ކޮމަންވެލްތު މިނިސްޓީރިއަލް އެކްޝަން ގްރޫޕު (ސީމެގް) އިން މިއަދު ބޭއްވި އެކްސްޓްރާ އޯޑިނަރީ މީޓިންގައި ރާއްޖޭގެ މައްސަލަ އެޖެންޑާ ނުކުރަން ނިންމައި އަންނަ އެޕްރީލް މަހު ބާއްވާ ބައްދަލުވުމުގެ ކުރިން 6 ކަމެއް ދިވެހި ސަރުކާރަށް ޝަރުޠުކޮށްފިއެވެ.
ސީމެގްއިން މިއަދު ދިވެހި ސަރުކާރަށް ޝަރުތުކޮށްފައިވަނީ ސިޔާސީ ޕާޓީތަކާއި އެކު ހަރުދަނާ ގޮތެއްގައި މަޝްވަރާ ކުރުމަށާއި، ސިޔާސީ ހައްޔަރީން ދޫކޮށްލުމަށެވެ.
މީގެ އިތުރުން ސިޔާސީ ލީޑަރުންގެ ޝަރީއަތް ކުރިއަށް ދިޔަ އިޖުރާއަތްތަކާމެދު ހުރި ކަންބޮޑުވުންތަކަށް އިޖާބަދިނުމަށާއި
ހިޔާލުފާޅު ކުރުން ހުއްޓުވަން ޓެރަރިޒަމްގެ ގާނޫނު ބޭނުން ނުކުރުމަށް ދިވެހި ސަރުކާރަށް ވަނީ ޝަރުޠުކޮށްފައެވެ.
ރާއްޖޭގެ ޖުޑިޝަރީ ހަރުދަނާ ކުރުމާއި، ހިޔާލުފާޅު ކުރުމުގެ މިނިވަންކަން ގާއިމް ކުރުމަށް ސީމެގްއިން ސަރުކާރަށް އެހީތެރިވުމަށްވެސް ވަނީ ނިންމަވާފައެވެ.
ސީމެގް އެޖެންޑާގައި ރާއްޖެ ނުހިމަނަން ނިންމުމާއި ގުޅިގެން ފޮރިން މިނިސްޓަރ ދުންޔާ މައުމޫން ވިދާޅުވީ އިދިކޮޅު ފަރާތްތަކުންނާއި އެފަރާތްތަކަށް ވާގިވެރިވާ ބައެއް ގައުމުތަކާއި ޖަމާއަތްތަކުން، ރާއްޖެ ސީމެގްގެ އެޖެންޑާގައި ހިމަނަން މަސައްކަތްކުރި ނަމަވެސް އެކަން ކާމިޔާބުނުވުމަކީ ވަރަށް ބޮޑު ކާމިޔާބެއް ކަމަށެވެ.
Oluvaalaa andhun alhuvan Sarukarunkuri masakkaiy fail! Siyasee Leaderun dhookollan CMAGin govaalaa April ga alun Raajje review kuranninmaifi
— Abdulla Shahid (@abdulla_shahid) February 24, 2016
މިކަމާއި ގުޅިގެން އެމްޑީޕީގެ ފޮރިން ރިލޭޝަންސް ކޮމިޓީގެ މުގައްރިރު އަބްދުﷲ ޝާހިދު ވިދާޅުވީ ސީމެގުން ސަރުކާރުގެ މައްޗަށް ކުރަން ލާޒިމުކުރި ކަންކަމަކީ އަޅުގަނޑުމެން [އެމްޑީޕީން] ދައްކަމުން ދިޔަ ވާހަކަތައް ކަމަށާއި އެޖެންޑާގައި ނުހިމަނާ ވާހަކަ ވިދާޅުވެފައި ނެތް ކަމަށެވެ.