ކުށްކުރާ މީހުންނާއި އެމީހުންގެ މައްޗަށް ކުށް ސާބިތުވެފައި ތިބި މީހުން އަޅުގަނޑުމެންގެ އުޞޫލުތަކާ އެއްގޮތަށް ވެރިކަން ކުރެވޭނެ ކަމަށް ބުނާކަމަށްވަންޏާ ނީލަން ފިހާރައިގެ ބޮޑު ސޭޓަކަށް ވަގަކު ބޭންދިޔަސް ހަމަ ރަނގަޅުވާނެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ރައީސް އަބްދުﷲ ޔާމީން މިގޮތަށް ވިދާޅުވެފައި ވަނީ އއ.ތޮއްޑޫގައި މިއަދު ބޭއްވި ރަސްމިއްޔާތެއްގައި ވާހަކަ ދައްކަވަމުންނެވެ.
ރާއްޖޭގެ ވެރިކަމާ ދެން ހަވާލުވާން ތިއްބެވި ބޭފުޅުން ރާއްޖޭގެ ވެރިކަމާ ހަމައަށް އަންނަންވާނީ، ރާއްޖޭގެ ޤާނޫނުތަކާއި، ދީނީ އުޞޫލުތަކާއި، ރާއްޖޭގެ އަދަބުތަކާ އެއްގޮތަށް ދަމަހައްޓަން ހިތްވަރުހުރި އަދި އެމީހުންގެ ފަރާތުގައި އެފަދަ ކުށެއްގެ ތުހުމަތު، ނޫނިއްޔާ އެފަދަ ކުށެއްގެ ޙުކުމް ނެތް މީހުން ކަމަށް ވެސް މިއަދު ޖަލްސާގައި ރައީސް ޔާމީން ވަނީ ވިދާޅުވެފައެވެ.
ރައީސް ޔާމީން ވަނީ ރާއްޖެއިން ބޭރުގައި މަސައްކަތް ކުރައްވާ، ރާއްޖޭގެ ކަރާމާތް ނަގާލަން މަސައްކަތް ކުރައްވާ، އަދި ރާއްޖެއަށް ޑިމޮކްރަސީ އަންނާނީ އެބޭފުޅުން މިތާ ތިއްބަވައިގެން ކަމަށް ގަބޫލުކުރައްވާ ބޭފުޅުންނަށް ރާއްޖެ ވަޑައިގަތުމަށް ދައުވަތު އަރުއްވާފައެވެ.