަށް ދައްކާފައި ޤައުމުގެ ހުރިހާ ރައްޔިތުން އިންތިޚާބުކޮށްފައި ހުންނަ ރައީސުލްޖުމްހޫރިއްޔާގެ އަގުވެއްޓޭ ގޮތަށް ވަގަށްގޮވާއިރު، ފުރަތަމަ ތިމާނަމެން ސާފު ތާހިރުވާން އެބަޖެހޭ. " އައިބީ ވިދާޅުވިއެވެ.
އައިބީ މިގޮތަށް ވިދާޅުވެފައި ވާއިރު ރާއްޖޭގެ ރައީސުލްޖުމްހޫރިއްޔާ އަބްދުﷲ ޔާމީން އަށް ވެސް ދެއްކެވޭނީ ހަމައެކަނި އެބޭފުޅާއަށް ވޯޓު ދެއްވި ރައްޔިތުންގެ ވާހަކަ ކަމަށް ބުނެ ގިނަ ބަޔަކު ގެންދަނީ ސޯޝަލް މީޑިޔާގައި އައިބީއަށް ފާޑުކިޔަމުން ކަން ފާހަގަކޮށްލެވެއެވެ.