ރައްޔިތުންގެ މަޖިލީހުގެ ވިލިމާލޭ ދާއިރާގެ މެންބަރު އަހްމަދު ނިހާނަށް،
ވެދުން ސަލާމަށް ފަހު ދަންނަވަމެވެ.
ދިވެހިރާއްޖޭގެ ރައްޔިތުންގެ މަޖިލީހުގެ މެންބަރެއްގެ ޙައިސިއްޔަތުން މަނިކުފާނު ޢިއްޒަތްތެރި މެންބަރެއްގެ ލަޤަބު ހޯއްދަވައިގެން ހުންނެވި ނަމަވެސް މިއަދު އަޅުގަނޑުމެން ތިބޭފުޅާއަށް ކުރާނެ ޤަދަރެއް ނެތެވެ. ރައްޔިތުންގެ މަޖިލީހުގެ އިއްޔެގެ ޖަލްސާގައި ތިޔަ ކުރެއްވީ ވަރަށް ދަށު ދަރަޖައިގެ ޢަމަލެކެވެ.
މެންބަރު ނިހާނުއެވެ. މީދޫ ދާއިރާގެ މެންބަރު ރޮޒެއިނާ އާދަމް ވަކި ސަހަލި އެކޭ ނޫނެވެ. އެހެން ނަމަވެސް މަޖިލިސް މެންބަރެއްގެ ގޮތުގައި ހުންނަވައި ނިހާނު ތިޔަ ދެއްކެވީ ހާދަ ހުތުރު ނަމޫނާއެވެ. ވެރިކަމުގެ ބާރާއި ޖާހަތާއި ފައިސާ އާއި މުދާވެރިކަން ފެނި ތިބޭފުޅާއަށް ތިޔަ ވެގެން އުޅޭ ގޮތެއް އެނގިވަޑައިގަންނަވާނީ ހަމަ ތިބޭފުޅާއަށެވެ.
ދަންނަވަންތޯ އެވެ. ނިހާނު ފަދަ އިންސާނެއްގެ މޫނަށް ކޯދޮވެފަ ފެން ބުރުވާލީމަ އެއީ ވަރަށް "ގަޓު" ކަމެއް ކަމަށް އެއް ބަޔަކަށް ވިޔަސް އެއީ ހަމަ ވިސްނޭ އެއްވެސް މީހަކު ޤަބޫލުކުރާނެ ކަމެއް ނޫނެވެ. ތިމަންނާ މަޖިލީހުގެ މެޖޯރިޓީ ލީޑަރު ކަމަށް ވުމަކީ، މިފަދަ ދަށު ދަރަޖައިގެ ޢަމަލު ހިންގުމަށް ލިބޭ ލައިސަންސެއް ވެސް ނޫނެވެ.
މެންބަރު ނިހާނުއެވެ. 100 ފަހަރު ތިޔަ ފިނޑި ޢަމަލު ދިފާޢުކުރަން ކޮށިއެރީއޭ ބުންޏަސް ތިބޭފުޅާ ކަންތައް ކުރެއްވި ގޮތް ނުފެންނަ ކުޑަކުއްޖަކު ވެސް މި ޤައުމަގައި ނެތެވެ. އަންހެނުންގެ ހައްޤުތަކޭ ކިޔާފައި އެއްދުވަހު ވާހަކަ ދައްކާފައި ޖެހިގެން އަންނަ ދުވަހު އަންހެނެއްގެ މޫނަށް އަނގައިން ފެން ޖެހުމުން ނިހާނު އަކީ ކިހާ ފެންވަރެއްގެ ބޭފުޅެއްކަން މިވަނީ ހާމަވެފައެވެ.
އިންސާނުންނާއި ޖަނަވާރުންނާ ތަފާތުވަނީ އިންސާނާއަށް ﷲ ތަޢާލާ ދެއްވި ބުއްދީގެ ނިއުމަތުގެ ސަބަބުންނެވެ. ނިހާނުގެ ތިޔަ ފިނޑި ޢަމަލަކީ ޕީޕީއެމްގެ ހުރިހާ މެމްބަރުންނާއި މުޅި ދިވެހި އުއްމަތް ލަދުވެތިވާފަދަ ދަށުދަރަޖައިގެ ޝައިޠާނީ ޢަމަލެކެވެ. އެފަދަ ހުތުރު ޢަމަލުތައް ކޮށްފައި "ކޮށިއެރިއްޔޭ" ނުވަތަ "ފެންބުރައިގެން ދިޔައީ އޭ" ބުނެ އޮޅުވާލަން މަސައްކަތްކުރުމަކީ އެކަމާއި މެދު ނިހާނު ހިތާމަ ނުކުރާ ކަމުގެ ހެއްކެކެވެ.
މެންބަރު ނިހާނުއެވެ. ކިތަންމެ މަތީ މަޤާމެއްގައި ހުރި ކަމުގައި ވިޔަސް މާދަމާ ﷲ ސުބުޙާނަހޫ ވަތަޢާލާގެ ހަޟްރަތުގައި ތިޔަ ފައިސާ އާއި މަޤާމުން ތިބޭފުޅާއަށް ކުރާނީ ކޮން މަންފާއެއް ތޯއެވެ؟ އަތުކުރީގައި އަޅާފައިވާ ރޮލެކްސް ގަޑި އާއި ލަގްޒަރީ އެޕާޓްމެންޓަކުން ކުރާނެ މަންފާއެއް އެދުވަހަކުން ނޯންނާނެއެވެ. މަންފާ ކުރާނީ ދުނިޔެ މަތީގައި ތިބޭފުޅާ ކޮށްފައިވާ ހެޔޮ ޢަމަލުތަކުންނެވެ.
މަޖިލީހުގެ މެންބަރަކަށް ވެ ހުންނަވައި ނިހާނު ތިޔަ ކުރެއްވި ދަށު ދަރަޖައިގެ ޢަމަލުގެ ސަބަބުން ހިތުގައި އުފެދުނު ޝުޢޫރު ފާޅުކޮށްލީއެވެ. ދުޢާ އަކީ، ﷲ ސުބުޙާނަހޫ ވަތަޢާލާ ނިހާނު އަށް ހެޔޮ ވިސްނުން ދެއްވުމެވެ.